Read idege Etu 5 Bible Online

Etu 5 - idege bible

Etu 5

¹Ọnyị nyam ee, ke ụrụ ka wo ẹla ọjẹjẹ bala ang ọ-jẹ hịlẹ-hịlẹ i-bwu ẹga nyam mẹ.

²Aalẹ, à ka jẹ ẹla opwoku, ẹla ọlọnụ nyang ka mẹjẹ nyori à jẹ ẹla.

³À tị́ jẹ lẹ, ẹla ọlọnụ nya ọnyang ọlụchị la gẹnẹ-gẹnẹ lala inwa, ọnụ nyamwụ ma ẹla hịlẹ-hịlẹ lala ida.

⁴Ụka ohyẹẹkpẹ, ọ ka lang ujujwo lala ụpyị, ọ ka ya ọjụjụ hang lala ẹbẹ nya ikonggo ọlahị imiiye.

⁵Á bọọ, ọ ka kpang kakaa gbu, ụgbẹyị nya ejegu à ri ẹga kọọ bwu lẹ.

⁶Ụgbẹyị nya ọhịhị-ị́ ri ẹlẹhẹ nyamwụ ka, ọọ yata bala ọ-yalebyi, ọ́ tị jẹ ka.

⁷Anụ anyị nyam ee, anụ ke ụrụ lam mẹ, ānụ tụụbwọ hi ẹla myị ẹla ịlẹ kam wẹẹ ya koo.

⁸Anụ cheji ba hwẹ̀ẹẹ hi ụma nya ọnyang ọlịịwẹ, ānụ tụ ju ọnang nyamwụ chwẹẹ koo.

⁹Ó-ri ịnyị ka aalẹ, anụ ka mwọọgịlẹ ya ihi ọlala nyanụ ha angịkịla, bala ọ-pẹhi ang ịlẹ kanụ yẹ akama ju lọhịhị nyanụ wuu ha angịkịla ịlẹ kịị jujwo nya ọngịnyị ka.

¹⁰Angga ka wẹ kaka yụya ju ụdụ nyanụ, ụkụrwọ nya ụbwọ nyanụ wuu ka ri ang-ụdụ nya anyabalịwụ.

¹¹Anụ ka juwa chị arụ ụka kanụ nụwa ọ-ọbẹ nya igu, ụka ká ẹdụrụ ka họ lịnyịrọ nyang wuu myị́ cheji,

¹²ká ka juwa chị ụbwọngee yẹkẹẹ, “Ang pyíi kam ka pwa ọmẹjẹ ka, kam ka myị-ị̀ ke ụrụ lalibyi oyaya.

¹³Ḿ myị ke ụrụ la angịmẹjẹ nyam ka, ḿ chẹhị gee nya ẹla nyaa kpong-kpong ka.

¹⁴Ọọwa, m̄ kpa ịlọm kaka chị oyoyi ju u-ugbọdọda lẹẹ alẹ lẹka le!”

¹⁵Aa nwa enyi bwu ẹmwụ ọlẹ kọ ri ịnyang, ká juwa họ kpẹẹkẹẹ ẹ-ẹga nya ahụ nyang.

¹⁶Apyobwuna nya ọ-kpa enyi nyang hụrụ tụ ẹga myị ẹga da ha ọng myị ọng tị́ lee?

¹⁷Wu ịlọng kpa ha ịnya ịlọng kem, ā ya ha angga ka.

¹⁸Ahụ nyang ā ri ẹmwụ-enyi nya ahị ọwawa hang, ká chị ọkẹkẹnị ju ahụ nya okolobya nyang.

¹⁹Ọ há ụhị, rụ ịyang nwuro-nwuro lala apyị, ụhị nyamwụ ā ya ọkẹkẹnị hang ụka wuu, ká ọháha ọlala ā rung ụka wuu.

²⁰Ọnyị nyam ee, ịyẹ tị́ du ká ụhị nya ọnyang ọlụchị ka mwọọgịlẹ rung-ǹg wẹ, ká ka dachichi wu ahụ nya ọngọkịla bajẹ-ẹ̀?

²¹À tị́ jẹ lẹ, Amkpaa yẹ ang myị ang ọlẹ ká ọngịnyị juwa họ, juwa kaa kpẹhị dịrẹ ẹga ọnyị myị ọnyị ká ọngịnyị juwa ka.

²²Ọhọbịrị nya ọlabwẹla onyobyi à ri ụnya wọọ lẹ, ang onyobyi nyamwụ daba rọọ mẹnẹ-mẹnẹ lala ori.

²³Ọ gbu nya o-wu ịlọmwụ kpa myị ka, uchi ọ-kpa ọnụ ka ụjẹ-ọpyị nya ịlọmwụ à dọọ byi-ì wẹ lẹ.