Read idege Etu 25 Bible Online

Etu 25 - idege bible

Etu 25

¹Ịlẹ ri etu ịkịla nya iSolomọn ịlẹ ká alegbeju ịtụkụ yi iHesekaya Adịrahụ da ju.

²Ịị mịla oja ha Ohe Oluhye chajị nya ang ịlẹ kọ tụ kpịbaa, ị tịị mịla oja ha adịrahụ chajị nya ang ịlẹ kọọ da wụlẹ.

³Oowo tị́ ka jẹ irya nya adịrahụ jẹ myị? Irya nyamwụ la uhye kombooo lala uhye-ọgba, ọ la myọ̀ọọ lala ụjẹ-ẹmwụ.

⁴Hị ịrị oluhye nya okpoko onyoowuru hụrụ mẹ aalẹ, ọlụdụwa ka jẹ-ẹ̀ ya hya ang ọlahịchịng lẹ.

⁵Gba angịnyị inyibyi hi ẹpwụ nya alụkụrwọ nya adịrahụ mẹ aalẹ, ọ ka kpẹhị rịrị ọpyị bwula ẹla ọ-họ kpakpa.

⁶Ā myẹ ịlọng gẹgẹẹgẹ ị-ịlahị nya adịrahụ ka, ā tị pwururuuru kaka hụ ẹ-ẹpwarịrị nya angịtụka koo.

⁷À tị́ jẹ lẹ, ọ-ka wụrụng bying ya ahụ nyị kẹwẹ wẹ ẹga ogede ọlẹ mẹ hagụ ọ-ka kpang keji a-ahị nya angịtụka. Ang ọlẹ ká ẹhị nyang yẹ,

⁸ā wụrụ ọngịnyị eje ahyaahị chajị nya ẹla ọọwa koo. Á họ ịnyị, à tị́ ka họ anyị ụka ohyẹẹkpẹ ó-ri ká ọngịnyị ọọnang ọọwa-á gbe ẹla jung ká eje-é tung?

⁹O-wo lawụlẹ-ka á ji ẹpwarịrị nyanụ, anụ yọọ ká myị ẹla ọọwa bala ọngịnyị ọọnang ọọwa, ā hu ẹla-ịbaa nya ọngọkịla ya ka.

¹⁰Ó-ri ịnyị ká angịkịla-á jẹng nya ọngọ ye ẹla ya lẹ, ẹnyị onyobyi nyang-ńg ka jẹ-ẹ̀ myị ẹnẹnẹhẹ kaka.

¹¹Ẹla oyaya ọlẹ kọ pwoku lala okpoko ịgọm ọlẹ kị ya wụlọ ịjang nya okpoko onyoowuru.

¹²Alibyi ọlẹ ká ọngọ jẹ ẹla ya lọngịnyị lala ọmapẹ nya okpoko ịgọm lee ịjang nya okpoko ịgọm.

¹³Ọngọ myị ẹrụ ọkpẹẹkpẹẹ họ ọkịlẹtụ kpụ ayịbamwụ nyii jaabwọ ká enyi onyiri kaa kpụ ịnyịrọ nyii lụka nya ọchịpwuu.

¹⁴Ọngọ myị ọnụ nya ang-ahị, kọ tị hu ang ọọwa ha ka aalẹ, ọngọọwa lala egbamwụ bala ịgbachịwụ ịlẹ kịị kpa enyi ododo warị ka.

¹⁵Á bọhụ-eji, à ka jẹ-ẹ̀ tụ olegbeju tutu ka họ ang myị, ẹlẹlẹ ọmịlẹ-mịlẹ ọhyọọ à kaa kpa nọ ẹpwa ba ọpyị lẹ.

¹⁶Inwa-á hang há abịlaala, aa nẹ meme labwọ, ọ-nẹ kaka kpoye nya oyi du ká ka kịkọ.

¹⁷Ā ka ẹpwa nya oloyi-ẹpwa nyang hyaahyaa ka, ẹla nyang-ńg chọọ aga pwẹẹpwẹẹ, ọ ka dọmwụ nyọka bang ẹtẹ.

¹⁸Ẹla ọ-chị ba ọngịnyị kịrọrọ jụjụ lala ịnyaa ya okoji mịla ọngọọwa lee ọ-ya ẹma lee ịcha ọlarwa chọọ.

¹⁹Ọ-kpụnịrọ ọngọ ju ọdahịhile-ka lụka nya akama lala ọngịnyị ọ-maga nya ọ-kpa ẹngịrị ọ-hụ lẹgẹ-lẹgẹ ri ang lee ọ-kpa ẹta ọmyẹẹmyẹẹ jẹdịyẹ.

²⁰Eje o-mwu ju ọngọ ji ẹpwụ nya ọjụjụ lala ọ-nwụla ọngịnyị awụrụ lụka nya alogo lee o-gu ịma ju ọngịnyị ẹ-ẹbẹ.

²¹Imyi-í nwụ oluji nyang, aa ya ang oriri họọ. Imyi-enyi-í nwọọ, aa chị enyi họọ-ọ̄ nwa.

²²Ọ-họ ịnyị ri ọ-ka go awụrụ-ila kụrwọọ e-egbeju, Amkpaa tị ka nwụng uri.

²³Jaabwọ ka igbachịwụ o-bwu ẹtẹ ka kpa enyi ododo warị, ịnyịnyị-ịnyịnyị ọngịnyị ọ-kpa kụ a kaa ju ọmwụ nya agbama lẹ.

²⁴Ọ-kụ ụbwọng nwee ọ-ọtụpịrịhyo nya uhye nya ẹpwang hagụ ọ-ka kụ ẹpwa ta ahụ ọlarụ.

²⁵Oja ọnyịịla o-wo bwu ẹga ọlụrụ lala ọ-ya enyi ọkpụkpụ nwa lụka nya ụrwẹnụ.

²⁶Ọngịnyị ọnyịịla ọlẹ kọ myị ẹla ju oluguru-ẹla lala ụgbụ nya enyi ọchịrị àgụgụ o-ju ẹmwụ-enyi.

²⁷Inwa ọnẹnẹ lụmẹ-ẹ́ há ka, ọ há nya ọngịnyị ọ-ka mịla oja ha ịlọmwụ lụmẹ ka.

²⁸Ọngịnyị o-wu ịlọmwụ kpa myị ka epweji ọlẹ ká egwalọ ịdagaga jwọọ bene.