Read idege Etu 3 Bible Online

Etu 3 - idege bible

Etu 3

¹Ọnyị nyam ee, ā deeri nya ang ịlẹ kam wẹẹ mẹjẹng ka, ā tịị kpịtịya nya ehile ịlẹ kam dang wẹ wuu mẹ.

²À tị́ jẹ lẹ, ang ịmẹjẹ nyam ịwẹ ka họ ká ka la ọhịhị oluduyo bala iwe-ahụrụ nyang ọnwanwa kịlahị-ịlahị.

³Ā pẹhi o-hu ọkịlẹtụ ha bala ọkpẹẹkpẹẹ ọlala koo, aa yaa da o-omyi lala ang odoomyi, ká daa ju ẹ-ẹpwụ nya ọkịlẹtụ nyang mẹ.

⁴Á họ ịnyị aalẹ, ẹla nyang ka há angịnyị ehe bala Ohe Oluhye, à ka la ẹnyị ọnyịịla.

⁵Dahịhile Amkpaa lọkịlẹtụ nyang wuu, ā kpụnịrọ ang ọjẹjẹ nya ịlọng ka.

⁶Aa kpịtịya nya Amkpaa ẹ-ẹpwụ nya ang myị ang ká ka họ, aalẹ, ọ ka mẹ ụgbẹyị ọlẹ kọ pwoku jẹng.

⁷Ẹla ọjẹjẹ nyang ā myịng lẹhị kpoye koo, ju ihi nya Amkpaa, ká cheji ba ang onyobyi ọhọhọ.

⁸Á họ ịnyị, à ka la kpịra-kpịra ị-ịnyịrọ, ekpinegu nyang ka ya gbonggbong.

⁹Chị ihi ju Amkpaa bwula ang ịlẹ ká la, ká kpa ọhaha ọlahịchịng bwu ẹpwụ nya ang-ẹrụ inyeewe nyang kịlọọ.

¹⁰Ọọwa du ká ukuna nyang ka myị̀ lang oriri, ere ka myị̀ egba nya ere nyang pwẹẹpwẹẹ.

¹¹Ọnyị nyam ee, a ya ụrụ nyi alibyi oyaya nya Amkpaa ajị koo, ọ-nwụng rịrị nyamwụ ā wụng ẹjẹ ka.

¹²À tị́ jẹ lẹ, Amkpaa kaa nwụ angịlẹ kị họọ rịrị, jaabwọ ka adịda kaa nwụ ọnyị ọlẹ kọ họọ ka ọkịlẹtụ rịrị.

¹³Ọngọlẹ kọ ye ẹla ọjẹjẹ, kọ la ang ọjẹjẹ aalẹ, ọngọọwa ka pyẹ̀ẹẹ.

¹⁴À tị́ jẹ lẹ, apyobwuna nyamwụ hagụ ịnya okpoko onyoowuru, ọ ka ju apyobwuna hang gụ okpoko ịgọm.

¹⁵Ọ kpịnya gụ ịjang ịnyịịla-ịnyịịla, ịngịngịhyẹ ọlẹ kọ mang ma-á la ọ-chụ mọọ ka.

¹⁶Ẹla ọjẹjẹ ka ya ọhịhị oludiyo hang lụbwọ ọhẹ, ọ-ka ya ụdụ ọkpụkpụ bala ihi ọlala hang lụbwọ ọkịla.

¹⁷Ụgbẹyị nyamwụ ju ọkẹkẹnị, ọ ka kpang ụgbẹyị lokpunyi.

¹⁸Ẹla ọjẹjẹ ri okoji nya ọhịhị ha angị yụbwọ chọọ, angị wọọ bajẹ ka chị ọkẹkẹnị.

¹⁹Amkpaa họ odehe bwula ẹla ọjẹjẹ nyamwụ, bwula ang ọjẹjẹ nyamwụ ọ họ uhye-ọgba lẹ.

²⁰Bwula ẹla ọjẹjẹ nyamwụ, ọ họ ka ihu ịtụka mwụ, ọ họ ká ẹnyị do bwu egbamwụ.

²¹Ọnyị nyam ee, yụbwọ chị ẹla ọjẹjẹ bala ẹla ọkpakpa ọjẹjẹ, ā myị kị gụng be koo.

²²Ị ka ya ọhịhị hang, ọhịhị ọ kpụ ịpyọ bala ọ-la ihi-ihi.

²³À ka jẹdịyẹ ụ-ụgbẹyị nyang lokpunyi, á ka chị ụchụụ ka.

²⁴Á ka nune chị ịnyịrọ giri-giri ka, une nyang ka kpunyi.

²⁵Ā chị uko nya akama ọmwaaa ọhẹ ka, ā ju uhi nya akama ịlẹ kị kaa chị angị inyibyi ọgụ ka.

²⁶Amkpaa ka chẹwụ keng, ọ́ ka myị aa kpa ẹta ka wu ụnya ka.

²⁷Ụka myị ụka kọ chịkpẹẹ hang, aa họ ang ọnyịịla ẹ-ẹga nya angịlẹ kị la ọbaba nyamwụ.

²⁸Ó-ri ká ka jẹ-ẹ̀ da ọọnang ụbwọ myị alẹ aalẹ, ā byọọ ya nyị godayị gbe ijuju koo.

²⁹Ā me obyi nya ang onyobyi ọhẹ-lọhẹ ju ọọnang koo, ọwa lẹ, ọ nọ ẹpwa bang ba, ọ tị dahịhileng.

³⁰Ā chị ẹla ba ọngịnyị kịrọrọ ododu kọ dang ẹlẹlẹhẹ ka lẹ koo.

³¹Ā yẹ ijiiji nya ọlabwẹga ka, ā gbịla ọhọhọ nyamwụ koo,

³²à tị́ jẹ lẹ, angị họ ang onyobyi wụ Amkpaa ẹjẹ, ọ tịị ri igu ta angị họ ang ọnyịịla.

³³Amkpaa gọlọ ju ẹpwa nya ọngịnyị onyobyi, ọ tịị wahị kụrụ ẹpwa nya ọlabwẹla ọnyịịla.

³⁴Angị kpa angịnyị họ, Ohe Oluhye kaa kpaa họ, ọ tịị họ angị la dụmwọọ ọnahị.

³⁵Angị jẹ ẹla ka la ẹnyị ọnyịịla olihi-ihi, oyoyi tị kaa ri nya aluchi.