Read idege Etu 19 Bible Online

Etu 19 - idege bible

Etu 19

¹Ọ há nyọka ri ọlẹbyahị ọ-chịla o-hu ọkịlẹtụ ha, gụ ọ-ka ri oluchi ọlọnọọkịla.

²Ẹla ọ-hụ́ ọngịnyị koko, kọ tị jẹ ẹla juwa ka-á há koo, ọngọ chị agaga nya ẹla lụmẹ kaa hwahị ụgbẹyị.

³Uchi ọchịchị nya ọngịnyị à kpọọ kaka ju ka ẹpwụ nya ụ́wọm lẹ, ọ tị juwa kpụ Amkpaa abyị tu ịmịmẹ.

⁴Á kpụ ụdụ, aligu nyang ka ju iru, ẹbyahị tị du ká aligu nya ọngịnyị-ị̀ nyẹẹkpẹ dọọ.

⁵Olibeenu ọnọọkịla-á ka be akama ọyẹyẹ ka, ebe ka ba ọlọnọọkịla pyii.

⁶Ọng myị ọng kaa tịtọ ká ẹla nyamwụ ka há ọngọtụka, ọng myị ọng kaa tịtọ nyọka rigu ta ọlọnahị.

⁷Angị ri aanịna nya ọlẹbyahị ri juwa bọọ ẹtẹ, ịnya aligu nyamwụ à tịpyọ ta gụ wẹẹ lẹ. Ọ maga lọmama kọ ka wụrwaa ba ịlọmwụ, ị́ tị chẹhị gee ka.

⁸Ọngọ ye ẹla ọjẹjẹ họ ịlọmwụ há ịlọmwụ, ọngọ kpa ang ọjẹjẹ nyamwụ kẹmkẹm ka kịlahị.

⁹Olibeenu ọnọọkịla-á ka be akama ọyẹyẹ ka, ọlọnọọkịla ka ta ayịreji.

¹⁰Ọ́ pwoku ká oluchi ka hụhụ ẹ-ẹpwụ nya ụdụ ka, ọ́ pwoku ká ọnyọhị ka ri olegbeju nya adịrahụ ka.

¹¹Ọngọ jẹ ẹla kaa wu agbama nyamwụ kpa, abwọ ọ-yẹ hi ẹla ri ihi ọtụka.

¹²Agbama nya adịrahụ lala arụ ọwawa nya ugẹbẹ, ọnahị nyamwụ tị lala amwụ ọlẹ kọ kaa kpụ amẹ.

¹³Ọnyị oluchi ka kpa ayịreji ọtata kịla adamwụ myị, ahụ ọlarụ lala ụtẹ nya enyi ọ-chị teteete.

¹⁴Ọngịnyị kaa ri ugu nya ẹpwa bala ụdụ bwu ẹga nya adamwụ anyị, Amkpaa ụbwọọmwụ à tị kaa ya ahụ ọ-jẹ ẹla ha ọngịnyị lẹ.

¹⁵Ụchụ-atịra kaa nọ ọngịnyị une pyịịị, ọngọtụbwọ ka gbu imyi.

¹⁶Ọngọ kpa ehile nya Ohe Oluhye gbe ọhịhị nya ịlọmwụ, angị ya ụrụ nyaa ajị ka gbu.

¹⁷Ọngọ ya ang ga ha ọlẹbyahị aalẹ, ọ ya ang kpịla Amkpaa, Amkpaa ka nwọọ uri nya ang ọnyịịla ọlẹ kọ họ.

¹⁸Aa nwụ̀ anyị nyang rịrị lahịgboo mẹ. Á yaa chịng aalẹ, à daa ụbwọ nya ayịreji lẹ!

¹⁹Ọlagbama ọtụka ka ye uri nya agbama nyamwụ, á gbọọ gba kpehe hi akama ụka ọhẹ, ọ ka myịmyị-ị̀ chabwọ ju ka ẹpwụ nyamwụ ụka ọkịla.

²⁰Ke ụrụ wo ọmẹjẹ, ká ye myị, chajị ká ka jẹ ẹla ẹnẹhẹ mẹ.

²¹Ọngịnyị ka me irya nya ang lụmẹ-lụmẹ myị, ọlẹ kọ ri irya nya Amkpaa à tị ka ri ịnyịlẹhị lẹ.

²²Ọháha-à ri ang ọlẹ ká angịnyị tịtọ u-uhye nya ọngịnyị lẹ, ọlẹbyahị oriri hagụ ọ-ka ri ọlọnọọkịla.

²³Ihi o-ju Amkpaa ju kaa ya ọhịhị ha ọngịnyị, ọọwa họ ká ọngịnyị hụ lokpunyi hi ang onyobyi.

²⁴Ọlụchụ-atịra-á kpa ụbwọ ka ẹpwụ nya ẹja, ọ-gbọọ kpehe ya ang ju ịlọmwụ ka ọnụ ri akama.

²⁵Á nyi ọngọ hi ahị, ọngọ jẹ ẹla gbuu-ka kaa yẹ kpa jẹ ẹla, á yalibyi la ọngọ jẹ ẹla, ọ ka jẹ ang.

²⁶Ọngọ kpa adamwụ nmaanmaa nya abwẹga lee o-ku ịnamwụ rụ aalẹ, ọ ri ọnyị ọ-kpa oyoyi bala ẹpẹpẹ wẹ ẹpwa.

²⁷Ọnyị nyam ee, á hịnyọ lang ọjẹjẹ owowo aalẹ, à juwa hwahị hi ang ịlẹ ká jẹ ene-ene lẹ.

²⁸Olibeenu ọnọọkịla yẹhị da eje ọ-chị kpakpa bwee, ang onyobyi ọhọhọ la angịnyị inyibyi gẹnẹ-gẹnẹ.

²⁹Eje owuwu godayị gbe angịlẹ kị ya ẹla onyobyi, ẹkpẹ nya aluchi tị da gbe enyiri.