Read idege Etu 8 Bible Online

Etu 8 - idege bible

Etu 8

¹Anụ ba wẹẹ, ẹla ọjẹjẹ lalẹẹ be ẹkọ, ang ọjẹjẹ lalẹẹ dakọ gboo.

²Ọ godayị rịrị i-ikiti ba ụgbẹyị ba, ọ dayị rịrị ọ-ọchapiye.

³Ọ godayị ọọnụ nya epweji, juwa be ẹkọ bwu ogirigba yẹkẹẹ:

⁴“Anụ wuu m̄ wẹẹ wụrụ lẹ, ẹkọ nyam ri nya alodehe wuu.

⁵Anụ angị ri adam-ọlẹng ẹ-ẹpwụ nya irya lẹka, anụ jẹ ang kanụ ri angịgbahị ẹ-ẹpwụ nya irya nyanụ mẹ. anụ aluchi ee, anụ jẹ ẹla-à wẹ mẹ.

⁶Anụ-ụ̀ ke ụrụ mẹ, chajị ẹla ịlahịchịng m̄ wẹẹ ka ya lẹ, ẹla ọlẹ kọ la kpakpa m̄ ka ya jenu lẹ.

⁷M̀ kaa ya ẹla nya ịlẹhị, ọnọọkịla rigọgọ nyam.

⁸Ẹla myị ẹla kam ya ri nya ịlẹhị, ọhẹ-lọhẹ nyaa-á la kịlaka ọ-pyị anyoko ka kpa ọngịnyị hwahị ka.

⁹Ị la gbagbịla ẹ-ẹga nya angị jẹ ẹla, ị la kpakpa ha angịlẹ kị tịtọ nya ẹla ọjẹjẹ.

¹⁰Anụ chụ ọmẹjẹ nyam ọkọkọ nya okpoko onyoowuru, kanụ chụ ang ọjẹjẹ ọkọkọ nya okpoko ịgọm ọlahịchịng mẹ.

¹¹Am ẹla ọjẹjẹ hagụ ogbe, ịngịngịhyẹ ọlẹ kọ bang ba-á la ọ-chụ mem ka.

¹²“Am ẹla ọjẹjẹ kụ ẹpwa ta eje ọkpakpa ọchịchị, m̀ la ang ọjẹjẹ bala irya orige-rige.

¹³Uhi nya Ohe Oluhye ojuju ri ọ-ka ba ang onyobyi ẹtẹ, ọbọọchẹ bala ahị ohihi bala ọhịhị onyobyi ọlala tụ ọnọọkịla omeme wụm ẹjẹ.

¹⁴M̀ la irya ojuju ọnyịịla bala ẹla ọjẹjẹ, m̀ la ẹla ọ-jẹ kpori-kpori bala ọngịrị.

¹⁵M̀ kaa da ịdịrịhụ ụbwọ ịị kpẹhị rịrị yẹẹyẹẹ, m̀ kaa họ alegbeju-ù da ehile ịnyịịla.

¹⁶Am ẹla ọjẹjẹ à du ká alegbeju jẹ-ẹ̀ kpẹhị rịrị lẹ, alihi kaa gbeji yẹẹyẹẹ bwulam.

¹⁷Angịlẹ wuu kam háa, angịịwa tịtị hám, ọng myị ọng kọ pịlahị nyam kaa yẹm.

¹⁸Ụdụ ọkpụkpụ bala ihi ọlala jam tam, m̀ kpaa jam bala ịlahị ọkaka bala ọpyẹpyọọ nyọka ya gịla angịnyị.

¹⁹Ahị ọlẹ kam ka gang hagụ okpoko ịgọm ọlahịchịng, uri ọlẹ kam ka nwụng hagụ okpoko onyoowuru ọlahịchịng.

²⁰Ụgbẹyị nya abwẹla ọnyịịla m̄ kaa bwu lẹ, m̀ kaa dịrẹ ụgbẹyị nya ẹla ọkpakpa ọhọhọ.

²¹M̀ kaa tụ ụdụ ha angịlẹ kam háa, lẹpwa nyaa myị lang-ụdụ pwẹẹpwẹẹ.

²²“Amkpaa họm jene ẹ-ẹpwụ nya ang ịlẹ kọ họ wuu, am à ri ang nya ọgbanyẹ ọlẹ kọ họ ugbeene lẹ.

²³Ị họm bwu ọmwụ ọdada pẹtẹẹ, ri ọhọhẹ-họhẹ ene ká odehe dọmwụ.

²⁴Ị mam ene nya ihu ịtụka wuu, m̀ ji ene ká enyi-ì kpehe bwu agbụ.

²⁵Ị mam ene nya ịgbọdọ, ene-ene ká Ohe Oluhye ya ikiti yeji.

²⁶M̀ bwu ene ká Ohe Oluhye họ odehe bala ịpyị nya ẹrụ lee ọrụ nya ọpyị.

²⁷M̀ juwa ụka kọ họ uhye-ọgba, bala ụka kọ da ọya nya ihu ọtụka.

²⁸Ụka ọlẹ kọ họ egbamwụ u-uhye-ọgba, kọ wụrụ ụgbụ nya ihu ịtụka,

²⁹kọ hu nọ ẹga ká ihu ka myị̀ ba ká enyi-í ka kpoye nya ụwa kaka, kọ ya itiwe nya odehe yeji lẹ, m̀ juwa ene-ene lẹ.

³⁰M̀ kụ ba Ohe Oluhye ba lala ọlịbańg, juwa jwọọ irya nya ụkụrwọ ọlẹ kọ juwa họ, juwa kpa ọkẹkẹnị wọọ ẹnụ myị ẹnụ, juwa chị ọkẹkẹnị i-ijata nyamwụ ụka wuu ịnyịnyị.

³¹Odehe ọlẹ kọ họ hám há, angịnyị ịlụwa hám há ịnyịnyị.

³²“Lẹẹlẹ, anụ anyị nyam ee, anụ wo ẹla nyam kanụ họ jaabwọ kam ya mẹ, aalẹ, anụ ka la ọkẹkẹnị.

³³Anụ wo ang ịlẹ kam mẹjẹẹnụ, kanụ jẹ ẹla mẹ, ā tị nyẹẹkpẹ dọọ kokoo.

³⁴Ọng myị ọng ọlẹ kọ ke ụrụ lam, juwa hụhụ ọ-ọnang nyam ẹnụ myị ẹnụ bala o-godayị ogirigba nya ẹpwa nyam aalẹ, ọngọọwa ka pyẹ̀ẹẹ.

³⁵Ọngọlẹ kọ yem aalẹ, ọ ye ọhịhị lẹ, ẹla nyamwụ ka kpụ Amkpaa ịpyọ.

³⁶Ọng myị ọng kọ yem ka aalẹ, ọ họ ịlọmwụ elego, ọngọngọhẹ ọlẹ kam wọọ ẹjẹ aalẹ, igu họ́ọ.”