Read idege Etu 28 Bible Online

Etu 28 - idege bible

Etu 28

¹Ọngịnyị onyobyi kaa rụnyẹ ụka ká ọngọhẹ-ẹ́ kwọọ ku ka, ọlabwẹla ọnyịịla tịị ju ugbodu kpọọọ lala ugẹbẹ.

²Ụka ká ẹpwụma-á họ tịpyọ, okoji-íì ba alegbeju ịlụwa ọ-ọmwụ ka. Angị jẹ ẹla bala ọ-jẹ ang á tị kpa ọpyị, ẹpwụma kaa godayị giri-giri lụka ọtata.

³Olegbeju ọlẹ kọ tụ alẹbyahị pyịpyị lala ukpenyi ọlẹ kọọ do kaka ta ang-ẹrụ ayịreji.

⁴Angị nyẹẹkpẹ da ehile à kaa mịla oja ha angịnyị inyibyi lẹ, angị ju ihi nya ehile kaa kpa ahị-ijwijwo taa.

⁵Angịnyị inyibyi-í jẹ jaabwọ ká ẹla ọkpakpa ọhọhọ ri ka, angịlẹ kịị ba Amkpaa jẹ tị jọọ hiigu-hiigu.

⁶Ọ há nyọka ri ọlẹbyahị ọ-chịla o-hu ọkịlẹtụ ha gụ ọ-ka ri ọlụdụ ọlọnọọkịla.

⁷Alụjụ i-ju ihi nya ehile ri anyị ị-jẹ ẹla, angị ju ogu ta alachị kaa kpa oyoyi kịla adaa anyị.

⁸Ụdụ ọkpụkpụ bwula o-ri angịnyị apyobwuna lụbwọ kà hyụụ ri ụdụ ọ-tụnọ gbe ọngọ kaa yẹ ahyẹẹrwẹrwa nya alẹbyahị.

⁹Ọngọ yarụ kpụ ịla hi ẹhile ọkpakpa aalẹ, abwọ ọrịrị nya ọngọọwa ka byịbyị ụ-ụrụ nya Ohe Oluhye.

¹⁰Ọngọ pịrị ọlabwẹla ọnyịịla kaka ju ka ẹpwụ nya ang onyobyi ọhọhọ, chị ẹkpa kpụ ịlọmwụ, ọngọ la abyị ọhẹ-lọhẹ ka kà ye uri hiigu-hiigu.

¹¹Ọlụdụ ka yẹ ịlọmwụ nya ọngọ jẹ ẹla kpá-à wẹẹ, ọlẹbyahị olirya tị yọọ ọyị dọọ ewewa wuu.

¹²Ọngịnyị ọnyịịla-á wẹ kaka kpa ọpyị, angịnyị wuu kaa chị ọkẹkẹnị, ọngọ onyobyi-í tị ri olegbeju, angịnyị kaa rụ gwẹẹgwẹẹ kaka kpịbaa.

¹³Ọngọ tụ ọhọbịrị nyamwụ kpịbaa-á kaa ka ịlahị ka, ọngọ tị ya ịnyamwụ dodehe kọ yẹ irya da ka la ọhịnyọhi bwu ẹga nya Ohe Oluhye.

¹⁴Ọngọlẹ kọọ ju ihi nya Amkpaa ụka wuu ka pyẹ̀ẹẹ, ọngọ tị la egbeju-ọngịrị ka jẹ̀ lẹtẹ ka hị ori.

¹⁵Ọlọkwọ ọlẹ kọ ri adịrahụ nya ikpehika lụrụrụ lala ugẹbẹ ọlẹ kọ juwa warụ lee ọnarwọ ọlagbama.

¹⁶Olegbeju ọ-jẹ ẹla-ka ri ọngọ yẹ angịnyị nyamwụ ụhị. Ọngọlẹ ká ọngịnyị ọ-họ ri ajị nyọka kpụ ụdụ wọọ ẹjẹ ka hị tata.

¹⁷Ọkịlẹtụ ọlẹ kọ wẹẹ yeje wu ọngọ nwụ ọngịnyị à ka tọọ ẹta ju ẹbyị lẹ, ọngọhẹ ā dọọ ụbwọ kpong-kpong koo.

¹⁸Ọngọlẹ ká ọhịhị nyamwụ ju ọdahịhile ka hụ lokpunyi, ọngọlẹ ká ọhịhị nyamwụ-ụ́ la kpụrụrụ-ka ka ta ayịreji.

¹⁹Ọngọ jụ ang họ kaa ye ang ri, ọngọ kpa ụka nyamwụ họ ang ododu kaa yẹ ẹbyahị.

²⁰Ọngọ la kpẹẹkpẹẹ kaa ye ahị ọwawa nya Ohe Oluhye, ọngọ tịtọ nyọka kpụ ụdụ chị enjwo juju kaa ju ka ẹpwụ nya akama.

²¹Ẹla ọ-họ oye-oye ri ang ọtịpyọ, ị tị ka jẹ-ẹ̀ kpa ẹjẹ nya ebwuna amamadiroko chị angịhyẹ ikiri ju myị.

²²Ọlụkpẹ tịtọ kọ ka kpụ ụdụ i-ijata-ijata, ọ́ jẹ ẹbyahị nyị juwa ka chọọ ọgụ ka.

²³Ọngọ nwụ̀ ọngịnyị rịrị kaa la obe ojiji ị-ịlahị gụ ọ-mịla oja ha ọngịnyị nya ihwirihwa.

²⁴Ọngọ yi adamwụ bala ịnamwụ oyi, kọ juwa ya ọọwa nyị́ ri oyi oyiyi ka aalẹ, ọngọọwa bala oloyi datị hi awụlẹ ka.

²⁵Ọlịpyọnụ kaa ju ọmwụ nya arụ, ịnya ọngọ dahịhile Amkpaa tị ka há họọ.

²⁶Ọngọ dahịhile ẹla ọjẹjẹ nya ịlọmwụ ri oluchi, ọngọ hịhị bwula ẹla ọjẹjẹ ka la okpunyi.

²⁷Ọngọ ya ang ga ha ọlẹbyahị aalẹ, ịngịngịhyẹ-ẹ́ ka kwọọ amwụ ka, ọngọ tị yẹ ọlẹbyahị kọ ya ahị chị ọka aalẹ, ị ka gọlọ jwọọ nwẹhị.

²⁸Ọngọ onyobyi-í tị ri olegbeju, angịnyị kaa rụ gwẹẹgwẹẹ kaka kpịbaa. Ụka ká ẹbyị-ị́ haa, angịnyị ịnyịịla-à pyebile.