Read idege Etu 31 Bible Online

Etu 31 - idege bible

Etu 31

¹Ịlẹ ri ala iyaya ịnyẹẹnyẹẹ nya ịLẹmwẹlụ Adịrahụ ịlẹ ká ịnamwụ mẹjọọ:

²“Ọnyị nyam, ọnyị nyam ọ-hám há ee, Ohe Oluhye à wo abwọ ọrịrị nyam m̄ mang lẹ.

³Ā bịrị ọhịhị nyang wuu ju anyang koo, ị ta iru nya ịdịrịhụ ayịreji nwẹhị lẹ.

⁴“ỊLẹmwẹlụ ee, aa wo mẹ, ẹẹla nya ịdịrahụ à wẹ koo, ịdịrịhụ-ụ́ụ̀ nwa ere o-ju egbeju lee o-juwa tịtọ nya ere ọnyọọngịrị ọnwanwa kekeeke ka.

⁵Ị́ nwa ere, ị ka nyẹẹkpẹ da ehile ọkpakpa, ị ka yẹ alẹbyahị ba.

⁶Ere ọnyọọngịrị ri ang nya angịlẹ kị juwa hu ang-ẹdịyẹ nya ejegu bala angị ji ẹpwụ nya ojụjụ onyobyi obyi.

⁷Ị nwà chajị kị deeri hi ẹbyahị okwookwee nyaa, kị ka myịmyị-ị̀ kpịtịya nya akama nyaa kaka mẹ.

⁸“Aa ya ẹla ha angịlẹ kị ka jẹ-ẹ̀ ya ẹla ha ịlaa ka, họ ká angị la ụbwọ ọdada-ka ā la iwe-ahụrụ ọlẹ kọ ri ịnyaa.

⁹Ya ẹla chẹkpẹ jwaa, ká leje ọkpakpa, họ ká ikpehika bala alẹbyahị ā la iwe-ahụrụ ọlẹ kọ ri ịnyaa.”

¹⁰Ahụ ọlahịchịng chakpa la ujwo la o-yeye! Ahụ ọlịnyị kpụ ịnya gụ ogbe abịlaala.

¹¹Ọrụmwụ da ọkịlẹtụ hilọọ, ịngịngịhyẹ-ẹ́ kaa ku ọrụmwụ amwụ kpong-kpong ka.

¹²Ẹ-ẹpwụ nya ọhịhị nyamwụ wuu, ọọ ri uhwa ọnyịịla kpa wẹ ọrụmwụ, ọọ kpa ang onyobyị wọọ ka.

¹³Ọọ wo owu wo lịlọmwụ, bala ọ-nụ ịpwụ nụ.

¹⁴Ọọ durwe kaka kpa ang oriri nyà bwu ẹga ọhwẹ̀ẹ jaabwọ ká agbọ nya enyi nya alọhị kaa jẹ lụrụ-lụrụ.

¹⁵Ọọ chahị lewu-ụtụrụ gbegbeegbe họ ang oriri ha alẹpwa nyamwụ, ga ụkụrwọ ju anchẹ anyang nyamwụ ụ-ụbwọ kị ka họ.

¹⁶Ọọ wụla ọpyị yẹ, hu okpoko kaka rọọ, ọ kaa kụ ụwa ya ọkpoko nya ịlọmwụ bá owuwu nya ẹrụ ụwa ọpyị ọọwa.

¹⁷Ọọ họ ụkụrwọ nyamwụ kpịra-kpịra, egbirabwọ nyamwụ lọngịrị biri ụkụrwọ.

¹⁸Ọọ jẹ myị̀myị ọhị nyọwa nyị ri ọhị o-ju apyobwuna, odu-ú hihi ọ juwa họ ụkụrwọ lotinika nyamwụ.

¹⁹Ọọ wo owu lụbwọ nya ịlọmwụ, nụ apwụ lịlọmwụ ịnyịnyị.

²⁰Ọọ họ alẹbyahị ọnahị, juwa da ikpehika ụbwọ.

²¹Ọ́ọ̀ chị uko nya ụka nya alogo ka, chajị alẹpwa nyamwụ wuu la ịwụrụ i-ke ohu.

²²Ọ ga ịpwụ ịkụrụ ịbẹẹdị nya ịlọmwụ, ịpwụ nyamwụ ri ịpwụ ịnụnụ ịnyịmịla ịnyịịla-ịnyịịla.

²³Ọrụmwụ-ụ́ ri ọngịnyị okwiikwii koo, ọ ri ọbagọ ọhẹ ẹ-ẹpwụ nya alegbeju ị-kpa ọpyị.

²⁴Ọọ ga ịwụrụ lịpwụ ịnụnụ kpa ra, ọọ ya ịpwụ ịchọhị ha alọhị ra.

²⁵Ọ la ọngịrị la, ọ la ihi-i la, ọọ hụlọọ ẹhụ chama-chama lọchị uko nya ijuju ka.

²⁶Ọọ ya ẹla lẹla ọjẹjẹ, ọọ mẹ ẹla jẹ lọdụmwọọ.

²⁷Ọọ kpahị ju ẹpwa nyamwụ yẹẹyẹẹ, ọ́ọ̀ hụ chekee go ata chị awụlẹ ọna ka.

²⁸Anyị nyamwụ kaa ya ẹla ọnyịịla nyamwụ, ọrụmwụ kaa mịla oja họọ yẹkẹẹ,

²⁹“Iru nya anyang lụmẹ-lụmẹ ri ịhụ ịnyịịla kpá, ahụ à tị lihi gwaa wuu lẹlẹ!”

³⁰Ang ọ-chẹhị gbọgbọ da ọngịnyị lụgbaa, ụhị ọháha kaa pwọ ido, ọnyang ọlẹ kọ ju ihi nya Amkpaa chịla kịị mịla oja họọ.

³¹Anụ jọọ obe nya ang ịnyịịla ịlẹ wuu kọọ họ, kanụ mịla oja họọ u-ugbọdọda chajị nya ụkụrwọ nyamwụ ịlẹ wuu kọ họ.