Read idege ỌngọliryaỌngọ 3 Bible Online

ỌngọliryaỌngọ 3 - idege bible

ỌngọliryaỌngọ 3

¹Ị hu ụka nya ang myị ang nọ. Ẹla myị ẹla ọlẹ kọọ họ am odehe la ụka nya ịlọmwụ.

²Ụka nya ọnyị ọmama ji, ụka nya igu ogbugbu ji ịnyịnyị; ụka nya ang ọtọtọ ji, ụka kị ka hu ang ịịwa ji ịnyịnyị.

³Ụka nyọka ta ọhịhị nya ang ayịreji ji, ụka nyọka chị ọhịhị da ji ịnyịnyị; ụka nya ang ọ-tụrụ beji kpalị-kpalị ji, ụka nya ang omeme ji ịnyịnyị.

⁴Ụka nya ida ojeje ji, ụka nya ẹhụ ọhụlọọ-hụlọ ji ịnyịnyị; ụka nya ida ọbaba ji, ụka nya ọkẹkẹnị ọchịchị ji ịnyịnyị.

⁵Ụka nyọka nyi ajwọ epepe ji, ụka nyọka taa guru ji ịnyịnyị; ụka nyọka wu awụlẹ bajẹ ji, ụka nyọka hịnyọ la ajẹ ọbaba ji ịnyịnyị.

⁶Ụka nyọka pịlahị nya ang ji, ụka nya ang obyibyi ji ịnyịnyị; ụka nyọka ya ang nọ a-ang kpịrẹ-kpịrẹ ji, ụka nyọka pẹhi ang daarụ ji ịnyịnyị.

⁷Ụka nyọka gu ang ene ji, ụka nya ang ọgága ji ịnyịnyị; ụka nya ujiji ọhụhụ ji, ụka nya ẹla oyaya ji ịnyịnyị.

⁸Ụka nya awụlẹ ọháha ji, ụka nya awụlẹ ọ-wụ ẹjẹ ji ịnyịnyị; ụka nya ẹwụ ọdada ji, ụka nya okpunyi ji ịnyịnyị.

⁹Apyobwuna ọlẹ ká ọlụkụrwọ ye bwu ẹpwụ nya ụkụrwọ ọnyọọngịrị nyamwụ ọlẹ kọ họ wuu a tị́ lee me?

¹⁰M̀ jẹ olo ọnyẹẹnyẹẹ ọlẹ ká Ohe Oluhye hu nịrọ angịnyị ehe kị ka kpa.

¹¹Ọ hu ụka nya ang myị ang wuu nọ kpẹẹkpẹẹ. Ọ họ ká ẹla nya ọhịhị olijuju ọjẹ́jẹ maahị ma. Ma, ahị́ tị jẹ ang ịlẹ ká Ohe Oluhye wẹẹ họ wuu hịlẹ-hịlẹ myị ka.

¹²M̀ jẹ ang ọhagụ ọlẹ ká angịnyị ka họ. Ọọwa ri ọ-ka chị ọkẹkẹnị bala ọ-họ ang ọnyịịla ọlẹ kị ka họ myị lụka nya ọhịhị nyaa.

¹³Ang ọkịla ri ọng myị ọng a ri ang bala ọ-nwa ere, kọ juwa ya ụya ju ang ọlẹ kọ ye bwu ẹpwụ nya ụkụrwọ nya ụbwọ nyamwụ mẹ. Ọọwa ri ang-ahị o-bwu ẹga nya Ohe Oluhye.

¹⁴M̀ jẹ ịnyịnyị ya ang myị ang ọlẹ ká Ohe Oluhye-é họ ka godayị rịrị gbe oyi myị oyi. Ị́ ka jẹ-ẹ ya ịngịhyẹ ha jwọọ kaka. Ị́ tị ka jẹ-ẹ gba ịngịngịhyẹ hyọọ kaka ịnyịnyị. Ọ họ ang ịwẹ wuu ịnyị chajị ká angịnyị ehe ka ju ihi nyamwụ.

¹⁵Ang ọlẹ kọ wẹẹ họ lẹẹlẹẹ họ ẹnẹhẹ lẹ, ang ọlẹ kọ ka họ ị-ịlahị họ ẹnẹhẹ ịnyịnyị lẹ; Ohe Oluhye họ ká ang olene-ene jam họ ma họ.

¹⁶Ang ọkịla ọlẹ kam yẹ am odehe a lẹẹ lẹ. Ẹga ká eje ọlala ọkpẹẹkpẹẹ chịla kọ ka ji, ụ-ụwa ọkwọ họhọ a dachichi ji lẹ. Ẹga ká ang ọnyịịla ọhọhọ chịla kọ ka ji, ụ-ụwa ang onyobyi ọhọhọ a dachichi ji lẹ.

¹⁷Ọọwa, m me irya ẹ-ẹpwụ nya ịlọm yẹkẹẹ, “Ohe Oluhye juwa ka la alabwẹla ọnyịịla bala alabwẹla onyobyi eje. Ang odudu ri ọwa ayịdang hu ụka nya ụkụrwọ ọnyị myị ọnyị bala ang myị ang ọlẹ ká ọngịnyị họ nọ.”

¹⁸Ọọwa, m ya ẹ-ẹpwụ ẹpwụ ya ma ịnya angịnyị ehe lẹ, Ohe Oluhye juwa maa ma yẹ. Ọ tịtọ kị ka jẹ ya ịwa nyị la ookpokpo bala iyo.

¹⁹Ẹbyị ọ-họ ọngịnyị ehe a kaa họ iyo lẹ. Jaabwọ ká ọngịnyị ehe kaa gbu, ịnyịnyị iyo a kaa gbu lẹ. Ịhụ ụma ookpokpo ị tị́-ị da lawụlẹ lẹ, ịnya ọngịnyị ehe-é hagụ ịnya iyo abwaabwọhẹ ka. Ang wuu ri ododu.

²⁰Ẹga ookpokpo ị juwa jẹ ka lawụlẹ lẹ. Ịpyị ị kpa haa ịwa imimiiye lẹ. Ụwa ị tị ka nya tịrẹkpẹ ka lẹ.

²¹Oowo tị́ jẹ myịmyị ó-ri ká olegu nya ọngịnyị-ị́ rụ ka uhye-ọgba bala ó-ri ká olegu nya iyo-ó kaa rụ ka ẹpwụ nya ịpyị-ị?

²²M̀ yẹ wẹ lẹ, ang ọhagụ ọlẹ ká ọngịnyị ehe ka họ ri ọ-ka chị ọkẹkẹnị ju ụkụrwọ nyamwụ, chajị ang ọlẹ kọ la kẹnẹ-kẹnẹ a wẹ lẹlẹ. Ụka kọ gbu kpá lẹ, ọngọngọhẹ-ẹ́ ka jẹ-ẹ kpọọ tịrẹkpẹ kaka yẹ ang ịlẹ kị ka họ kwọọ ẹkpẹ kaka.