Read idege ỌngọliryaỌngọ 2 Bible Online

ỌngọliryaỌngọ 2 - idege bible

ỌngọliryaỌngọ 2

¹M̀ byi ịlọm yẹkẹẹ, “Ma ụya ọyaya yẹ ká jẹ ang ọlẹ kọ ri wẹe.” Ọọwa, m ya ụya lẹlẹ. Ụya ọyaya ọọwa tị ri ang ododu ịnyịnyị.

²M̀ jẹ ká ẹhụ ọhụlọọ-hụlọ ri ang uchi. Ụya ọyaya-á tị kpụ ịngịhyẹ ha ọngịnyị ka.

³M̀ ya m ka kpa ere ọnwanwa ju ịlọm ẹjẹ tị̀ tị lẹ. M̀ maga kam ka jẹ̀ wu uchi ọchịchị ọyị ịnyịnyị. Irya nyam tị juwa kpam la ẹla ọjẹjẹ. M̀ me irya ká ọọwa ka họ kám ka jẹ ang ọlẹ kọ chịla ká angịnyị ehe ka họ lụka nya ọhịhị okpyii nyaa am odehe ọlẹ.

⁴M̀ kpa ụbwọ nya ịlọm họ ụkụrwọ ịtụka datị-datị. M̀ nwụ ebe lụmẹ-lụmẹ ha ịlọm. M̀ wu ẹrụ nya alakọnụ lụmẹ-lụmẹ.

⁵M̀ wu ẹrụ ọlam wu, m wu ịnya ekeji ị-nwụ egbe iriri datị-datị wu.

⁶M̀ wụ ẹmwụ nya enyi ịlẹ kị ka chị enyi bwu kpa ka ju ekeji ịịwa.

⁷M̀ la anyịhị alẹng bala anyịhị anyang ịlẹ kam rara bala ịlẹ kị mama ẹ-ẹpwa nyam. M̀ la ịna bala ịmwụ ju iru gụ ọngọkịla ọhẹ-lọhẹ kọ kụ e-epweji nya iJerusalẹm ene nyam.

⁸Ọ́ ba ọọwa ka, m tụ okpoko onyoowuru bala okpoko ịgọm bala ang ụdụ nya ịdịrịhụ bala ịnya alịpyị ịleẹ kị ji ekpeleji nyam wuu guru ha ịlọm. M̀ la anyang bala alẹng ịlẹ kịị mwu eje ham. M̀ la anyang ju iru pwụ ẹga ká ọlẹng ka tịtọ kaka ba myị ịnyịnyị.

⁹Ịnyịlẹhị ịnyị, m ri ọngọ ọtụka. M̀ lehe gụ ọng myị ọng ọlẹ kọ kụ i-iJerusalẹm ene nyam. Ẹla ọjẹjẹ nyam-ḿ tị gbu enyi ka.

¹⁰Ḿ nyi ịlọm ịngịngịhyẹ ọlẹ kọ mam ma ka, ḿ nyi ịlọm ụya ọyaya ka. Ụkụrwọ ịlẹ kam họ wuu kpụm ịpyọ, ịpyọ ọkpụkpụ ọwẹ a ri apyobwuna nya ụkụrwọ ọlẹ kam họ wuu lẹ.

¹¹Ọọwa, m wụla ụkụrwọ nya ụbwọ nyam wuu, bala ang ịlẹ kam kpa ọngịrị nyam wuu họ yẹ lẹlẹ. M̀ yẹ kọọwa wuu ri ododu bala ịbalo ọchịchị kpá chochoocho. Ang o-ju apyobwuna-á jam e-ekpeleji nya ẹnụ ka.

¹²Kpakpakpa lẹẹ, ịyẹ ọngọ ri adịrahụ onyeewe a tị́ ka jụ họ? Ọ́ ka jụ ịngịhyẹ họ gụ ọlẹ ká adịrahụ olene họ ka. Ọọwa, m jahị kpata juwa me irya ju ẹla ọjẹ́jẹ lẹlẹ. M̀ wụla ụla ọhyahya bala uchi ọchịchị yẹ.

¹³M̀ yẹ wẹ lẹ, ẹla ọjẹ́jẹ hagụ uchi ọchịchị jaabwọ ká ahịgboo hagụ ukpowu.

