Read idege ỌngọliryaỌngọ 12 Bible Online

ỌngọliryaỌngọ 12 - idege bible

ỌngọliryaỌngọ 12

¹Lẹẹlẹ, kpịtịya nya ọngọlẹ kọ họng lụka nya onjwo oriri nyang, ene ka ẹnụtụrụ nya akama ka wẹ, ene ẹka ịịwa-á pwụ ká ka yẹkẹẹ, “Ọhịhị-ị́ kpụm kpụ ịpyọ lẹẹ kaka.”

²Ụka ọọwa ahịgboo nya ẹnụ bala ịnya ọya bala ịnya ịdịchụ ka pwuru, ọ ka lala egbamwụ nyaa ji uhye ụka wuu.

³Ụka ọọwa angị gbe ẹpwa[10] ka hụ́ gbagbagba, angị la kpịra-kpira[11] ene-ene ka la dẹwụ-dẹwụ; angị gò ang[12] ka hi wure-wure, ị́ ka go ang kaka, angị-ị̀ yọyị bwu iwindo-ó[13] ka jẹ-ẹ yọyị yẹẹyẹẹ kaka;

⁴ekpileku[14] ka tuku, ị́ ka wo anụ nya ang ogogo yẹẹyẹẹ kaka. Eje omwumwu nya ọchịnụ ka chịng ahị une, á tị ka jẹ-ẹ wo ayịlọ odudu yẹẹyẹẹ kaka.

⁵A ka ju uhi nya ẹga ịlẹ kị la kutu, à ka chuko nya ẹdịyẹ ọjẹjẹ; okoji nya amọndụ ka gu àpwụ̀ inyiiwuru,[15] ụ́ga[16] ka kpa ọmwụ gbileji hụlọ-hụlọ lẹdịyẹ, imyi nya ịngịngịhyẹ-ẹ́ ka nwọọ kaka. Ọọwa, a ka rụ ka ẹpwa o-gbe oyi myị oyi nyang lẹ, angịnyị a ka juwa bida lẹlẹ.

⁶Ori nya okpoko onyoowuru ka chị, ẹja nya okpoko ịgọm ka bene; ọta ka bene o-ogo, ụka ká ori ọlọnụ nyamwụ-ụ́ chị.

⁷Ọọwa, ịpyị a ka nyà tịrẹkpẹ ka ịpyị lẹ, ịhụ ọdada-à ka tịrẹkpẹ ka ẹga nya Ohe Oluhye ọlẹ kọ hwọọ ha lẹlẹ.

⁸Ọngọlirya yẹkẹẹ, “Ododu bala ododu, ọ ri ododu ang wuu ri ododu.”

⁹Ọngọlirya ọlẹ jẹ ẹla lụmẹ lẹ, ọ kịnyaa juwa mẹ ang ịlẹ kọ jẹ-jẹ angịnyị. Ọ kụ irya ju iru nya etu lụmẹ-lụmẹ ị-kpa jẹ ẹla. Ọ wụlayẹ, go ẹchẹ nya ẹla ọnyọnyọọnyị rịrị jaabwọ kọ chịla.

¹⁰Ọngọlirya kpẹhị rige-rige nyọka ye ụma nya ala i-ju apyobwuna. Ala ịlẹ kọ da wuu ri ẹla nya ehile i-ju ọdahịhile.

¹¹Ẹla oyaya nya angị jẹ ẹla lala ekeji ịlẹhị piye-piye ịlẹ kịị kpa kpẹhị rịrị iyo ileji. Etu ị-kpa jẹ ẹla la giri-giri lala iloo ịlẹ kị ya gu ang pyịị. Ala ịịwa wuu tụ julawụlẹ ri ala ịlẹ ká Ohe Oluhye ọngọgbikpịlọ ọtụka hu ha.

¹²Ọnyị nyam ee, aa kpẹhị chịng ẹ-ẹga nya ang ịmẹjẹ ị-da ịwẹ u-uhye mẹ. Apwụ ịdada á la ọbaba ka. Ụpwụ ọwawa lụmẹ-lụmẹ tịị chị ịnyịrọ pyẹpyẹ.

¹³A tị́ wo ẹla myị ẹla-a wẹ lẹ, ẹla ookpokpo ohihi ọlẹ kam ka ya jung i-irya ri: Ju uhi nya Ohe Oluhye, ká kpa ehile nyamwụ, chajị ụkụrwọ ọlẹ ká angịnyị ka họ kẹnẹ-kẹnẹ a wẹ lẹlẹ.

¹⁴Ohe Oluhye ka la angịnyị eje u-uhye nya ang myị ang, tụ ang ịlẹ kị họ kpụ ịbaa, ịlẹ kị ri ịnyịịla lee ịtịpyọ.