Read idege Etu 23 Bible Online

Etu 23 - idege bible

Etu 23

¹Ụka ká hụhụ nyọka ri ang ta olegbeju, aa me irya dụmwọọ ju ang ọlẹ kị ya rịrị ị-ịlahị nyang.

²Á ri orim̀ tụbwọ aalẹ, aa wu ịlọng kpa odu.

³Ā hụ́ piri-piri ju ang oriri ọnyịịla nyamwụ ọwẹ koo, ọhẹka ọ ka juwa mang yẹ myị.

⁴Ā nwụ ịlọng ju aga ọmama nyọka kpụ ụdụ koo, kpa ẹla ọjẹjẹ wu ịlọng kpa.

⁵Ụdụ kaa myị yịra-yịra ẹ-ẹpwụ nya ẹhị ọ-mwụbìri lala ịnyaa ju achwọ kpa hụ̀ peleng-ng jaabwọ ká idu ka hụ̀.

⁶Ā ri ang ta ọlụkpẹ koo, ā hụ́ ju ang oriri ịlịpyọ nyamwụ koo.

⁷À tị́ jẹ lẹ, ọ ka bying yẹkẹẹ, “Ri myịmyị mẹ, ri myịmyị mẹ!” Ọnụ ọ tị wẹẹ tụng lẹ, ẹ-ẹpwụ nya irya nyamwụ ọ lalẹẹ kụ ịnya nya ang ọlẹ ká wẹẹ ri.

⁸Ẹpwụ ka gung tuuu aa kịkọ lang ọlẹ ká ri, obe nya ẹpwụ ọlẹ ká ji wuu ka ri ododu.

⁹Ā kpa ịhụ ọdada nyang bịrị ju oluchi ka, ọ ka tụ́ irya ọnyịịla ọlẹ ká jwọọ-ọ̀ wẹ ịmyị-ọnụ.

¹⁰Ā hu ang o-ju oyi ọpyị ẹjẹẹ oligbalẹ hi ẹga ọọwa ka, ā nu anyị-egu ọpyị la koo.

¹¹Ohe Oluhye ọlọngịrị à ri ọngọ ya ẹla chaa da lẹ, ọ ka ya eje nya ẹla nyaa ọwẹ tung.

¹²Kpa irya nyang nọ nyọka jẹ ẹla ọmẹjẹ, ká ya ụrụ nọ nyọka jẹ ang.

¹³Ā hịnyọ la ọ-nwụ onjwo rịrị koo, enyiri-í ka nwọọ ka.

¹⁴Á mẹ ẹla jọọ lụgboji, ọọwa ka gbọọ egbeju kpehe hi ayịreji ọtata.

¹⁵Ọnyị nyam ee, ó-ri ká jẹ ẹla, m̀ ka chị ọkẹkẹnị.

¹⁶Ugbodu ka kpụm nyii ụka ká ya ẹla opwoku.

¹⁷Ā yẹ ijiiji nya alọhọbịrị koo, aa kpa ọhịhị nyang wuu ju ihi nya Amkpaa mẹ.

¹⁸Á họ ịnyị aalẹ, ijuju nyang ka há, ahị ọdahile nyang-ńg ka ri ododu ka.

¹⁹Ọnyị nyam ee, wo mẹ, aa jẹ ẹla, ká kpa irya nyang dịrẹ ụgbẹyị ọnyịịla.

²⁰Ā ji ogu ta angị kaa nwa ere kpụ ere lee angị ri orim̀ koo.

²¹Angị nwa ere lụmẹ bala angị ri orim̀ ịwẹ juwa ka yẹ ẹbyahị, une ọ-nọ lụmẹ kaa kpa ọngịnyị kaka duru achịpwụ.

²²Aa ke ụrụ ladang, ọwa-à kpang wẹ odehe lẹ, ịnang-ńg chị okwirichi, ā nyẹẹkpẹ dọọ koo.

²³Aa la ẹla nya ịlẹhị bala ẹla ọjẹjẹ bala ọmẹjẹ tụ ang ọjẹjẹ mẹ, ā tị tụ hyaa kokoo.

²⁴Adịda nya ọnyị ọnyịịla ka chị ọkẹkẹnị ọtụka-ọtụka, ọngọ ma ọnyị ọ-jẹ ẹla ka kọọ yaya.

²⁵Họ ká ịnang bala adang ā chị ọkẹkẹnị, họ ká ịnang ọ-mang-ma ā chị ụmwẹhụ.

²⁶Ọnyị nyam ee, kpẹhị chịng, chajị ká hịhị gbịla ụgbẹyị nya ọhịhị nyam.

²⁷Ọlakpara ri ụjẹ nya ụwọm, ọnyang ọlụchị ri ụjẹ opyee ọlẹ ká ka kpehe bwu myị ka.

²⁸Ọ kaa kụ ịnya gbe ọngịnyị lala ọlagbụrụ, du ká iru nya alẹng lụmẹ-lụmẹ-ẹ́ la kpẹẹkpẹẹ kaka.

²⁹Oowo inyiribyi à tị́ kpụ? Oowo à tị́ị họ hyuu? Oowo à tị́ị rwarụ bala ọ-ma uya-à? Oowo ịnyịrọ nyamwụ à tị́ pyẹ pyaapyaa tu ododu? Oowo tị́ị̀ ga ahị ịmịla?

³⁰Ọngọọwa ri ọngọ kaa chogbe dere, juwa ma ụma ọnyọnyọọnyị ọnụ yẹ.

³¹Ọ-tị̀lẹlẹẹlẹ nya ere ọwẹ ā pịrịng ju koo, ọ dachụ mini-mini ẹ-ẹpwụ nya ukoku, pwọ da ka ụ-ụkpụrọkọ dụmwọọ.

³²Ụka ohyẹẹkpẹ, ọ ka lang kpá lala ilo nyaa chịng, ọ ju ẹhwa lala ọgbịjị.

³³Ahị ka chịng iwoowila, ala inyibyi ka wẹpwụ nya irya nyang, à ka ya achị nya ala.

³⁴A ka lịlọng kpá lala ẹpwụ nya ihu ọtụka ahụ nyaa nune, lala ahụ nyaa ju uhye nya ịlayịịlọ.

³⁵A ka juwa ya alaaga yẹkẹẹ, “Ị wam egbiji, ị́ tị rim ẹla ka, ị nyim nyi, ḿ tị jẹjẹ kpong-kpong ka. Ụka ọyina m̄ tị́ ka chị ahị une kpá lẹẹ kam ka myịmyị-ị̀ nwa ere ọkịla mẹ?”