Read idege Etu 6 Bible Online

Etu 6 - idege bible

Etu 6

¹Ọnyị nyam ee, ọhẹka à yụbwọ nya ọngịnyị ehe ọọnang, o-godayị ha oluri ọlẹ ká jẹ yẹyẹ ka.

²Ọhẹka à ya ọnụ chákpilokoo, ya ẹla wu ịlọng bwula ọnụ ọlẹ ká myị.

³Ọnyị nyam ee, ó-ri kọ lịnyị aalẹ, à ya ịlọng kpụ ịlọgọ họọ lẹ. Jaabwọ ká ka bwu be ẹgba nya ẹlẹwẹ ri: chị agaga ka ẹga nyamwụ, kpa ịlọng keji họọ, ká ya ọmwẹmwẹ rịrọọ juwa bịlọọ kọ pwọ ori nya ẹlẹwẹ hing.

⁴Ā ya ịnyọ ọmwụmwụ ha ịlọng lee o-nune koo.

⁵Gbịlọng kpehe bwu ụbwọ nyamwụ jabwọ ká apyị kaa be bwu ụbwọ nya ọmwụkpẹ, lee jaabwọ ká ọchịnụ kaa gụ ọngọ da ịchịnụ be.

⁶Ọlụchụ-atịra ee, aa jẹ ang bwu ẹga nya ịhụlọ, kụ ẹhị yẹ ọhịhị nyaa ká jẹ ang bwula ọọwa.

⁷Ịhụlọ-ọ́ la olegbeju lee adịrahụ koo,

⁸ị tịị nwụla ang oriri nyaa guru bwu ụka nya ụhyọọ, juwa yẹhị nọ gbe ụka nya alogo.

⁹Ahụ ọlụchụ-atịra ee, à tị́ ka nụwa hị hyụụụ ị-ịbẹẹdị tata ka ba anyị? Ụka oyina-ā tị́ ka chahị une-è?

¹⁰À nụwa juwa yẹkẹẹ, “M̄ nune pyịnyẹng, kam wu ịlọm jwẹjẹ mwụ ịnyọ chẹẹ wẹẹ mẹ.”

¹¹Á jẹ ka tụbwọ aalẹ, ẹbyahị ka wẹ bwung agaga lala ọlagbụrụ, uhi okwookwee ka kpụng ẹtẹ lala oloyi à be ẹpwa lẹ-ẹ̄.

¹²Angi inyibyi ihideeji kaa ga kpa ọnọọkịla me.

¹³Ịị mwụ angịnyị ahị, kpa ẹta-ẹta bala ụkụchụ-ụkụchụ ya ẹla nyọka pịrị angịnyị ju.

¹⁴Ị kaa me irya onyobyi ọ-ọkịlẹtụ, juwa kaa ju ọmwụ nya arụ ọrụrụ.

¹⁵Lẹẹlẹ, akama ka chaa ọgụ lọkpahị ju ka, ị ka haa ang aboji-aboji kịla ọ-ka jẹ-ẹ̀ go hwóò kịla.

¹⁶Ang ịwọnyẹ juwa kị wụ Amkpaa ẹjẹ, ị dọmwụ la ang irwiye ịlẹ kị họ́ọ kpong-kpong ka. Ang ịịwa ri:

¹⁷Ọyị ọ-yẹ ọbọọchẹ-ọbọọchẹ, balọnọọkịla omeme, bala ọngọ da ẹlẹlẹhẹ-ka ọnwụnwụ,

¹⁸bala ọkịlẹtụ o-me obyi onyobyi, bala ọngịnyị ọ-chị agaga kaka họ ang onyobyi,

¹⁹bala olibeenu ọlẹ kọọ me ọnọọkịla jwọọ ka, bala ọngọ kaa ju ọmwụ nya ebwo ọchịchị nya aanịna.

²⁰Ọnyị nyam ee, wo ẹla ọmẹjẹ nya adang, ā tị nyẹẹkpẹ da ang ọlẹ ka ịnang wẹẹ mẹjẹng ka.

²¹Aa kpa ẹla nyaa ụ-ụwa ụka wuu, aa yaa da o-omyi lala ang odoomyi mẹ.

²²Ọmẹjẹ nyaa ka kpang ụgbẹyị ụka ká juwa jẹdịyẹ, ị ka gbeng ụka ká juwa nune, ị ka jung irya lụka ká chahị une.

²³À tị́ jẹ lẹ, ehile nyaa ịwẹ lala otinika, ọmẹjẹ nyaa ri ahịgboo hang, ọ-nwụng rịrị nyaa ka mẹ ụgbẹyị nya ọhịhị jẹng.

²⁴Ị ka kpang cheji ba ọnyang ọlụchị bala ịnụ ịpyaka-pyaka nya ahụ ọ-yẹ alebyi.

²⁵Ụhị nyamwụ ā nwụng imyi ka, ahị ịdịrọ́-dịrọ́ nyamwụ ā tị rung ka ịnyịnyị.

²⁶À tị́ jẹ lẹ, okpoko nya ịkaa amamadiroko ka pẹ ọlakpara ẹpwa myị, ẹla-ahụ ọdada tị ka nu ọngịnyị ang hi abwọ-abwọ.

²⁷Ọngịnyị ka jẹ-ẹ̀ ka hu ila bajẹ ịwụrụ nyamwụ ka rụ ila ka-á?

²⁸Ọngịnyị ka jẹ-ẹ̀ jẹdịyẹ bwu uhye nya awụrụ-ila, ịla ka bọọ a-apatẹ ka-á?

²⁹Ịnyịnyị ọ-ka la ẹ-ẹga nya ọngọ da ẹla-ahụ lẹ, ọngọ họ ịnyị ka yẹ akama pyii.

³⁰Ọngọhẹ kaa kpụ oloyi abyị ó-ri kọ hu ang oriri yoyi chajị nyọka ke ịlọmwụ imyi le?

³¹Ọ́ tị ri kị wọọ ụ-ụbwọ lẹchị, ọ ka nwụ uri tịrẹkpẹ mwụ aba ba ugbabwọ irwiye, ọ ka tụ hi ang myị ang ịlẹ kọ la ẹ-ẹpwa nyamwụ wuu.

³²Ọngọ da ẹla-ahụ chakpa ri oluchi, ịlọmwụ ọ-wẹẹ ya ta ayịreji lẹ.

³³Ị ka chị oyoyi jwọọ, nyọọ enyiri, oyoyi ọọwa-á ka jẹ-ẹ̀ yịlẹ hyọọ kaka.

³⁴Ijiiji ọlẹ ká ọrwahụ la à kaa kpọọ ju agbama lẹ, ụka kọ ka họ kwiwa, ọọ jujwo nya ọngọngọhẹ ka.

³⁵Ọ́ ka myị ọnụ nya egu ọ-họ ọngọọwa họ ka, okpoko ochikiriju lee ijwo ojwojwo ụbẹẹtụ ọhẹ-lọhẹ-ẹ́ ka kpụ agbama nyamwụ ba myị ka.