Read idege ỌngọliryaỌngọ 1 Bible Online

ỌngọliryaỌngọ 1 - idege bible

ỌngọliryaỌngọ 1

¹Ịlẹ ri ala ịlẹ ká ọngọlirya[1] ọnyị nya iDevidi ọlẹ kọ ri adịrahụ e-epweji nya iJerusalẹm ya.

²Ọngọlirya[2] yẹkẹẹ, “Ododu bala ododu, ọ ri ododu. Ang wuu ri ododu.”

³Apyobwuna oyina ọngịnyị ehe a tị́-ị ye bwu ẹpwụ nya ụkụrwọ ọnyọọngịrị ọlẹ kọọ họ am odehe-e?

⁴Ụka nya oyi ọhẹ-ẹ́ chịpwụrụ, oyi ọkịla wẹ, odehe tị godayị abwabwọ nya ịlọmwụ kịlahị-ịlahị.

⁵Ẹnụ-ụ́ kpehe, ọ jẹ kaka byi, ọ tịrẹkpẹ lagaga ka ẹga kọ ka myịmyị-ị̀ kpehe bwu.

⁶Igbachịwụ da ka edii, Ọ mwẹẹkpẹ bwu ụwa ka ẹtẹ ọ da kele, ọ da warị, juwa da dagaga ju bwu ẹga kọ bwu ene.

⁷Ọ̀bá ọnyị myị ọnyị kaa mwụ kaka ju ihu, ihu-ú tị myị ka. Enyi mwụ tịrẹkpẹ ka ẹga kọ bwu, ene kọ ka dọmwụ nya ọmwụmwụ onyeewe.

⁸Ang wuu chị āgà lẹ, ẹẹl aká ọnụ ka ya myị ka. Ẹhị-ị́ yẹ nwa ịlọmwụ lẹka ụrụ-ụ́ tị wo kpụ ịlọmwụ lẹka ịnyịnyị.

⁹Ẹla ọlẹ kọ họ ẹnẹhẹ lẹ, ọwa-a ka myịmyị-ị̀ ma họ lẹ. Ang ọlẹ kị họ ẹnẹhẹ lẹ, ị tị ka myịmyị-ị̀ họ ịnyịnyị lẹ.

¹⁰Ịngịngịhyẹ ji ọlẹ ká ọngọhẹ ka ya lẹẹ yẹkẹẹ, “Ẹhẹẹ, ẹla onyeewe a lẹẹ lẹ” kpong-kpong? Yẹ mẹ, ẹlẹwẹ họ ẹnẹhẹ lẹ, ọ họ ene-ene kị-ị mahị.

¹¹Ọngọngọhẹ-ẹ́ kpịtịya nya ang iligbalẹ myị ka, aloyi olijuju-ú ka jẹ-ẹ kpịtịya nya ang ịlẹ kị wẹẹ họ lẹẹlẹẹ ka ịnyịnyị.

¹²Am ọngọlirya[3] ọlẹ kpakpakpa ri adịrahụ e-epweji nya iJerusalẹm, juwa kpẹhị rịrị ala Isirẹlụ wuu.

¹³M̀ cheje nyọka kpa ẹla ọjẹ́jẹ nyam jẹ bala ọ-wụlayẹ ang myị ang ịlẹ kịị họ am odehe ọlẹ. Olo ọnyẹẹnyẹẹ Ohe Oluhye a ya chụụhị ahị angịnyị ehe lẹẹ nyọka kpakpa lẹ.

¹⁴M̀ kpẹhị nya ịlọm yẹ ang myị ang ịlẹ kịị họ am odehe ọlẹ. Ang wuu ri ododu. Ọ ri ịbalo ọchịchị kpá chochoocho.

¹⁵Í ka jẹ-ẹ nịra ang okeke ọ-ka la kpakpakpa myị ka, ị́ tị ka jẹ-ẹ wa ang ọlẹ kọ ji-ka ka.

¹⁶M̀ byi ịlọm yẹkẹẹ, “M̀ nwa ẹ-ẹpwụ nya ẹla ọjẹ́jẹ lẹẹ gbee kam jẹ ẹla gụ angịlẹ kị ri adịrahụ i-iJerusalẹm ene nyam lẹ. Am ayịdang tị la ẹla ọjẹ́jẹ bala ang ọjẹ́jẹ ọtụka-ọtụka lẹ.”

¹⁷Ọọwa, m cheje nyọka jẹ ang ọlẹ ká ẹla ọjẹ́jẹ ọọwa ri bala ọ-ka jẹ ụla ọhyahya datị hi uchi ọchịchị lẹlẹ. Ụka kam tị kụ ẹhị yẹ wuu lẹ, m jẹ ọọwa ri ibalo ọchịchị kpá chochoocho.

¹⁸Jaabwọ ká jẹ ẹla kpori-kpori ka ba, ịnyịnyị imahị omeme nyang a kaa lụmẹ lẹ, ang ọ-jẹ́ kịlahị-ịlahị kaa kpa ọjụjụ warị ịnyịnyị.