Read idege Etu 24 Bible Online

Etu 24 - idege bible

Etu 24

¹Ā yẹ ijiiji nya angịnyị inyibyi lee ọ-tịtọ nyọka ri oligu taa ka.

²Ẹla nya abwẹga onyobyi ịị me obyi lẹ, ọnụ nyaa kaa gu akama rịrị e-eji ụka wuu.

³Ẹla ọjẹjẹ ịị kpa nwụ ẹpwa lẹ, ang ọjẹjẹ à tị́ du ká ẹpwa ka godayị giri-giri lẹ.

⁴Bwula ang ọjẹjẹ ị kaa ya ang-ụdụ ịlahịchịng myị ẹpwụ nya ẹpwa ọọwa lẹ.

⁵Ọngọ jẹ ẹla lụmẹ gụ ọngọ la ọngịrị, ang ọjẹjẹ tị hagụ ọngịrị ọlala.

⁶Bwula obyi omeme yẹẹyẹẹ ọngịnyị à kaa hu ang nya ẹwụ lẹ, bwula irya ọmẹjẹ nya angịnyị lụmẹ-lụmẹ ọkụrụ-kụrụ à kaa ji lẹ.

⁷Ẹla ọjẹjẹ la gidogbo kịla oluchi kịla, ọ tị́ ka ye ẹla-ịyẹ ya ụka kị tụguru ẹ-ẹga nya ogirigba?

⁸Ọngọ kaa me obyi onyobyi ụka wuu, ri ọngọlẹ kị ka wụrụ ọlẹla.

⁹Irya imeme ọnyị myị ọnyị nya oluchi ri ọhọbịrị, ọngọ kpa angịkịla họ kaa wụ angịnyị ẹjẹ.

¹⁰Á kpụ ịbwọ ẹnụ nya akama aalẹ, ọngịrị nyang chakpa la pyịnyẹng.

¹¹Aa chị ọngọlẹ kị juwa wu kpa ka nwụ tu ịmịmẹ da, ā gbile ẹta dẹẹ kị kpaa kaka nwụ koo.

¹²Ọhẹka à ka ye ọnụ ya yẹkẹẹ, “Am-ḿ jẹ ang chajị nya ẹlẹwẹ koo.” Lẹ, Ohe Oluhye-é jẹ irya ọlọkịlẹtụ nyang ka-á? Ọ tị wẹẹ yẹng ụka wuu, ọ ka nwụng uri pwoku ọhọhọ nyang.

¹³Ọnyị nyam ee, aa nẹ ịnwa, chajị ịnwa hiigu, ọ-nyà teteete nyamwụ bwu ẹbẹ nya inwa ọwẹ ka lang ịpyọ yẹẹyẹẹ.

¹⁴Aa jẹ ịnyịnyị mẹ, ẹla ọjẹjẹ hiigu ha ugbodu okpukpuru, á la ẹla ọjẹjẹ lẹ aalẹ, ijuju nyang há lẹ. Ẹhị ọrịrịị-rịrị nyang-ńg ka ri ododu kaka.

¹⁵Ā kụ ịnya lala ọngịnyị onyobyi nyọka yi ọngịnyị ọnyịịla oyi koo. Ā be ang ene ju ka ẹpwa nyamwụ koo.

¹⁶À tị́ jẹ lẹ, ọngịnyị ọnyịịla-á keji kịla ụka ohu kụrụ iwo wẹwẹ, ọ ka wuleji myịmyị wẹẹ. akama tị ka kpa ongịnyị onyobyi nọnọ lọhụ-ọhẹ.

¹⁷Oluji nyang-ńg ju ka ẹpwụ nya akama, ọọwa-ā ri ọkẹkẹnị nyang koo, ọ́ chị ụchụụ chị, ugbodu ā kpụng nyii u-uhye nya ọọwa ka.

¹⁸Á họ ịnyị, Amkpaa ka jẹ, ọ ka wọọ ẹjẹ, ọ ka hịnyọ la ọ-yọọ akama.

¹⁹Ā nwụ ịlọng limahị u-uhye nya angịnyị inyibyi ka, ā yẹ ijiiji nyaa koo.

²⁰À tị́ jẹ lẹ, ijuju ọhẹ-ẹ́ ji ha ọngịnyị onyobyi ka, otinika nya ọlọkwọ tị ka mịrị tẹm-m.

²¹Ọnyị nyam ee, aa ju ihi nya Amkpaa bala adịrahụ mẹ. Ā ju ogu nya angị la egbeju-ọngịrị koo.

²²Akama onyobyi ka chị angị ịlịịwẹ ọgụ lụka ọmwaaa myị, ọngọhẹ-ẹ́ ka jẹ-ẹ̀ jẹ ụma nya akama ọlẹ ká Amkpaa lee adịrahụ ka kpa waa ka.

²³Ala ịlẹ ri ịlẹ ká ọngọ jẹ ẹla ya ịnyịnyị: Oku nya ẹchụ-ọma ọchịchị ẹ-ẹpwụ nya eje-é há koo.

²⁴Ọngọleje ọlẹ kọ byi ọngọ la abyị yẹkẹẹ, “Ahụ à ri oku lẹ” aalẹ, angịnyị ka gọlọ jwọọ, alẹpwụma datị-datị wuu ka gwọọ ọnụ.

²⁵Ọ tị ka há ha ọngọ ya eje tu ọngọ la abyị, ọngọọwa ka pyẹ̀ẹẹ.

²⁶Ọngọ wẹng ẹla kpụrụrụ aalẹ, ọngọọwa-à ri oligu ọlam lẹ.

²⁷Họ ụkụrwọ nyang olodehe kpá, ká ya ang-ẹrụ nyang wu kpá ene ká ka dọmwụ nya ẹpwa nyang ọnwụnwụ.

²⁸Ā họ ibeenu tụ ọngịnyị ọọnang pyịpyị ododu ka, ā me ọnọọkịla koo.

²⁹Ā yẹkẹẹ, “M̀ ka ya ang ọlẹ kọ ya me ang ham me họọ, lee m̀ ka họọ kwiwa ịnyịnyị!” koo. A ya ịnyị ka.

³⁰Ụka ọhẹ, m̀ chịpwụrụ bwu ọnụ-ẹrụ bala ẹrụ nya alakọnụ nya ọlụchụ-atịra oluchi.

³¹Àgaama myị biri ẹrụ nyamwụ, ụkọ tụ ẹga myị ẹga ku kịrịnyọọọ, ajwọ ịlẹ kị ya chị ugulọ dagaga jwaa tụrụ ju eji.

³²Ụka kam yẹ ẹlẹwẹ, m̀ kụ irya jwọọ chịng-ng, m̄ jẹ ang ọlẹ bwu ụwa lẹlẹ:

³³à nụwa juwa yẹkẹẹ, “M̄ nune pyịnyẹng, kam wu ịlọm jwẹjẹ mwụ ịnyọ chẹẹ wẹẹ mẹ.”

³⁴Á jẹ ka tụbwọ aalẹ, ẹbyahị ka wẹ bwung agaga lala ọlagbụrụ, uhi okwookwee ka kpụng ẹtẹ lala oloyi à be ẹpwa.