Read idege Etu 30 Bible Online

Etu 30 - idege bible

Etu 30

¹Ọlẹng ọhẹ juwa kị wụrụ Aguu ọnyị nya iJake ọla ịMasa: “Ọ ya ẹrụ je Itiyẹlụ, Itiyẹlụ ọọwa tọ Ukalụ yẹkẹẹ,

²A tị́ jẹ lẹ, am a ju ẹmwa gụ angịnyị wuu lẹ, m̀ tị́ ri ọngịnyị ehe ọlam ri alẹ wẹẹ.

³Ḿ jẹ ẹla kpong-kpong lẹka, ḿ tị jẹ Ohe Oluhye nwa kpong-kpong ka.

⁴Ọngọhẹ kele ka epwoohe nyà hireji ẹnẹhẹ lẹ-ẹ́? Oowo à tị́ jẹ wu ọhụ kpa ẹpwụtụbwọ nyamwụ myị? Oowo tị wu enyi bwẹhị a-awụrụ myị?

⁵“Ẹla ọyaya nya Ohe Oluhye ọnyị myị ọnyị ri nya ịlẹhị. Ẹla nyamwụ ke angịnyị lala akụmada ó-ri kị rụ kaka bọọ ba.

⁶Ā ya ẹlẹhẹ haju ẹla nya Ohe Oluhye ka, ó-ri ịnyị ka ọ ka yalibi lang, ị ka jẹng nya ọlọnọọkịla.

⁷“Ohe Oluhye ee, ang imiiye m̄ tịtọ bwu ẹga nyang lẹ, aa ya ang ịịwa ham ene kam ka gbu.

⁸Ọhọhẹ ri dam ụbwọ kam ka ri ọlọnọọkịla ka, oheeye ri ā họ kam yẹ ẹbyahị lụmẹ lee o-ri ọngọ kpụ ụdụ lụmẹ ka, ya ang oriri omeme lẹnụtụrụ ọnyị myị ọnyị ham.

⁹Ó-ri ịnyị ka m̀ ka ri kịla ịlọm kịla ka juwa yipwa yẹkẹẹ, ‘Oowo tị́ ri Amkpaa ri-īì?’ Ḿ tị yẹ ẹbyahị lụmẹ, m̀ tị ka yi oyi, kpa oyoyi wẹ ẹnyị nyang ahụ Ohe Oluhye nyam.

¹⁰“A kpa ọnchẹ kụ je ayịbamwụ koo ó-ri ịnyị ka ọnchẹ ọọwa-á gọlọ jung, ọlọ ọọwa ka wung.

¹¹“Angịhyẹ juwa kịị gọlọ ju adaa kị tịị ji ịnaa obe ka ịnyịnyị.

¹²Angịhyẹ juwa kị la ịlaa charị-charị, ibyi nyaa tị rịraa rụwa yịngọọọ.

¹³Angịhyẹ juwa kpá kị myị̀ ịlaa lẹhị gidogbooo, ká angịkịla-á rị ịngịngịhyẹ nyaa ka.

¹⁴Angịhyẹ juwa ká angịrị nyaa la weri-weri lala ikonggo, liri lala ẹma nyọka kpa ma ikpehika kiri-kiri bala ọ-yẹ alẹbyahị ba odehe.

¹⁵“Ugbee ma anyị anyang imiiye, ịlẹ kịị chị eko nya imyi yẹkẹẹ, ‘Ya ham! Ya ham!’ Ang ịta ịkịla juwa ká ang kaa waa ẹpwụ ẹnẹnẹhẹ kaka— ang ine wuu dọmwụ ịnyị:

¹⁶ang ịịwa ri ejegu bala ọnyang ọ-ma ọnyị ka, bala ọpyị ọchọrụ bala ila owuruu-wuru.

