Read idege Etu 27 Bible Online

Etu 27 - idege bible

Etu 27

¹Ā chị ọgọm u-uhye nya ẹla olijuju koo, chajị á jẹ ijuju ka.

²Ba ká angịkịla-ā mịla oja hang, ā mịla oja ha ịlọng ka.

³Olo nya ẹjwọ lala nmọọ, ịnya ugburuja lala nmọọ, akama ọlẹ ká oluchi tị kaa gu reeji la ilo gwaa wẹẹ.

⁴Agbama la uhi-uhi la, ọ yẹ ọngịnyị biri-biri, oowo tị́ ka kụ gbe ila ọlẹ ká ijiiji kaa wuru gu ọngịnyị myị?

⁵Alibyi o-ya lọngịnyị u-ugbọdọda hagụ ọháha ọ-la e-eji-eji;

⁶Oligu-ú họ ẹla họ wụng ẹjẹ, ọ hagụ oluji nyang ọ-ka wung bajẹ rikpa-rikpa.

⁷Ọngịnyị wu ẹpwụ, ó-ri inwa ọnẹnẹ wẹwẹ, ọọ lọọ dẹẹ, ang oriri-í la byam-byam wẹwẹ, ọ tị ka la ọngọlẹ ká imyi nwụ ịpyọ.

⁸O-ji hwẹ̀ẹẹ hi ẹpwa kaa la ọngịnyị jaabwọ ká ọchịnụ kaa ji hwẹ̀ẹẹ hi awụ nyamwụ.

⁹Ida bala ịtangare ichoru kwọkwọ họ lọkịlẹtụ kpụ ọngịnyị nyii, ịpyọ nya aligu tị hagụ kpọkpọọkpọ.

¹⁰Ā deeri laligu nyang lee aligu nya adang ka. Ā charịnya nyọka bịlẹ ụbwọ ọdada nya anyịnang ẹnụ nya akama koo, ọngịnyị ọ-nọ ẹpwa bang ba hagụ ọnyịnang ọlẹ kọ ji hwẹ̀ẹẹ.

¹¹Ọnyị nyam ee, aa jẹ ẹla mẹ, chajị kam chị ọkẹkẹnị, m̀ ka la ọnụ ọpwọọ wẹ ọng myị ọng kọ ka hu ọnụ dam.

¹²Ọngọ jẹ ẹla-á yẹ akama kọ juwa wẹ, ọọ myẹbee hyọọ, oluchi tị ka yahị dọọ pwururu kele, ọ tịị chị ijẹma ụka ohyẹẹkpẹ.

¹³Aa ye awụrụ nya ọngọ yụbwọ nya ọngga oluri kpa ụ-ụwa, ye kpa ụ-ụwa ó-ri ọnyang ọlụya kọ godayị ha.

¹⁴Ọ-ya ọnụ-ụtụrụ dachị ọngịnyị ọọnang lịkata lala ọlọ ahụ nyaa wẹẹ ga jwọọ.

¹⁵Ahụ ọlarụ lala atẹ nya enyi owiri-wiri ọlẹnụ ká enyi do.

¹⁶Á ka tọọ ọnụ ba awụlẹ myị ka jaabwọ kọ ri ang olujwo nyọka wu igbachịwụ kpa lee ọ-ka chị ida nya olivu kpa ẹ-ẹpwụtụbwọ.

¹⁷Oje-oje ịị kpa kpila awụlẹ lẹ, ịnyịnyị-ịnyịnyị ọngọhẹ à kaa ju ọngọkịla iri lẹ.

¹⁸Ọngọ-kpẹhị rịrị okiledu yẹẹyẹẹ ka ye ugbe nyamwụ hya ri, ọnchẹ ọ-kpahị ju ayịbamwụ ka la ihi.

¹⁹Jaabwọ ká chẹhị ka ẹpwụ nya enyi kaa yẹ ahị nya ịlọng, ịnyịnyị-ịnyịnyị à kaa ya abwụma nya ọngịnyị dodehe lẹ.

²⁰Jaabwọ ka ejegu á jẹ-ẹ̀ myị pwẹẹpwẹẹ ka, ịnyịnyị ang ọ-ma ẹhị ma à kaa wu ẹhị ẹpwụ ka lẹ.

²¹Jaabwọ kị kaa hya okpoko onyoowuru bala okpoko ịgọm ụ-dụwa wẹẹ, ịnyịnyị ị ka ma ọngịnyị yẹ bwula oja ọlẹ kịị mịla họọ lẹ.

²²Á nyí oluchi lala ịnyaa ka nyiri bem wẹwẹ, á ka ku uchi ọchịchị kpehe hyọọ myị kaka.

²³Aa kpẹhị rịrị ịmwụ nyang yẹẹyẹẹ, ká kpahị ju ịna nyang ịnyịnyị.

²⁴À tị jẹ lẹ, ụdụ-ụ́ụ̀ ri ehe tehe koo, ihi ọlala nya adịrahụ-ụ́ụ̀ juwa gbe oyi myị oyi ka.

²⁵Ụka kị hya amẹ kpá wuu, inyeewe kaa jú, ịị yẹ ka ri amẹ ịkịla ịlẹ kị ka tụguru.

²⁶Ụka ọọwa, à ka ya egbii nya ịkpịlọ nyang họ ang ịkụrụ-kụrụ, à tị ya imbiri nyang ra ya okpoko ọọwa ra ọpyị myị ịnyịnyị.

²⁷À ka ye enyi-ẹmẹ nwa ụga bwu ẹga nya ịmwụ ihihi nyang, à ka kpa kpa ugbiyegu nyang tụ anchẹ anyang nyang ịnyịnyị.