Read idege Etu 9 Bible Online

Etu 9 - idege bible

Etu 9

¹Ẹla ọjẹjẹ nwụ ẹpwa nyamwụ, lịtachị irwiye weji lẹ.

²Ọ nwụ iyo nya ọhụhụ, chị ere nyamwụ bala ọ-ya itebwuru da kpá lẹ.

³Ọ du anchẹ anyang nyamwụ kaka wụrụ angịnyị ẹpwa, bwu ẹga ịlẹ kị la gede e-epweji kị ka wẹ ọhụhụ yẹkẹẹ:

⁴“Anụ angị jẹ ẹla gbuu ka, anụ kẹwẹ mẹ, anụ aluchi ā kẹwẹ,

⁵kanụ ri ang oriri nyam bala ọ-nwa ere ịlẹ kam da julawụlẹ lẹẹ mẹ.

⁶Anụ pẹhị ụgbẹyị nya uchi nyanụ, chajị kanụ hị, kanụ dịrẹ ọgụ nya ang ọjẹje mẹ.

⁷Ọngọ nwụ ọlọbọọche rịrị à wụrụ ido do ịlọmwụ lẹ, ọngọ yalibyi la ọngịnyị onyobyi họ ịlọmwụ elego.

⁸Á yalibyi la ọlọbọọchẹ, ọ ka bang ẹtẹ, nwụ ọngọ jẹ ẹla rịrị mẹ, à ka họ́ọ

⁹Á mẹ ang jẹ ọngọ jẹ ẹla, ọ ka jẹ gụ ọọwa, mẹ ẹla jẹ ọngịnyị ọnyịịla mẹ, ọ ka jẹ ẹla gụ ọọwa.

¹⁰“Ihi o-ju Amkpaa ju à ri ọmwụ ọdada nya ẹla ọjẹjẹ lẹ. Ọ-ka jẹ Ọngọ Ọlịgọgọ à ri ẹla ọjẹjẹ nya ịlẹhị lẹ.

¹¹Bwulam ẹla ọjẹjẹ ẹnụ nya ọhịhị nyang à ka tata lẹ, ẹka lụmẹ-lụmẹ ka haju ọhịhị nyang.

¹²Á jẹ ẹla, à jẹ ha ịlọng, á pwa ẹla ọjẹjẹ, ahụ-ahụ à họ ịlọng ọkwọ lẹ.”

¹³Ọnyang oluchi ri ọnyang ọlẹ kọọ la irya ka, jẹ oyoyi ka, ya ẹla wawu-wawu.

¹⁴Ọọ hụhụ ọ-ọnang nya ẹpwang nyamwụ, kpa ịlọmwụ kaka hụhụ ẹ-ẹga ogede nya epweji,

¹⁵juwa wụrụ angịlẹ kị juwa chịpwụrụ, kị dọmwụ hi ụbwọ nya ẹlẹlẹhẹ dala ẹla nya ịlaa ka yẹkẹẹ:

¹⁶“Anụ angị jẹ ẹla gbuu ka ee, anụ pẹ warị wẹ ẹga nyam mẹ.” Ọ byi aluchi yẹkẹẹ:

¹⁷“Enyi ọlẹ kị chị yoyi chakpa la ịpyọ, ịkaa ọlẹ kị hu yoyi chakpa la ịpyọ gụ ịkịla.”

¹⁸Angịwẹ-ẹ́ tị jẹ kpong-kpong nyori angị ka ẹpwa nya ọnyang ọwẹ kaa gbu tà ụwa ka, ị́ jẹ nyori angị jwọọ ụga wuu juwa e-ejegu lẹ ka.