Read idege Etu 7 Bible Online

Etu 7 - idege bible

Etu 7

¹Ọnyị nyam ee, aa kpịtịya nya ẹla ịlẹ kam wẹẹ ya, ká kpịtịya nya ehile ịlẹ kam wẹẹ dang.

²Kpa ehile ịlẹ kam dang mẹ, à ka la ọhịhị, ọmẹjẹ nyam ā kọng ẹhị lala ọnyẹhị nyang.

³Chaa ori ba ịlọng a-akachụ, daa ju ọ-ọkịlẹtụ nyang.

⁴Hu ẹla ọjẹjẹ lala ọnyịnang ọnyang, ká hu ẹla ọ-jẹ kpori-kpori lala oligu olikẹjẹ nyang.

⁵Ị ka kpang cheji ba ahụ nya ọngọkịla, bala anyang ịlẹ ká ịnụ nyaa la pyaka-pyaka.

⁶Ụka ọhẹ, m̀ chẹhị bwu iwindo nya ube nyam

⁷iru nya ikolobya ịlẹ kị jẹ ẹla lụmẹ ka, ọgụgụ ri ọngọhẹ lẹpwụ nyaa kọ ri oluchi.

⁸Ọ juwa jẹdịyẹ bwu opeje ọ-ba ẹpwa nya ọnyang ọlụchị ba, juwa tụ gaaa ọ-ọnụ nya ẹpwa nya ọnyang ọọwa

⁹lewu-obyi, ká owu wẹẹ chị lẹ.

¹⁰Ọnyang ọọwa-à jẹ kaka tọọ lịnyangga nya ọlakpara lijẹẹhị ẹ-ẹpwụ lẹlẹ.

¹¹Ọnyang ọọwa ri ọngọ byẹjẹ, ọ́ jẹ oyoyi nya ịngịngịhyẹ ka, ọọ yọmwụ gu eji ẹ-ẹpwa myị ka.

¹²Ụka ọhẹ, ọọ godayị rịrị o-opeje, á yọọ o-opeje, á ka mahị ka, à yọọ i-ihi.

¹³Ọnyang ọọwa wu okolobya bẹẹ, jwọọ ọnụ, yọọ ẹ-ẹpwụ ẹhị myị̀myịịmyị, byọọ yẹkẹẹ:

¹⁴“M̀ kịla iya wẹ alẹ, nwa iro gbịlẹ-gbịlẹ wuu, iyo hi juwa nwa ụga nyọka ye ri.

¹⁵Ọọwa, m̄ kpehe kaka yẹhị rịrị gbeng lẹ, m̀ tịtọ nyang kekeeke, m̀ tị yẹng lẹ.

¹⁶M̀ ya ịpwụ ịlahịchịng i-bwu Ijipiti da ịbẹẹdị nyam gbịlẹ-gbịlẹ lẹ.

¹⁷M̀ da ida nya ịmaa bala alo bala isinamọn ichoru kwọkwọ hwọọ wuu ịnyịnyị lẹ.

¹⁸Kẹwẹ kahị wo ila nya ọháha nya awụlẹ gbigbiigbi gbee da ka alụtụrụ, kahị mwụ nọnọ ẹ-ẹpwụ achwọ nya awụlẹ lọháha mẹ.

¹⁹À tị́ jẹ lẹ, ọrụm-ḿ ji ẹpwa ka, ọ ka anyị ọlụrụ-lụrụ ọhẹ.

²⁰Okpoko ọtụka-ọtụka ọ kpa ba ịlọmwụ lẹ, ọ́ ka nyà ka gbee ká ọya ka jịra ẹka ene.”

²¹Ọ kpa ẹlẹlẹ ọgẹnẹ-gẹnẹ nyamwụ pịrị okolobya ọwẹ, ọ kpa ọnụ ọpyaka-pyaka nyamwụ wọọ bẹẹẹ.

²²Ahyaahị-ahyaahị, ọlẹng ọwẹ juwa dịrẹ ọnyang ọwẹ reree kele lala ẹna ọlẹ kị juwa kpa kaka nwụ, bala lala apyị ọlẹ ká ụnya wu

²³gbee ká ịcha ka gwọọ ọ-ọkịlẹtụ pyịịị. Ọwa ayịdang lala ọchịnụ ọlẹ kọ juwa chị agaga kaka ju ka ẹpwụ nya ori, ọ́ jẹ ọhịhị nyọwa nyị nọ apịlada ka.

²⁴Lẹẹlẹ, anụ anyị nyam ee, anụ ke ụrụ lam, kanụ ya ụrụ nọ ha ẹla ọlẹ kam wẹẹ ya mẹ.

²⁵Ānụ myị ká ọnyang ọlịịwẹ ā pịrịịnụ ha ịlọmwụ ka, ānụ jẹ ọgụ nyamwụ koo.

²⁶Ọ chị iru nya alẹng ịbẹnẹ lẹ-ẹ̄, angịlẹ kọ ju ọmwụ-igu nyaa ju iru kịla ọwawa kịla.

²⁷Ẹpwa nyamwụ ri ụgbẹyị nya ejegu, ụwa-à ri ụgbẹyị ọ-chịpyáa ka ẹpwụ nya igu lẹ.