Read idege Etu 21 Bible Online

Etu 21 - idege bible

Etu 21

¹Ọkịlẹtụ nya adịrahụ lala ọ̀bá nya enyi ụ-ụbwọ nya Amkpaa, ọ kaa gwọọ ịgịlẹ yahị da ka ẹga myị ẹga kọ họọ.

²Ọngịnyị ka me kpá ang ịnyịịla ọwa nyaa kaa họ lẹ, Amkpaa-à tịị wụla irya ọlẹ ká ọngọọwa kaa me lẹ.

³Abwẹla ọnyịịla bala eje ọkpakpa ọchịchị há Amkpaa gụ iya ọkịlaakịla họọ.

⁴Angịnyị inyibyi ri alọbọọchẹ bala alahị ohihi, ọhọbịrị à myị̀ ọhịhị nyaa wuu lẹ.

⁵Ọngọ kụ irya yẹẹyẹẹ ju ang ọlẹ kọ ka họ kaa ye apyobwuna, ọngọ chị agaga jụ ichwiwa pyáa kaa kpụ ẹbyahị.

⁶Ụdụ ọlẹ ká ọngịnyị kpụ bwula ịbịrịbwọ ká gwọọ myị lala ụlaa, ụnya nya igu ọ ri lẹ.

⁷Alọkwọ ka ta ayịreji bwula ụkụrwọ nya abwẹga nya ịlaa, kị myị họ ang ọlẹ kọ chịla ka.

⁸Ụgbẹyị nya ọngọ la abyị la bíri-bìri, ọhọhọ nya ọngọ da ẹlẹlẹhẹ-ka tị la kpakpa.

⁹Ọ-kụ ụbwọng nwee ọ-ọtụpịrịhyo nya uhye nya ẹpwang hagụ ọ-ka kụ ẹpwa ta ahụ ọlarụ.

¹⁰Alọkwọ kaa tịtọ nyọka họ ang onyobyi pyịyọọ, ị dọmwụ kaa jujwo nya angịnyị aanaa ka.

¹¹Á nyi ọngọ hi ahị, ọngọ jẹ ẹla gbuu-ka kaa yẹ kpa jẹ ẹla, á mẹ ang jẹ ọngọ jẹ ẹla, ọ ka jẹ ang.

¹²Ohe Oluhye Ọlabwẹla Ọnyịịla jẹ ẹla myị ẹla ọlẹpwa nya ọlọkwọ, ọ ka kpa ọlọkwọ kaka ju ka ẹpwụ nya ayịreji.

¹³Á ya arụ kpụ ịla hi ida ojeje nya ọlẹbyahị, ẹnụ ká ida ojeje nyang-ńg pwụ ọngọhẹ-ẹ́ ka myị-ị̀ dọnụ wẹng ka.

¹⁴Ang ọgahị ịbaa-ịbaa ka kpụ agbama ba, ang ochikiriju ọlịbaa kaa nyiri ikẹjẹ-awụrụ.

¹⁵Ẹla ọkpakpa ọhọhọ kaa ya ọkẹkẹnị ha ọngịnyị ọnyịịla, ọ tịị chị uhi ju angịnyị inyibyi.

¹⁶Ọngọ hwahị hi ẹla ọjẹjẹ ka yẹ ịlọmwụ e-ejegu.

¹⁷Ọngọlẹ ká ang-ịpyọnụ há lụmẹ ka yẹ ẹbyahị, ọngọlẹ ká ere bala ida ịnyịịla-á há lụmẹ ka ri olekuru.

¹⁸Ị ya ọngọ onyobyi da ekejọyị wọnụ nya ọngịnyị ọnyịịla ju, ọngọ la kpẹẹkpẹẹ ka kà ye akama nya ọngọ ọkpẹẹkpẹẹ yẹ.

¹⁹Á kpa ẹpwa nyang ka nọ u-ugbileji kem nyang, ọ hagụ ọ-ka kụ ta ahụ ọlarụ ọ-mwẹla ya.

²⁰Ọngọ jẹ ẹla kụ ẹpwụ nya ang-ụdụ ịlẹ kọ ju ụjị ha ịlọmwụ, oluchi tị go ịlọmwụ ang ri wuu hi ụbwụbwọ.

²¹Ọngọ họ ọnahị bala ang ọnyịịla ka hị tata, ọ ka la ihi bala o-ye ọnahị bwu ẹga nya angịkịla.

²²Ọngọ jẹ ẹla ka be epweji ọlẹ ká igburujwo chị ajẹ ju myị, ọ tụrụ egwalọ ịnyịịngịrị ịlẹ kị dahịhile mịla eji.

²³Ọngọ gbe ọnụ nyamwụ kpa ịlọmwụ cheji ba akama.

²⁴Ọlọbọọchẹ ri ọngọ hi ahị bala ọ-chị ẹhịịchịrị, ọọ hu ịlọmwụ gẹdẹẹ bala ọ-há ịlọmwụ kpoye nya oyi.

²⁵Ang ọ-ma ọlụchụ-atịra ma ka kpụ igu họọ, chajị ọ jụ ịhyẹ kịla ọ-ka họ ụkụrwọ kịla.

²⁶Ọọ chẹhị pyẹ̀ẹẹ nya ang ọ-họ́ọ há ụka wuu, ọlabwẹla ọnyịịla tị kaa ya ang gahị pyẹ ụbwọ maa.

²⁷Iya ọkịlaakịla nya ọngịnyị onyobyi kaa wụ Amkpaa ẹjẹ, ọgụgụ ri ụka kọ kpa iya ọọwa kele lirya onyobyi.

²⁸Olibeenu ọnọọkịla ka ta ayịreji, ẹla nya ọngọ kaa kụ irya ju ẹla-à la kpakpa lẹ.

²⁹Ọngịnyị onyobyi kaa tụ ahị bwọbwọ nya ihwirihwa, ọlabwẹla ọnyịịla tị kaa kụ irya ju ụgbẹyị nya ọhịhị nyamwụ.

³⁰Ọngịnyị ehe-é chị ẹla ọjẹjẹ bala irya omeme tụ obyi omeme nyamwụ ọchị wu abwọ myị abwọ wẹwẹ, ọ́ ka kụrụ Amkpaa myị ka.

³¹À ka ju ụnyịrẹ agidi nọ gbe ẹwụ ọdada myị, Amkpaa-à tị kaa ya ọkụrụ-kụrụ ha ọngịnyị lẹ.