Read idege ỌngọliryaỌngọ 4 Bible Online

ỌngọliryaỌngọ 4 - idege bible

ỌngọliryaỌngọ 4

¹Ụka kam me irya myịmyị, m yẹ ụma nya ọ-họ tù ọkịrọrọ ọlẹ wuu kị wẹẹ họ angịnyị am odehe: Angịlẹ kị họ tù ọkịrọrọ juwa jida, ị́ tị ye ọngọ ka daa ụbwọ ka, angị haa kịrọrọ kpa ọngịrị wuu ụ-ụbwọ; angịwẹ-ẹ́ tị ye ọngọ ka daa ụbwọ ka.

²M̀ ya ịnya angị gbu kpá wuu ene-ene hagụ ịnya angị jam lọhịhị tị̀ tị lẹ.

³Ma, ịnya ọngọ hagụ ịnya ang imimiiye ịwẹ ri ọngọlẹ kị ma wẹ odehe ọlẹ lẹka, ọngọlẹ kọ yẹ ang onyobyi ọlẹ kị lẹẹ họ am odehe ka.

⁴M̀ jẹ ịnyịnyị ang odudu ká ọngịnyị kaa họ ụkụrwọ lọngịrị nyamwụ wuu chajị kọ kịlahị. Ọọ lajị nya ijiiji nya ọngịnyị ehe ọọnamwụ ịnyị. Ọwẹ tị ri ododu ịnyịnyị. Ọ ri ịbalo ọchịchị kpá chochoocho.

⁵Oluchi go ata chawụlẹ ọna hụ chịng. Ọwa-à wụrụ imyi nwụ ịlọmwụ lẹ.

⁶Ang o-ye myị ụbwọ ookpokpo lokpunyi hagụ o-ye myị abwiye-abwiye lịnwụ ẹ-ẹngịrị ọlẹ kọ ri ịbalo ọchịchị.

⁷M̀ myịmyị yẹ ang ọkịla ọlẹ kọ ri ang ododu am odehe ọlẹ.

⁸Ọngọhẹ juwa kọ hụ ụbwọọmwụ-ụbwọọmwụ, ọ́ ma ọnyị ma ka, ọ́ la ọnyịnịna la ka, ọọ họ ụkụrwọ mwụ ịnyọ ka, ọ́ tị la ang nwa ịlọmwụ ka ịnyịnyị. Ọ́ọ lajị nya owo ọ tịị họ ụkụrwọ ọnyọọngịrị ọwẹ, juwa da ịlọmwụ ụya ọyaya yi ịnyị-ị? Ọwẹ wuu ri ang ododu ịnyịnyị; ụkụrwọ ọ-chị ọkịlẹtụ pyẹpyẹ a wẹ lẹ.

⁹Angịnyị angị imiiye ọ-bajẹ hagụ ọngọ ookpokpo, chajị ị ka jẹ-ẹ họ ụkụrwọ o-ju apyobwuna.

¹⁰Ó-ri ká ọngọhẹ nyaa á chị ụchụụ mileji, ọngọwụlẹ ka dọọ ụbwọ, wuloo eji. Ọngọ jẹ ụbwọọmwụ kọ tị ka eji la ahyẹẹrwẹrwa, ọ́ ka ye ọngọhẹ dọọ ụbwọ ka.

¹¹Ọ́ ba ọọwa ka angị imiiye-é ba nọnọ, ịnyịrọ-ọ chaa ịla gbigbiigbi, ọngọ ookpokpo-ó ka jẹ-ẹ la ịlọmwụ gbigbiigbi myị ka.

¹²Ị́ bá ẹla ta ọngọ ookpokpo, ị ka kụrwọọ myị, angị imiiye tị ka kụrụ ẹla ọọwa myị. Ochiri ọ-la apa ịta la ujwo la ọchịchị.

¹³Okolobya ọlẹbyahị ọlẹ kọ jẹ ẹla ju apyobwuna gụ adịrahụ okwirichi oluchi ọlẹ kọ myị ẹla ọmẹjẹ ka.

¹⁴Okolobya ọọwa ka kpehe bwu ube nya agba kaka ri adịrahụ myị. Ọ́ tị riri kị ma adịrahụ okwirichi ọọwa ugbiyegu nya ịdịrịchụ ọ-ọpyị ọọwa, ọ ka yẹ ka ri ọlẹbyahị myị.

¹⁵Ụka ká okolobya ọlẹ kọ ka ye iwe nya adịrahụ onyogo tị wẹ, m yẹ ká angịnyị wuu yẹ ju lọọ.

¹⁶Ị́ ka jẹ-ẹ wa angị myị ẹla jwọọ lẹẹlẹẹ wuu kpá myị ka. Ma, ụka ká ụka nyamwụ-ụ́ chịpwụrụ kpá, ọngọngọhẹ-ẹ́ ka kpịtịya nyamwụ kaka. Ọwẹ ri ododu ịnyịnyị. Ọ ri ibalo ọchịchị kpá chochoocho.