Read idege ỌngọliryaỌngọ 5 Bible Online

ỌngọliryaỌngọ 5 - idege bible

ỌngọliryaỌngọ 5

¹Kpa ahị ju ịlọng ụka ká juwa ka ube ịgọgọ nya Ohe Oluhye. O-kele ka ụwa ka ke ụrụ wo ang ọmẹjẹ hagụ ọ-ka kịla iya nya aluchị. Ịwa-á jẹ ang ọtịpyọ datị hi ang ọnyịịla ka.

²A chị agaga ju ẹla oyaya nyang ka, kụ irya yẹẹyẹẹ ọ-ọkịlẹtụ nyang ene nya ẹla ọlẹ ká wẹẹ ka ya ta Ohe Oluhye. Ohe Oluhye ayịdang juwa e-epwoohe, ahụ tị lẹẹ am odehe; lẹẹ lẹ, aa ya ẹla ba o-oyi.

³Jaabwọ ká imahị omeme lụmẹ kaa kpa alaa ịtịpyọ wẹ ọngịnyị, ịnyịnyị ẹla oyaya lụmẹ-lụmẹ a kaa họ ká ọngịnyị-ị̀ ya ẹla uchi lẹ.

⁴Ụka ká myị ọnụ ha Ohe Oluhye chajị nya ịngịhyẹ, aa họ ọnụ ọmyịmyị nyang ọọwa jịra ahyaahị. Ọ́ọ̀ chị ọkẹkẹnị ta aluchi ka. Aa họ ang ọlẹ ka myị ọnụ nyọka họhọ mẹ.

⁵Ọ-ka myị ọnụ ka lichi-lichi hagụ ọ-ka myị ọnụ, ká tị ka họọ jịra ka.

⁶A myị ká ẹla ọlọnụ nyang a kpang ka họ ang onyobyi ka. A byi ọlẹrụ olube ịgọgọ ya ọnụ ọlẹ kọọwa nyị myị nyị ri ịkịlọnụ koo. A họ ká Ohe Oluhye a wụ ẹjẹ tang, kọ ta ụkụrwọ ọlẹ ká họ wuu ayịreji ka.

⁷Iru nya alaa ịlala ka ji myị bala ala i-ya ju iru ka ji myị. Ang ododu ọhọhọ ka ji myị ịnyịnyị, mà, aa ju uhi nya Ohe Oluhye mẹ.

⁸A ka yẹ ẹ-ẹgẹhẹ jaabwọ kị juwa yẹ ọlẹbyahị ụhị juwa họọ ri kịrọrọ myị. Ọọwa a lang ahịbwuu koo. Olegbeju ọnyị myị ọnyị ji ekpeleji nya ọngịrị nya olegbeju ọlịlahị nyamwụ. Ịwa angị imimiiye tị myịmyị ji ekpeleji nya ọngịrị nya olegbeju ọlịlahị ọlẹ kọ gwaa wẹẹ.

⁹Ang-ẹrụ ọlọpyị ri nya alụma wuu. Adịrahụ lịlọmwụ ye apyobwuna bwu ọpyị ọọwa ịnyịnyị.

¹⁰Ọngọ họ la okpopo-o la nwa ịlọmwụ ka, ọngọ chị arịnya nya ụdụ ọkpụkpụ-ụ la apyobwuna nwa ịlọmwụ ka; ọwẹ wuu tị ri ang ododu.

¹¹Jaabwọ ká ọngịnyị-ị kpụ ụdụ lụmẹ ka ba, ịnyịnyị angị pyẹ ọnụ da gbe oriri a kaa ju iru lẹ. Ịyẹ tị ri apyobwuna nya ọngọ kpụ ụdụ ọọwa? Ẹhị ọ-kpa hi ọma nya ụdụ nyamwụ kẹnẹ-kẹnẹ ịnyị.

¹²Ọlụkụrwọ ka ye ang ri lee ọ́ ka ye ri gbuu ka myị, ọ tịị ye une ọlẹhị nọ lokpunyi; ang ọ-la lụmẹ-lụmẹ nya ọlụdụ á tị myị ọ nọ une ka.

¹³Ang ọtịpyọ ọkịla ọhẹ jam kam yẹ am odehe. Ọngịnyị tụ ụdụ nọ ang kpa inyiribyi wẹ ịlọmwụ,

¹⁴ang-ụdụ ọọwa ta ayịreji ju ọhị ọdada; ọọwa du kọ ye ịngịngịhyẹ nya ugu nọ gbe anyị nyamwụ ka.

¹⁵Ọngịnyị ehe jẹ lọhị-lọhị bwu ẹpwụ nya ịnamwụ wẹ odehe; jaabwọ kọ wẹ la abwabwọ, ịnyịnyị ọ ka rụ lẹ, ẹpwụ nya ụkụrwọ ịlẹ kọ họ wuu, ọ́ ka jẹ-ẹ kpa ịngịngịhyẹ ba ịlọmwụ rụ ka.

¹⁶Ang ọkịla ọlẹ ri ang ọtịpyọ ịnyịnyị: Jaabwọ kị ma ọngịnyị ehe wẹ odehe, ịnyịnyị-ịnyịnyị ọọ rụ lẹ; ịyẹ tị́ ri apyobwuna ọlẹ kọ ye bwu ẹpwụ nya ụkụrwọ nya ibalo ọchịchị nyamwụ?

¹⁷Lụka nya ọhịhị nyamwụ wuu, ọ ji ẹpwụ nya ukpowu bala ọjụjụ[4] bala imahị bala ẹdụrụ bala agbama.

¹⁸Ang ọhagụ bala opwoku ọlẹ kam jẹ ká ọngịnyị ehe ka họ ri ọ-ka ri ang bala ọ-nwa ere bala ọ-ya ụya ju ụkụrwọ ọlẹ kọ họ lụka nya ọhịhị okpyii ọlẹ ká Ohe Oluhye ya họọ am odehe. Chajị ang ọlẹ kọ la kẹnẹ-kẹnẹ a wẹ lẹlẹ.

¹⁹Ọ́ ba ọọwa ka, ọngọngọhẹ ká Ohe Oluhye-é ya ụdụ ọkpụkpụ bala ang ọlala ha, kọ tị ya ịwẹ da ha ọngọọwa nyọka ya ụya jwaa aalẹ, ọ ka myọọ lẹhị chajị, ang-ahị a wẹ ká Ohe Oluhye ya họọ lẹ.

²⁰Ọngịnyị ọlịịwẹ-ẹ́ me imahị ju ọhịhị okpyii nyamwụ lụmẹ ka chajị Ohe Oluhye họ ká ọkẹkẹnị myị ọkịlẹtụ nyamwụ.