Read idege ỌngọliryaỌngọ 10 Bible Online

ỌngọliryaỌngọ 10 - idege bible

ỌngọliryaỌngọ 10

¹Jaabwọ ká egu nya ịjị ka họ oru nya ida ọnyịịla-à la kiro-kiro myị, ịnyịnyị uchi ọpyịnyẹng a ka tụ ẹla ọjẹ́jẹ bala ihi ọlala biri myị lẹ.

²Ọngọ jẹ ẹla kaa họ ang opwoku, oluchi tịị họ ẹla nyamwụ ka ụpụpịla.

³Ẹdịye ọlẹpẹtẹ nyamwụ mẹjẹ ya ọ́ la irya ka, ọọ mẹjẹ ọng myị ọng wuu ya ọwa nyị ri oluchi.

⁴Ó-ri ká olegbeju nyang á wụ ẹjẹ tang, a pẹhi ụkụrwọ nyang ọọ-la ọọwa koo, ịlọng ọ-kpa keji du kọ ka hịnyọhi abyị ọlala nyang.

⁵Ang ọtịpyọ ọkịla ọhẹ jam kọọ họ odehe; Ang ịtịpyọ ụma ịlẹ ká alegbeju-ù họ.

⁶Ị go aluchi hụ i-iwe-ahụrụ iluhye, ị go alụdụ hụ e-ekpeleji.

⁷M̀ yẹ anchẹ kịị kụ anyịrẹ, ká angị la ihi-ihi tị juwa jẹdịyẹ ẹ-ẹpẹtẹ.

⁸Ọngọ chị ụjẹ da kaa chabwọ kpọọ, ụkụchụ ọ-ka ụjẹ nya ọgbịjị, ọgbịjị kaa chọọ.

⁹Ọngọ be ajwọ, ajwọ a ka gu igo lẹ, ọngọ be ọwụ, ọwụ a kaa gu lẹ.

¹⁰Eje o-be ọwụ-ụ́ tiri, kị jwọọ ka aalẹ, ọlụkụrwọ ka gba ọngịrị ọ-gụ olene kpehe; ụkụrwọ ọ-jẹ́ yẹẹyẹẹ họ ká ang ọhọhọ chịkpẹẹ.

¹¹Á ba ká ilo-ó chịng kpá ene ká ka ri iji nyamwụ, apyobwuna nyang ahụ ọngọ ri iji nyamwụ tị́ lee?

¹²Ẹla ọlọnụ nya ọngọ jẹ ẹla du kị mịla oja họọ, ọnụ nya oluchi a wụrụ igu nwọọ lẹ.

¹³Oluchi-i dọmwụ nya ẹla oyaya nyamwụ luchi-uchi, ọọ ya ẹla nyamwụ cheju ụ-ụla;

¹⁴oluchi-i ya ẹla jwọọ ka. Ọngọngọhẹ-ẹ́ jẹ ijuju ka, ọngọhẹ-ẹ́ tị jẹ ang ọlẹ kọ ka ji ụka kọ gbu kpá ka.

¹⁵Oluchi họ ụkụrwọ gbee kọ chị achwọ gbada-gbada, ọ́ dọmwụ jẹ ụgbẹyị o-bwu nya ka ẹpwa kaka.

¹⁶À jẹ ọpyị ọlẹ ká Adịrahụ nya alụwa ri ọnchẹ,[9] ká alegbeju ịlụwa kaa chahị bwu ube kaka hụhụ juwa ya ụya kem-m̄ḿ? Ọpyị ọọwa ri enyi gu obyi lẹ!

¹⁷Ụrụrụ nya ọpyị há ó-ri ká Adịrahụ nya alụwa-á ri ayibaba ọlọpyị; ká alegbeju ịlụwa kaa ri ang ụka opwoku, kịị wu ịlaa kpa, kịị ri ang nya ịpyọnụ ka.

¹⁸Ọngịnyị jụ ịhyẹ, ẹpwang nyamwụ-ụ do ẹnyi; ó-ri kọ nwụlọọ ka ịnawụ ọọwa ka kpụ.

¹⁹Ang oriri họ ká ọkịlẹtụ kpụ ọngịnyị nyii, ere ọnwanwa họ ká ọngịnyị chị ọkẹkẹnị; okpoko ị tịị kpa ra ang wuu lẹ.

²⁰A ya ẹla onyobyi nya adịrahụ ọ-ọkịlẹtụ nyang koo, a tị do alụdụ ikwowe nyang ka; ọchịnụ ochiche ka ya ụrụ ga wo ẹla ọọwa, ọchịnụ ọhụhụ ka kpa ẹla nyang ka tịrọnụ jaa myị.