Read idege Etu 29 Bible Online

Etu 29 - idege bible

Etu 29

¹Ọngọ pwa ọmẹjẹ juwa kịnyaa laruwoka kaa jẹ lẹtẹ kaka hị ori lụgbẹyị o-ju uda ọhọhọ-ka.

²Angịnyị ịnyịịla-á kpa ọpyị, angịnyị kaa chị ọkẹkẹnị, angị ịtịpyọ-ọ́ tị kpa ọpyị, angịnyị kaa chị arụ.

³Ọnyị ọlẹ ka ẹla ọjẹjẹ-ẹ́ há kaa kpa ọkẹkẹnị kịla adamwụ, ọ-ka dịrẹ alakpara ọ-ọmwọmwọọmwụ tị ri ụdụ o-hu daarụ.

⁴Ẹla ọ-họ kpakpa nya adịrahụ du ká ọpyị nyamwụ godayị giri-giri, ọ́ tị ya irya nịrọ ẹẹla nya okpoko-okpoko, ọ ka ya ọpyị nyamwụ ta ayịreji.

⁵Ọngọ du ọngịnyị ehe ọọnamwụ chụrwa aalẹ, ọ gbụrụ ụnya da gbe ọngọọwa kọ ka kpa ata kaka wu.

⁶Ọlabwẹla onyobyi chị ẹkpa kpụ ịlọmwụ lọhọbịrị nyamwụ. Ọlabwẹla ọnyịịla tịị dagba bala ọ-chị ọkẹkẹnị.

⁷Ọlabwẹla ọnyịịla jẹ iwe-ahụrụ ịlẹ kị ri nya alẹbyahị lụbwọ-lẹta, angịnyị inyibyi-í tị jẹ ang pwụ ọlịnyị ka.

⁸Angị kpa angịnyị họ kaa wuru ila gá epweji. Ọngọ jẹ ẹla kaa chị enyi nyiri agbama.

⁹Ọngọ jẹ ẹla-á wụrụ oluchi eje, aga ọchịchị bala ẹhụ ọhụlọ chị uguda oluchi à kaa kpa kụ ịlahị lẹ, ẹla ọọwa-áà cheju lọpịlẹhị ka.

¹⁰Angị nwụ angịnyị kaa ba angị ịkpẹẹkpẹẹ ẹtẹ, angịnyị ịnyịịla tịị kọ ẹhị ju ọhịhị nyaa.

¹¹Oluchi-í kaa ju agbama nyamwụ wu kụrẹ̀-kụrẹ̀ ka, ọngọ jẹ ẹla tị ka dọhụ pịlẹ wu agbama nyamwụ kpa.

¹²Olegbeju-ú bata nya o-ke ụrụ lịnịịkịla ịlẹ kịị kpa kaka me jọọ, alụkụrwọ nyamwụ wuu ka ri alọnọọkịla myị ẹpwa myị ẹpwa.

¹³Ọlẹbyahị bala ọngọ wẹẹ tọọ pyịpyị gụ awụlẹ gụ ale, Amkpaa-à tị́ ya ẹhị ọyọyị haa lawụlẹ-awụlẹ.

¹⁴Adịrahụ-ụ́ chị eje ọlẹga nya alẹbyahị kpakpa jaabwọ kọ pwoku aalẹ, okoji-ahụrụ ka bọọ ọ-ọmwụ.

¹⁵Ẹla ọmẹjẹ bala ọ-nwụrịrị du ká ọnyị jẹ ẹla, ọnyị ọlẹ kị mwụ myị ka kaa kpa oyoyi kịla ịnamwụ.

¹⁶Angịnyị inyibyi-í kpa ọpyị, ang onyobyi ọhọhọ kaa pyebile, alabwẹla ọnyịịla tị ka kụ ka yẹ ayịreji ọtata nyaa.

¹⁷Nwụ̀ anjwo nyang rịrị mẹ aalẹ, ị ka họ ká ka ya ọkịlẹtụ mwụ ịnyọ. À ka chị ọkẹkẹnị chẹpwụ-chẹpwụ.

¹⁸Ụma ọlẹ kọ ba ịlahị ọkpakpa nya Ohe Oluhye jẹ ka, alụwa kaa la ọhịhị owúru-wùru, ọngọ tị ju ihi nya ehile nya Ohe Oluhye ka pyẹ̀ẹẹ.

¹⁹Ẹla ọlọnụ kem nwa ọ-kpa nwụ̀ ọnchẹ rịrị ka, ọ́ wowo wuu, ọ́ ka kpa họ ụkụrwọ ka.

²⁰Ọngọhẹ juwa kọọ ya ẹla kpịlaka la o-me irya jwọọ ene ka, ahị ọ-dahile ji u-uhye nya oluchi gụ ịnya ọngọọwa wẹẹ.

²¹Á bịrị ọnchẹ nyang bwu enjwo-enjwo bẹdẹẹ, ụka kọ nwà ọngịnyị, ọ ka ye ang myị ang nyang wuu juju.

²²Ọlagbama kaa ju ọmwụ nya arụ, ọ ka họ ang onyobyi ụma ọnyị myị ọnyị myị.

²³Ọbọọchẹ ohihi kaa kpa ọngịnyị kaka mịla eji, ọngọ kpa ịlọmwụ keji tị ka la ihi.

²⁴Ọngọ chẹkpẹ ju oyi ri ọngọ wụ ịlọmwụ ẹjẹ, ọ wowo kị gọlọ kpá, ọ́ tị ka myị-ị̀ bwuru ẹla dodehe ka.

²⁵Uhi-ahị nya angịnyị ojuju lala ụnya, ọngọ dahi hile Amkpaa ka la okpunyi.

²⁶Iru nya angịnyị kaa tịtọ ká ẹla nyaa ka há adịrahụ, ẹga nya Amkpaa eje ọ-chị kpakpa à tịị bwu lẹ.

²⁷Ọlabwẹla onyobyi wụ ọlabwẹla ọnyịịla ẹjẹ wụ, ọlabwẹla ọnyịịla tịtị wụ ọlabwẹla onyobyi ẹjẹ ịnyịnyị.