Read idege Etu 22 Bible Online

Etu 22 - idege bible

Etu 22

¹Ẹnyị ọnyịịla hagụ ụdụ, ọ-ka wang nya ọngịnyị ọnyịịla hagụ okpoko onyoowuru lee okpoko ịgọm.

²Ọlụdụ bala ọlẹbyahị datị da hi awụlẹ ale, Amkpaa-à haa wuu lawụlẹ-awụlẹ lẹ.

³Ọngọ jẹ ẹla-á yẹ akama kọ juwa wẹ, ọọ myẹbee hyọọ, oluchi tị ka yahị dọọ pwururu kele, ọ tịị chị ijẹma ụka ohyẹẹkpẹ.

⁴Ọngọ kpa ịlọmwụ keji, juwa ju ihi nya Amkpaa kaa ye ụdụ ọkpụkpụ bala ihi ọlala bala ọhịhị onyudiyo.

⁵Ụgbẹyị nya ọngịnyị onyobyi ju anyiri bala ejwo kịrịnyọọ, ọngọ gbe ịlọmwụ-ụ́ ka dịrẹ ụgbẹyị ọọwa ka.

⁶Mẹjẹ anjwo jaabwọ kị ka bwu la ọhịhị opwoku, ụka kị nwànwa ri angịgbahị kpá, ị ka juwa dịrẹ ụgbẹyị nya ọhịhị ọọwa ịnyịnyị.

⁷Ọlụdụ ri olegbeju nya ọlẹbyahị, ọngọ kpịla ang tịtị ri ọnyọhị nya ọngọ ya ang kpịlọọ.

⁸Ọngọ ya ajẹ nya ọkwọ ọlala hụ ka wụ akama bwu ẹrụ nyamwụ, ụhị ọlẹ kọọ yẹ angịkịla-à ka cheju lẹlẹ.

⁹Ọlọnahị ka pyẹ̀ẹẹ, chajị ọ kaa ya ang oriri ha alẹbyahị.

¹⁰Ku ọngọ kpa angịnyị họ dodehe mẹ, arụ ọrụrụ bala ido ododo ka myị.

¹¹Á la charị-charị ọ-ọkịlẹtụ, ká ẹla ọlọnụ nyang á lịma, adịrahụ ka ri oligu nyang.

¹²Amkpaa kaa kpahị ju ọngọ jẹ ẹla, ọọ da obyi omeme nya ọlọnọọkịla ẹkpa chọpyị.

¹³Ọlụchụ-atịra hụhụ kem ye ọnụ ya yẹkẹẹ, “Ugẹbẹ juwa o-ohwodehe! Aam à ka ka ẹrụ lugẹbẹ-ẹ̀ wu ri koo!”

¹⁴Ẹla ọlọnụ nya ọnyang ọlụya la kpori-kpori lala ụjẹ, angịlẹ ká Amkpaa-á wụ ẹjẹ ta ka chabwọ kpọọ.

¹⁵Uchi myị̀ ẹpwụ nya onjwo kpọrịkọọ, ẹla ọmẹjẹ tị ka kwọọ kpehe hyọọ.

¹⁶Ọngọ họ ọlẹbyahị ri chajị nyọka kpụ ụdụ, lee o-juwa go ang-ahị ga alụdụ aalẹ, ọngọọwa lịlọmwụ ka ri ọlẹbyahị ahyaahị.

¹⁷Ke ụrụ ká wo ẹla ọmẹjẹ nya ọngọ jẹ ẹla. Kụ irya rige-rige ju ẹla ọmẹjẹ nyam.

¹⁸Ọ ka háng há ó-ri ká kpịtịya nyaa, ká ka jẹ-ẹ̀ chwaa ya ụka wuu.

¹⁹Ajị ká ka dahịhile Amkpaa à du kam wẹẹ mẹ ala ịwẹ jẹng lẹẹlẹẹ lẹ.

²⁰Ala iwo ịta gbẹgbịlẹ m̄ da hang lẹ, ala ịịwa ka jung irya bala ọ-mẹ ẹla jẹng.

²¹Ị ka mẹ ẹla nya ịlẹhị jẹng, chajị ká ka jẹ-ẹ̀ ye ẹla opwoku kpa ụ-ụbwọ ụka kị dung ẹrụ kaka tịtọ ẹla wo.

²²Ā họ ọlẹbyahị ri tu ẹbyahị ọyẹyẹ nyamwụ koo, ā tị yẹ okpehika ba u-ube oleje ka.

²³Amkpaa ka leje chẹkpẹ jwaa, á taa pyịpyị, ọ tịtị ka tụng pyịpyị.

²⁴Ā ri igu ta ọlagbama onyobyi lee ọngọ kaa ju agbama hyaa koo.

²⁵Á họ abwẹla gbịlaa lẹ, á ka yẹda myị kaka.

²⁶Ā myị ọnụ nyọka yẹ ụbwọ nya oluri, hu ịlọng dayị chajị nya uri ọlẹ ká ọngọkịla kpa koo.

²⁷Á ye ang nwụ uri ọọwa ka, ó-ri ịbẹẹdị nyang ri, ị ka hwọọ hing.

²⁸Ā hu ang o-ju oyi nya ọpyị ẹjẹẹ oligbalẹ ọlẹ ká adang igogo anyị ya ju eji hi ẹga ọọwa koo.

²⁹À tị́ yẹ ọngọ jẹ ụkụrwọ nyamwụ yẹẹyẹẹ, ọngọọwa-á ka myị ẹrụ ha ẹmbẹ nya angịnyị koo, ịdịrịhụ ọ ka myị ẹrụ ha lẹ.