¹⁴Ọngọ jẹ ẹla kaa yẹ ẹga kọ wẹẹ jẹdịyẹ kà, oluchi tịị jẹdịyẹ ẹ-ẹpwụ nya ukpowu. Ma, ang ọlẹ kam jẹ lẹẹ ri: ẹbyị ọ-họ oluchi a kaa họ ọngọ jẹ ẹla lẹ.

¹⁵Ọọwa, m byi ịlọm yẹkẹẹ, “Ẹbyị ọ-họ oluchi juwa ka họm am ịnyịnyị. Lẹ, ịyẹ tị́ ri apyobwuna nya ẹla ọjẹ́jẹ nyam wuu mẹ?” Ọọwa, m wẹ ịlọm yẹkẹẹ, “Ẹla ọjẹ́jẹ ọwẹ wuu ri ododu ịnyịnyị.”

¹⁶Ị́ị kpịtịya nya ọngọ jẹ ẹla pyịyọọ ka. Ị kpịtịya nya oluchi pyịyọọ ka ịnyịnyị. Ụka kọ nọ chẹẹ, ị ka deeri nyaa wuu; ọngọ jẹ ẹla ka gbu jaabwọ ká oluchi-i gbu.

¹⁷M̀ dọmwụ nyọka yẹ ọhịhị lala uhwo nya ang, chajị ang myị ang ọlẹ kịị họ am odehe kpa ọjụjụ wẹ ẹpwụ nyam. Ang wuu ri ododu bala ịbalo ọchịchị kpá chochoocho.

¹⁸Ụkụrwọ ọnyọọngịrị ọlẹ kam họ bala ang ịlẹ kam la wuu lam lala ehwo nya ang. Ang odudu ri m wẹẹ ka pẹ hyaa wuu ha ọngọlẹ kọ ka ye iwe nyam hụ.

¹⁹Ọngọọwa-á ka ri ọngọ jẹ ẹla lee oluchi, ọngọhẹ-ẹ́ jẹjẹ ka. Tị yẹ mẹ, ọngọọwa a ka ri ugu nya ang myị ang ịlẹ kam kpa ọngịrị bala ẹla ọjẹ́jẹ nyam họ ụkụrwọ chajị nyaa wuu am odehe lẹ. Ó-ododu nya ẹla a wẹ ịnyịnyị ka-a?

²⁰M chị ijẹma chajị nya ụkụrwọ ọnyọọngịrị ọlẹ kam họ wuu am odehe.

²¹Chajị ọngịnyị ka kpa ẹla ọjẹ́jẹ bala ang ọjẹ́jẹ bala ijẹẹhị nyamwụ wuu họ ụkụrwọ chajị nya ang myị, ọ tị ka rụ hyọọ wụlẹlẹẹlẹ ha ọngọkịla ọlẹ kọ yẹ akama chajị nya ang ọọwa kpong-kpong ka. Ang ododu a wẹ ịnyịnyị lẹ. Ó pwoku kpong-kpong ka.

²²Apyobwuna oyina ọngịnyị ehe a tịị ye bwu ẹpwụ nya ụkụrwọ ọlẹ kọ nwụ ịlọmwụ họ bala irya ọlẹ kọọ me wuu am odehe-e?

²³Ọhịhị nyamwụ wuu myị la ang ịjụjụ. Ụkụrwọ nyamwụ ri imahị omeme kem. Odu-ú hihi, irya nyamwụ-ú mwụ ịnyọ ka. Ọwẹ wuu ri ododu ịnyịnyị.

²⁴Ang ọhagụ ọlẹ ká ọngịnyị ehe ka họ ri ọ-ka ri ang bala ọ-nwa ere bala ọ-ya ụya ju ụkụrwọ ọlẹ kọ họ. Ọọwa kpangga tị wẹ lẹ, m jẹ, ẹga-ẹga nya Ohe Oluhye ọ bwu lẹ.

²⁵Chajị ó-ri ọwa ka, oowo tị́ ka ye ang ri lee ọ-ya ụya myị?

²⁶Ohe Oluhye kaa ya ẹla ọjẹ́jẹ bala ang ọjẹ́jẹ bala ọkẹkẹnị ọchịchị ha ọngọlẹ kọ họ ẹla họọ. Ọ tị kaa kpa ọngọhọbịrị họ ụkụrwọ nya ang ọ-tụguru bala ang o-ju ụjị, kọ ka ye wụlẹlẹẹlẹ ha ọngọ họ ẹla họọ. Ọwẹ ri ododu ịnyịnyị bala ịbalo ọchịchị kpá chochoocho.