¹⁷“Ọngọ kpa adamwụ họ bala o-hu ịnamwụ tẹbẹlẹ aalẹ, epwu ka ri iyo nya ọngọọwa, ipyeekpo ka gbọọ egbahị ri.

¹⁸“Ang ịta ịhyẹ juwa kị lam ẹbyẹbyị lụmẹ, ị dọmwụ la ang ine ịlẹ kam jẹ etu nyaa ka:

¹⁹jaabwọ ká idu kaa bwu hụ̀ u-uhye-ọgba, bala jaabwọ ká ilo kaa bwu jẹdịyẹ u-uhye nya ẹjwọ, bala jaabwọ ká ụgbọ nya enyi kaa bwu jẹ ụgbẹyị nyamwụ ihu ọtụka, bala jaabwọ ká ọháha nya ọlẹng bala ọnyang kaa bwu gba hụ awụlẹ.

²⁰“Ọhọhọ nya ahụ ọlụya ri: ọ nube kpá nwa ịlọmwụ nwa ịlọmwụ, kọ kpehe, ọ du amwachwọ kpuru juwa yẹkẹẹ, ‘Ọwẹ-ẹ́ ri ẹlẹhẹ ka pyii-ì!’

²¹“Angị ịta ịhyẹ à kaa hụ́ odehe jigi-jigi myị lẹ, ị dọmwụ la ang ine ká odehe-é kaa kpa ila nyaa myị ka:

²²Ọnyọhị ọlẹ kọ yẹ kpata ka ri adịrahụ, bala oluchi ọlẹ kọ tị ye ang ri kpụ ịlọmwụ hi,

²³bala ọnyang ọlẹ ká angịnyị wọọ ẹjẹ kọ tị ye ọrụ rwọ, bala ọnchẹ ọnyang ọlẹ kọ ye iwe-ahụrụ nya ayaamwụ la.

²⁴“Iyo ine ịhyẹ jam odehe kị byẹhị lụmẹ kpá kwèhụ ka, ị tị jẹ ẹla nya weji-weji:

²⁵Ịhụlo ịnyị, ị ri ang ịdẹwụ-dẹwụ kpá, ị tị jẹ tụ ang oriri guru gbe ụka nya uhi.

²⁶Iyo-ịlẹjwọ-ọ́ la ọngịrị la ẹgẹhẹ kpá kaka, ị tịị nọ ẹpwa nyaa ẹ-ẹpwụ nya ajwọ.

²⁷Ịyịrị-ị́ la adịrahụ ka, ị tịị jẹdịyẹ nyaa lawụlẹ ịkpịkpịịkpa.

²⁸Ikponjiyo amamadiro kpá ká ka wu kpa ụ-ụbwọ nyang myị, ị tịị juwa ẹ-ẹpwa nya ịdịrịhụ.

²⁹“Ang ịta ịhyẹ juwa kị kpẹ̀hị lọyẹyẹ ẹ-ẹpwụ nya ẹdịyẹ ọjẹjẹ nyaa, ị dọmwụ la ine:

³⁰Ugbẹbẹ kọ lọngịrị gụ iyo wuu kọ kaa ju uhi nya iyo ọhẹ-lọhẹ ka,

³¹Ọwọọwọ kọọ jẹdịyẹ myẹ gẹgẹẹgẹ bala oyichi bala adịrahụ kọ kụ ịlahị nya angịdẹwụ nyamwụ.

³²“Ó-ri ká hu ịlọng gẹdẹẹ uchi-uchi, lee o-me irya nya ang onyobyi ọhọhọ aalẹ, yụbwọ kụrụ ịlọng ọ-ọnụ ká ba mẹ!

³³Jaabwọ kị yi enyi-ẹmẹ nya ẹna ju lawụlẹ ká ịbọta kaa kpehe, ká mịla okwinyi ẹwụ kọọ da ịwọ, ịnyịnyị agbama o-du ju ọngịnyị à kaa ju ọmwụ nya arụ lẹ.”