Read idege Etu 20 Bible Online

Etu 20 - idege bible

Etu 20

¹Ere ọ-nwa kpụ ere kaa chị ọngịnyị uchi, ọọ ju ọmwụ nya arụ, oluchi ere à kaa kpa kaka hwahị lẹ.

²Adịrahụ ọlagbama lala ugẹbẹ ọlẹ kọ juwa warụ, ọngọ du agbama jwọọ ya ọhịhị nyamwụ ga ha igu.

³Ọngọ ri olihi kaa cheji ba arụ ọrụrụ, oluchi à kaa tụ arụ ọrụrụ ka lẹ.

⁴Ọlụchụ-atịra-áà wu ẹrụ nyamwụ lụka opwoku ka, ọ́ tị̀tị̀ ka ye ịngịngịhyẹ wụ bwu ẹrụ nyamwụ ka.

⁵Irya ọnyịịla ọlọkịlẹtụ nya ọngịnyị ka ji kpori-kpori lala ụjẹ-ẹmwụ myị, ọngọ jẹ ẹla tị ka jẹ-ẹ̀ gba irya ọọwa kpehe myị.

⁶Iru nya angịnyị ka wa ịlaa nya angị la kpẹẹkpẹẹ myị, oowo tị́ ka ye ọngọ kpẹẹkpẹẹ nya ịlẹhị-ị̀?

⁷Olabwẹla ọnyịịla ka la ọhịhị ọnyịịla, anyị nyamwụ ịlẹ kị gbịlọọ ka pyẹ̀ẹẹ.

⁸Adịrahụ hụhụ ẹ-ẹchị nyamwụ juwa ọnụ leje, ọ jẹ ụbẹẹtụ nya ẹla ịlẹ kị há-ka datị hi ịlẹ kị há.

⁹Oowo kpa-à tị́ ka ya myị lẹẹ yẹkẹẹ, “Ọkịlẹtụ nyam la charị-charị, ḿ jẹ ang onyobyi ọhẹ-lọhẹ kaka-à”?

¹⁰Ang ị-kpa me ang nya ijẹẹhị wụ Amkpaa ẹjẹ.

¹¹Onjwo ri onjwo, ọ mẹ ịlọmwụ jẹ bwula ọhọhọ nyamwụ, ị kaa jọọ ó-ri ká abwẹla nyamwụ la charị-charị bala ọ-la kpakpa.

¹²Ụrụ ọ-kpa wo ẹla bala ẹhị ọ-kpa yọyị, Amkpaa-à haa wuu lẹ.

¹³Une ọnọnọ-ọ́ háng lụmẹ aalẹ, à ka yẹ ri ọlẹbyahị tịpyọ lẹẹ.

¹⁴Ọngọ ra ang kpọnụ tà ihi ịnya yẹkẹẹ, “Ang ọlẹ lịnya kpoye, ọ lịnya kpoye.” Ọ́ tị rọọ kpá gu ẹkpẹ da, ọ da ịkwẹ churumḿ: ihi ọwa nyaa ye ra hiigu alẹ lẹẹ-ẹ́!

¹⁵Okpoko ịgọm ji, ajwọ ịnyịịla-ịnyịịla ji kpá bẹẹ, ẹla-ọnụ nya ọngọ jẹ ẹla tị ju apyobwuna gwaa wuu.

¹⁶Ye awụrụ nya ọngọ yụbwọ nya ọngga oluri kpa ụ-ụwa, ọngọ godayị wọnụ nya ọngga oluri ju ā ya ịngịhyẹ neeji hang ene mẹẹ.

¹⁷Ang ọlẹ ká ọngịnyị la bwula ịbịrịbwọ ka la ọngọọwa ịpyọ kpá lala inwa, ọ́ tị nọ chẹẹ ọ ka mwọọ angịrị lala ịpyị nyaa chụ ju ka ọnụ.

¹⁸Obyi ọlẹ ká ọngịnyị me kaa kịlahị bwula irya ọnyịịla ọlẹ kị jwọọ. Ā hu ang ka ẹwụ la o-wo irya nya angịkịla ene ka lẹ ka.

¹⁹Ọngọlẹ ká ẹla-á gọọ amwụ loyaya-ka ri ọngọ ye ẹla ya, aa cheji ba alịnụmeémè.

²⁰Ọngọ gọlọ ju adamwụ lee ịnamwụ aalẹ, ọhịhị nya ọngọọwa ka myị hi ẹnụ ta uhye lala otinika ọlẹ kọọ myị̀ ẹ-ẹpwụ nya ukpowu.

²¹Ụdụ ọkpụkpụ la ọ-yẹ akama nyamwụ ene ka á kaa ju apyobwuna ha ọngịnyị ụka ohyẹẹkpẹ ka.

²²Ā họ kwiwa nya ang onyobyi ọlẹ ẹla kị họng ka. Dahịhile Amkpaa mẹ, ọ ka họ jaabwọ kọ pwoku.

²³Ang ọ-kpa me ang da ọngịnyị lụgbaa wụ Amkpaa ẹjẹ, ọchanjẹ ọ-jẹ ọ-kpa me ang ha ọngịnyị-ị́ họ́ọ kpong-kpong ka.

²⁴Amkpaa-à hunọ ẹga kahị wẹẹ jẹ yahị da ka lẹ, Ọngọngọhẹ-ẹ́ ka jẹ-ẹ̀ jẹ ẹga ká ọhịhị nyamwụ juwa kpọọ yahị da kà ka.

²⁵Ā da ụnya wu ịlọng bwula ọ-myị ọnụ nya ang ha Ohe Oluhye chịbala ka, à ka chị ijẹma ị-ịlahị myị.

²⁶Adịrahụ ọ-jẹ ẹla kaa gba ọngọ họ ang onyobyi dodehe, yọọ akama la o-jujwo nyamwụ ka.

²⁷Amkpaa yẹ irya ọlẹpwụ nya ọngịnyị ehe kpete-kpete, jọọ wuu dọọ ewa-ewa.

²⁸Ọháha bala ọkpẹẹkpẹẹ ọlala-à kaa gbe adịrahụ lẹ, bwula ọháha ẹchị-adịrahụ kaa bọọ ọ-ọmwụ.

²⁹Ụmụmẹ ọlala nya alụjụ à ri ọngịrị nyaa lẹ, ụhị ọháha nya angịgbahị à tị ri inyi inyiiwuru nyaa lẹ.

³⁰Enyiri nya ịlẹhị kaa hu ọngịnyị abwọ hi ang onyobyi ọhọhọ, ọngịnyị ọ-nwụ̀ rịrị ka hụ́ ọkịlẹtụ nyamwụ cheri-cheri.