Read idege Etu 4 Bible Online

Etu 4 - idege bible

Etu 4

¹Anyị nyam ee, anụ ke ụrụ la ọmẹjẹ nya adanụ, kanụ hụ kem chajị kanụ ka jẹ ang hịlẹ-hịlẹ.

²À tị́ jẹ lẹ, ang ịlẹ kam wẹẹ mẹjẹẹnụ hiigu, ānụ deeri nyaa koo.

³Ụka kam ri onjwo dẹgẹdẹgẹ a-ata nya adam, kam̀ à tị́ rị ọnyị ọlẹng olookpokpo nya ịnam ịnyịnyị lẹ,

⁴adam ka mẹ ẹla jẹm byim yẹkẹẹ, “Aa kpịtịya nya ang ịlẹ kam wẹẹ mẹjẹng, aa ba ọmẹjẹ nyam jẹ mẹ aalẹ, à ka hịhị.

⁵Aa jẹ ẹla bala ọ-jẹ ang hịlẹ-hịlẹ mẹ, ā deeri lee o-nyẹẹkpẹ da ọmẹjẹ nyam koo.

⁶Ā nyẹẹkpẹ da ẹla ọjẹjẹ koo, ọ ka kpang, tọọ ba ịnyịrọ lọháha, ọ ka gbeng.

⁷Ẹla ọjẹjẹ à kpa gụ ang ịkịla wuu lẹlẹ. Ang myị ang ká ka ya dọọ da u-uhye, aa la ẹla ọ-jẹ hịlẹ-hịlẹ mẹ.

⁸Á hu ẹla ọjẹjẹ nya ang ọtụka, ọ tịtị ka hung ọngọtụka, á tọọ ba ịnyịrọ, ọ ka họ ká ka la ihi-ihi.

⁹Ọ ka lala ododo ọ-kụrụ egbeju nyang, bala okpo-adịrahụ olihi-ihi hang.”

¹⁰Ọnyị nyam ee, yụbwọ chị ẹla ịlẹ kam wẹẹ ya jeng mẹ, aalẹ, à ka la ọhịhị oludiyo.

¹¹M̀ mẹ ẹla ọjẹjẹ jẹng-ǹg wẹ lẹ, m̀ tị kpang bwu ụgbẹyị opwoku wẹ lẹ.

¹²Á jẹdịyẹ ẹ-ẹpwụ nya ẹla ọjẹjẹ, ịngịngịhyẹ-ẹ́ ka chịng ochuchuu ka, á rụnyẹ rụ, á ka chị ụchụụ ka.

¹³Aa ba ẹla ọlẹ kam mẹjẹng-ǹg wẹ jẹ̀ mẹ. Kpọọ ụ-ụwa kpọọ mẹ, ọwa-à ri ọhịhị nyang lẹ.

¹⁴Ā ka ẹga ọlẹ ka angịnyị ịnyibyi kaa ka ka, ā dịrẹ ọhọhọ nya alọhọbịrị koo.

¹⁵Cheji baa hwẹ̀ẹẹ, jahị kpata, ka rụ lokem nyang mẹ.

¹⁶À tị́ jẹ lẹ, angịwẹ-ẹ́ họ ang onyobyi kpá ka, ịị kpa une kẹhị ka, ị́ kpa ọngịnyị ẹkpa nọnọ kpá ka, ịị mwụ ịnyọ ka.

¹⁷Ọkwọ ọhọhọ háa lala ang oriri, abwẹga ọhọhọ háa lala enyi ọnwanwa.

¹⁸Ụgbẹyị nya ọlabwẹla ọnyịịla la jaabwọ ká ẹnụ kaa beeji, juwa há hwooo gu ọọwa-ọọwa gbee ká ahị ka pyẹ gbodoo.

¹⁹Ụgbẹyị nya ọlabwẹla onyobyi chị owu kpịlẹẹ lala odu ohihi, ịị mileji, ị́ tị jẹ uhye nya ang ọlẹ kị chị ụchụụ bwu ka.

²⁰Ọnyị nyam ee, ke ụrụ lẹla nyam, ká wo ẹla ọlẹ kam wẹẹ ya mẹ.

²¹Ā myị kị gụng chị byi ka, aa ya kpịbaa ọ-ọkịlẹtụ nyang.

²²Ọmẹjẹ ịwẹ kaa ya ọhịhị bala ọkpịra-kpịra ha angịlẹ kị jaa.

²³Aa kpahị ju irya ọlọkịlẹtụ nyang mẹ, chajị ọwa-à ri ẹmwụ nya ọhịhị nyang lẹ.

²⁴Aa gbe ọnụ nyang hi uguru-ẹla oyaya, cheji ba ọnọọkịla ọpịrị ọngịnyị ju.

²⁵Hu ẹhị nyang rịrị kịlahị kpụrụrụ, ká yọyị ka ẹga ká juwa jẹ ka.

²⁶Kụ irya ju ang ọlẹ ká wẹẹ ka họ, chajị ká ang myị ang ọlẹ ká họ ka godayị giri-giri.

²⁷Ā pyị gíri-gìri hi ụgbẹyị ọnyịịla ka, cheji ba ang onyobyi ọhọhọ.