Read idege ỌngọliryaỌngọ 6 Bible Online

ỌngọliryaỌngọ 6 - idege bible

ỌngọliryaỌngọ 6

¹M̀ yẹ ẹla ọtịpyọ ọhe ọlẹ kọ jam odehe. Ẹla ọọwa ji uhye-egbeju nya angịnyị ehe.

²Ọngọhẹ juwa ká Ohe Oluhye ka ya ụdụ ọkpụkpụ bala ang ọlala bala ihi ọlala ha. Ịngịngịhyẹ-ẹ́ kwọọ amwụ lẹpwụ nya ang ịlẹ kọ tịtọ ka. Ohe Oluhye-é tị ya iwe da họọ ọ ri ụdụ ọwa ka. Ọngga a dachichi go ụdụ ọọwa wuu ri lẹ. Ọwẹ wuu ri ang ododu. Uguru nya ẹla a wẹ lẹ.

³Ọngịnyị ka ma anyị ohu myị. Ọ tị ka ri ehe tata nya ịlẹhị-ịlẹhị myị ịnyịnyị. Ma, jaabwọ kọ hị tata ka ba, ó-ri kọ ye ọkẹkẹnị bwu ẹpwụ nya ang ọlala nyamwụ bala o-ye angịnyị jwoo eji lihi-ihi ka aalẹ, ịnya ogu-ọnyị ọlẹ kị pwọpwọ hagụ ịnyamwụ wẹẹ.

⁴Ọmama nya ogu-ọnyị ọọwa ri ang ododu. Ọ rụ ka ẹpwụ nya ukpowu. Ịnyị, ị deeri nyamwụ ahyaahị lẹlẹ.

⁵Ọ́ yẹ ahịgboo nya ẹnụ ẹ-ẹhị lee ọ-jẹ́ ịngịngịhyẹ chajị nya ọhịhị ka. Tị kpọkpọkpọ, ọ ye ịnyọ ọmwụmwụ gụ ọlụdụ ọlaanyị

⁶kọ la ọkẹkẹnị ka, ó-riri kọ ri ehe pwụ ẹka ụnọ imiiye. Kpakpakpa lẹ, ẹga ookpokpo ịwa angị imimiiye ịwẹ a tị́ juwa ka.

⁷Ụkụrwọ nya ọngịnyị ehe wuu ri ọ-họ kpa ka gba ọnụ ọ́ tị ye nwa ịlọmwụ kaka.

⁸Oyina nya ọngọ jẹ ẹla a tị́ ri ọhagụ ịnya oluchi? Ịyẹ tị́ ri apyobwuna nya ọlẹbyahị ọlẹ kọ jẹ kpahị ju ịlọmwụ ẹ-ẹpwụ nya ọhịhị?

⁹Ang ọlẹ ká la ji ụbwọ a nwang nwa hagụ irya ọ-kpa ma ang ma. Ọwẹ ri ang ododu ịnyịnyị, ọ ri ịbalo ọchịchị kpá chochoocho.

¹⁰Ang ịlẹ kị wẹẹ họ lẹẹlẹẹ ri ịlẹ kị hunọ ene-ene. Ọngịnyị ehe tị lẹ, ahị[5] jọọ ene-ene lẹ, ọ́ ka jẹ-ẹ bá ẹla ta ọngọlẹ kọ lọngịrị gwọọ ka.

¹¹Jaabwọ ká ọngịnyị ya ẹla ju iru ka ba, ịnyịnyị ehwo nya ala a kaa ju iru lẹ; ọọwa-á tị ju apyobwuna ha ọngọhẹ ka.

¹²Oowo tị́ jẹ ang ọlẹ kọ hagụ ha ọngịnyị ehe lụka nya ẹnụtụrụ ịmanyị-ịmanyị nya ọhịhị nyamwụ olodehe-e? Ọhịhị okpyii ododu nyamwụ ọlẹ kaa chịpwụrụ lala ụrụrụ. Oowo tị́ ka jẹ-ẹ bwuru ang ọlẹ kọ ka họ am odehe ụka kọọwa ayịdang gbu kpá?