Read idege Etu 2 Bible Online

Etu 2 - idege bible

Etu 2

¹Ọnyị nyam ee, jẹ ang ọlẹ kam wẹẹ mẹjẹng, ā deeri la ala ịlẹ kam wẹẹ ya jeng koo.

²Ya ụrụ nọ ha ẹla ọjẹjẹ ká maga nyọka jẹ ang hịlẹ-hịlẹ.

³À tị́ jẹ lẹ, á bịlẹ ang ọjẹjẹ, ká teleko nya ọ-jẹ myị̀myị,

⁴juwa pịlahị nyamwụ kekeeke lala ịnyaa pịlahị nya okpoko onyoowuru, ká tịtọ nyamwụ jaabwọ kịị tịtọ nya ōgbè aalẹ,

⁵à ka jẹ ang ọlẹ ká uhi nya Ohe Oluhye ojuju ri, à ka jẹ ẹla o-bwu ẹga nya Ohe Oluhye.

⁶Amkpaa-à kaa ya ẹla ọjẹjẹ ha ọngịnyị lẹ, ẹga nyamwụ ang ọjẹjẹ bala ẹla ọ-jẹ kpakpa-à kaa bwu lẹ.

⁷Ọ kaa tụ ụdụ nya ẹla ọjẹjẹ ha alabwẹla ọnyịịla, ọọ chẹwụ ke angị la kpẹẹkpẹẹ.

⁸Ọ kaa gbe angị kaa họ ẹla ọkpakpa ẹ-ẹga nya angịkịla, bala ọ-chẹwụ ke angịnyị ịkpẹẹkpẹẹ nyamwụ.

⁹Bwula ẹla ọjẹjẹ, à ka jẹ ang ọlẹ kọ la kpakpa bala ohiigu bala opwoku, à ka jẹ ụgbẹyị ọnyịịla ọlẹ ká ka bwu ụka wuu.

¹⁰Ẹla ọjẹjẹ ka ji ẹpwụ hang, ang ọjẹjẹ ka họ ká ka chị ọkẹkẹnị.

¹¹Irya ọnyịịla ka chẹwụ keng, ọ-jẹ myị̀myị ka ya okpunyi hang.

¹²Ọ ka kpang cheji ba ụgbẹyị onyobyi, bala angị ju ụchị-ọnụ

¹³ịlẹ kị nyẹẹkpẹ da ụgbẹyị ọnyịịla kaka la ọhịhị ọlẹpwụ nya ukpowu nya ọhọbịrị.

¹⁴Ang onyobyi ọhọhọ kaa kpụ angịịwa ịpyọ, ịị chị ọkẹkẹnị ụka ká ang onyobyi-í pyị ang ịkịla anyoko.

¹⁵Ẹdịyẹ nyaa-á la kpụrụrụ ka, ẹla nyaa-á ju ọdahịhile ka.

¹⁶À kpa ịlọng be hi ọnyang ọlụchị ọlẹ kọ ka pịrịng ju lịnụ ịpyaka-pyaka nyamwụ.

¹⁷Ọnyang ọọwa ri ọngọlẹ kọ chata ri ẹ-ẹga nya ọrụmwụ, nyẹẹkpẹ da iro ọlẹ kọ nwa i-ijata nya Ohe Oluhye.

¹⁸À tị́ jẹ lẹ, á ba ọnyang ọlịnyị ka ẹpwa aalẹ, igu ā wẹẹ rụnyẹ ba lẹ, ụgbẹyị nyamwụ da ka ejegu.

¹⁹Ọngọhẹ-ẹ́ bọọ ka ẹpwa, ọ nyà myị ẹnẹhẹ lẹka, ọ́ ka jẹ-ẹ̀ tụ ụgbẹyị nya ọhịhị da nyà myị kaka.

²⁰Ọnyị nyam ee, aa gbịla ọhịhị nya angịnyị ịnyịịla, ká dịrẹ ọgụ-ẹpẹtẹ nya alabwẹla ọnyịịla mẹ.

²¹Alabwẹla ịnyịịla-à kụ ọpyị ọlẹ lẹ, ịwa kị la ọkịlẹtụ ọnyịịla-à ka la ọpyị ọlẹ lẹ.

²²Ohe Oluhye ka gu angị inyibyi kpoo bwu ọpyị ọlẹ lala ogbe gu ọnyị ụnụ, ọ ka hwaa latẹ-latẹ jaabwọ kịị hu apwụ bala amẹ.