Read idege Etu 18 Bible Online

Etu 18 - idege bible

Etu 18

¹Ọngọ chị ịlọmwụ ebwo-otiro hi angịkịla kaa yẹ ịlọmwụ-ịlọmwụ kem, ọ́ọ myị ju ọnyịịla ọlẹ ká angịkịla la ka.

²Oluchi-ì tịtọ nya ang ọjẹjẹ ka, ọ-jẹ lụmẹ nya ịlọmwụ ọọ tịtọ kem lẹ.

³Ang onyobyi ọhọhọ bala oyoyi kaa bajẹ, ihi ọlala-á myị, ẹpẹpẹ ye iwe ku.

⁴Ẹla ọlọnụ nya ọngịnyị ri ụjẹ-ẹmwụ, ẹmwụ nya ẹla ọjẹjẹ lala ọ̀bá ọlẹ kọ juwa mwụ.

⁵Ọ́ há nyọka chẹkpẹ ju ọngọ la abyị mwọọgịlẹ ya eje tu ọngọ da ẹlẹlẹhẹ-ka lẹ ka.

⁶Ẹla oyaya nya oluchi kaa ju ọmwụ nya arụ, ọnụ nyamwụ wụrụ enyiri nyi ịlọmwụ.

⁷Ọnụ nya oluchi kpọọ kaka kpụ ịtẹbyị, ẹla oyaya nyamwụ ri ụnya wu ịlọmwụ.

⁸Ụmwọnụ-ẹla chakpa kpụ ịpyọ lowowo, ahị ye mile kụrọnyịị lala ang oriri ọlịpyọ.

⁹Ọlụchụ-atịra-á datị da hi ọngọ bịrị ang ịtọ bịrị-ị̀ wẹẹ ka.

¹⁰Ẹnyị nya Amkpaa ri ube ọnyọọngịrị ọlẹ ká ọlabwẹla ọnyịịla kaa rụnyẹ ka nyọka kpa ịlọmwụ be.

¹¹Ọlụdụ me kpá ụdụ nyamwụ nyị chẹwụ kọọ lala ugulọ ọnyọọngịrị ọdagaga ju epweji ọlẹ kọ ka tụrụ myị ka.

¹²Ọbọọchẹ ohihi à kpụ ọmwụ nya ayịreji lẹ, ọngịnyị-ị̀ kpa ịlọmwụ keji ene kịị jwọọ ihi.

¹³Ọngọ wẹ ẹla lowo ọnụ-ẹla ene ka aalẹ, ẹla uchi bala ẹla oloyoyi ọ họ lẹ.

¹⁴Olegu nya ọngịnyị ka kpọọ cheri hị ẹ-ẹpwụ nya ẹdụrụ ọlịnyịrọ myị, ọ́ tị ri olegu kọ jụ ẹdụrụ, oowo tị́ ka kpọọ cheri hị myị?

¹⁵Ọngọ jẹ ẹla kaa tịtọ nya ang ọjẹjẹ, juwa gbarụ pyooo nyọka jẹ ang.

¹⁶Ẹnmẹ o-hu gahị kaa wụrụ ụgbẹyị da ha ọngịnyị, ọ du ká ka jẹ pwụ ẹga nya angịtụka myị.

¹⁷Ọngọ tịrọnụ ẹla jene kaa me ọngọ ri oku gbee ká ọngọ bá ẹla tọọ ka wẹ kaka tọọ ịtọ-ẹla.

¹⁸Iwo ọdada kaa chị arụ ọrụrụ eku, ọ ka chị ẹla nya angị bá ẹla ta awụlẹ eji myị.

¹⁹Á da ọọnang ụbwọ, ọ ka chẹwụ keng lala ugulọ ọdagaga ju epweji, arụ ọrụrụ tị ka du kị ka tụ ụgbẹyị nyaa kung.

²⁰Ẹla ọlọnụ nya ọngịnyị kaa kpọọ ọkịlẹtụ nyii, ẹla ọnyịịla ọlẹ kọ ya kaa wọọ ẹpwụ.

²¹Ẹlẹlẹ wụrụ igu nwụ ọngịnyị, ọ tịị hị ọngịnyị, ọngọ kaa ya ẹla lụmẹ ka yọọ hwọọ ri.

²²Ọngọ ye ahụ yē, ye ang ọnyịịla, ọnahị ọwẹ bwu ẹga nya Amkpaa.

²³Okpehika kaa bịlẹ-bịlẹ, ọlụdụ tị kaa wẹ ẹla pwaapwaa.

²⁴Aligu ịhyẹ ri igu ba ọ-ọnụ, aligu ịhyẹ tị há awụlẹ gụ aanịna wẹẹ.