Read idege Etu 26 Bible Online

Etu 26 - idege bible

Etu 26

¹Ekpawẹ-ẹ́ẹ̀ do linehe ka, enyi-íì do lụka nya ang-ẹrụ ọwuwu ka, ịnyịnyị-ịnyịnyị ọ-mịla oja ha oluchi a chịla ka lẹ.

²Jaabwọ ká egwe bala arwịị kaa yabwịịma, ịnyịnyị-ịnyịnyị ọlọ à kaa yabwọ hi ọngọ da ẹla ka lẹ.

³Ugboji ri ọ-kpa nyi ụnyịrẹ, ori ọ-ya ju obyiyó ọ-ọnụ tị juwa, ọgọdọ tị pwoku ẹkpẹ nya oluchi.

⁴Ā wẹ oluchi ẹla nya ẹmwa oyaya nyamwụ koo, ó-ri ịnyị ka à lala oluchi ịnyịnyị.

⁵Aa wẹ oluchi ẹla nya ẹmwa nyamwụ jaabwọ kọ pwokwọọ, ó-ri ịnyị ka ọ ka me ịlọmwụ ọngọ jẹ ẹla.

⁶Ẹrụ ọ-ya du oluchi la jaabwọ ká ọngịnyị kaa chị ịlọmwụ apatẹ eku bala ọ-wụrụ ẹla kpụ ịlọng.

⁷Etu ọdada ọlọnụ nya oluchi hi ụ̀nyẹ lala ẹta ọmyẹẹmyẹẹ nya ọngọ gbu ẹta ba.

⁸Ihi ọ-chị ju oluchi lala ọ-chị ẹjwọ ori ba ọmẹ, ká tị juwa maga nyọka dọọ.

⁹Etu ọlẹ ká oluchi da la uko-uko lala ujwo-owuru ọlẹ ká ọngọ nwa ere kpa ụ-ụbwọ.

¹⁰Ọngọ diro oluchi kaka họ ụkụrwọ aalẹ, ọ lala ọngọ da ịcha ọlẹ kọ juwa kpa ịcha họ angịnyị ang ododoodu.

¹¹Jaabwọ ka ebwu kaa tịrẹkpẹ kaa go ịkọ nyamwụ ri, ịnyịnyị-ịnyịnyị oluchi à kaa ma ẹla nya ẹmwa nyamwụ họ lẹ.

¹²Ọngọngọhẹ kọ hu ịlọmwụ nya ọngọ jẹ ẹla ododu aalẹ, ịnya oluchi ọ-kpa ọnụ ka ụjẹ-ọpyị hagụ ịnyamwụ wẹẹ.

¹³Ọlụchụ-atịra hụhụ ẹ-ẹpwa kem ye ọnụ ya yẹkẹẹ, “Ugẹbẹ juwa ụ-ụgbẹyị! Ugẹbẹ juwa ụ-ụgbẹyị!”

¹⁴Jaabwọ ka ukpileku kaa wụrụ jaabwọ ká ịgbana nyamwụ kpọọ pwụ, ịnyịnyị ọlụchụ-atịra-à kaa gu achwọ ba ị-ịbẹẹdị nyamwụ lẹ, ọọ wuleji bwu ụwa ka.

¹⁵Ọlụchụ-atịra-á kpa ụbwọ ka ẹpwụ nya ẹja, ọ-gbọọ kpehe ya ang ju ịlọmwụ ka ọnụ ri akama.

¹⁶Ọlụchụ-atịra me kpá kọ jẹ ẹla gụ angịnyị angị irwiye ịlẹ kị ka jẹ-ẹ̀ gba irya ịnyịịla kpehe.

¹⁷Ọngọ gba ju ka ẹpwụ nya arụ ọrụrụ ọlẹ kọ gwọọ kpong-kpong ka lala ọngọ chẹhị yẹ ebwu kọ juwa chịpụrụ kam kọ wọọ a-arụ kịrẹkpẹ.

¹⁸Ọlụla ọlẹ kọ da ịkọnị bala ịcha nya igu tịpyọ

¹⁹lala ọngọlẹ kọ họ ọngịnyị ọọnamwụ ịbịrịbwọ, kọ tị byọọ yẹkẹẹ, “Ụmwara m̄ chị lẹ.”

²⁰Ịwụ-ụ́ juwa i-iyegu ka ila ka mịrị, awụlẹ ọ-kpa kụ á ji ka, arụ ọrụrụ-ụ́ụ̀ ji ka.

²¹Jaabwọ ká ịwa kaa kpa ila cha, ká ịwụ tịtị kaa kpa ila wuru, ịnyịnyị ọlẹla-à kaa chị arụ ọrụrụ ahị lẹ.

²²Ụmwọnụ-ẹla chakpa kpụ ịpyọ lowowo, ahị ye mile kụrọnyịị lala ang oriri ọlịpyọ.

²³Jaabwọ kịị kpụ okpoko onyoowuru kụrụ ẹja nya ọpyị amamdiroko-ò wẹẹ, ịnyịnyị ọnụ ọgẹnẹ-gẹnẹ à chị ang ke ọkịlẹtụ onyobyi lẹ.

²⁴Oluji kpa ọnụ kwo ala nyamwụ hịlá-hịla, luji rụwa ẹ-ẹpwụ kpọrịị.

²⁵Ọ́ ya ẹla ọ-kpụ umwu ya, ā dahịhiloo koo, ang inyibyi myị̀ ẹpwụ nyamwụ pwẹẹpwẹẹ.

²⁶Ọ́ kpa ihwirihwa chị ang ke uji ọlẹpwụ nyamwụ wẹwẹ, ọ ka chị ehe u-ugbọdọda ha angịnyị wuu yẹ.

²⁷Ọngọ chị ụjẹ da gbe ọngịnyị à kaa chabwọ kpụ ụjẹ ọọwa lẹ, ọngọ rị ẹjwọ onmuru-nmuru yahị da ọngọkịla aalẹ, ẹjwọ ọọwa ka nyà tịrẹkpẹ kaka gyọọ ọwa ayịdang pwụrẹ-pwụrẹ.

²⁸Ọngịnyị-ị́ wụng ẹjẹ ka, aa me ọnọọkịla bọọ ka, ọngịnyị ọ-kpa hu utungguru ri ọ-kpọọ ka ju ka ẹpwụ nya akama.