Read idege ỌngọliryaỌngọ 7 Bible Online

ỌngọliryaỌngọ 7 - idege bible

ỌngọliryaỌngọ 7

¹Ẹnyị ọnyịịla hagụ ida ọnyịịla ochoru kwọkwọ ẹnụ nya igu ogbugbu nya ọngịnyị hagụ ẹnụ nya ọmama nyamwụ[6].

²Ẹpwa ọlẹ kị juwa bida há ọ-kaka gụ ẹpwa ọlẹ kị juwa ri ang nya ụya ọyaya, chajị igu ogbugbu a ri eju ọchịchị nya angịnyị wuu lẹ; angị ịhịhị wuu ka kpa ẹlẹwẹ i-irya.

³Ẹrwa ọyẹyẹ hagụ ẹhụ ọhụlọọ-hụlọ ayiiji ọbwọbwọ ka ya ọkẹkẹnị ha ọkịlẹtụ myị.

⁴Ọngọ jẹ ẹla kaa me irya nya igu, irya nya oluchi tịị jị ẹga nya ụya ọyaya kem.

⁵Ọngọ jẹ ẹla-á ya alibyi la ọngịnyị ọ hagụ oluchi ọ-mịla oja ha ọngịnyị.

⁶Ẹhụ nya oluchi lala anụ nya ejwo i-ila ọla iyegu. Ọwẹ tị ri ododu ịnyịnyị.

⁷Ọngịnyị ọ-họ ri du ká ọngọ jẹ ẹla ri oluchi; okpoko ochikiriju tị kaa chị abwẹla nya ọngịnyị ịrị.

⁸Eju ọchịchị nya ang hagụ ọmwụ ọdada nyamwụ; ọhụ ọ-da pịlẹ hagụ ọbọọchẹ ohihi.

⁹A ju agbama hyaa ka, aluchi agbama a kaa nọ ẹpwa ba lẹ.

¹⁰A tọ wo yẹkẹẹ, “Ịyẹ tị́ du ká ang há lụka nya oyi onyogo gụ ọlẹẹlẹẹ?” koo. Ọngọ jẹ ẹla-à tọ ịtọ ọlịịwe ka.

¹¹Ẹla ọjẹ́jẹ há lala ang-ugu; ịwa-a ri apyobwuna nya angị ịhịhị lẹ.

¹²Ẹla ọjẹ́jẹ-ẹ chẹwụ ke ọngịnyị jaabwọ ká okpoko kaa chẹwụ ke ọngịnyị; ẹla ọjẹ́jẹ tị hagụ, chajị ọọ gbe ọhịhị nya ọngọ lọọ la.

¹³Me irya ju ụkụrwọ ọlẹ ká Ohe Oluhye họ wẹẹ. Ang ọlẹ ká Ohe Oluhye-é ke ene lẹ, oowo tị́ ka jẹ-ẹ nịrọọ kpakpakpa myị?

¹⁴Ụka ká ang á há hang, aa chị ọkẹkẹnị, ụka ká akama-á ji, aa kpịtịya mẹ: Ohe Oluhye a họ ụka nya ang ọháha lẹ, ọwa-a tị họ ụka nya akama ịnyịnyị lẹ; chajị ká ọngịnyị ehe-é ka jẹ-ẹ jẹ ang chajị nya ọhịhị olijuju myị ka.

¹⁵Ẹ-ẹpwụ nya ọhịhị ododu nyam ọlẹ, m yẹ ang wuu. Ọlabwẹla ọnyịịla ka gbu myị, ọlabwẹla onyobyi tị ka hị tata.

¹⁶A họ ang ọnyịịla kpoye nya oyi ka, a tị jẹ ẹla kpoye nya oyi ka ịnyịnyị; a nwụ ịlọng ka.

¹⁷A họ ang onyobyi kpoye nya oyi ka, a tị chị uchi kpoye nya oyi ka ịnyịnyị, ó-ri ịnyị ka aalẹ, a ka gbu ene ká ụka nyang ka họ.

¹⁸Ang ọhagụ ri ọ-ka họ ọnyọnyị-ọnyọnyị meme labwọ. Ọngọlẹ kọ ju uhi nya Ohe Oluhye kà yụbwọ chị imimiiye ịwẹ meme labwọ.

¹⁹Ẹla ọjẹ́jẹ họ ká ọngọ jẹ ẹla-à la ọngịrị gụ alegbeju angị iwo ilepweji ookpokpo.

²⁰Ọlabwẹla ọnyịịla ọhẹ-lọhẹ-ẹ́ jam odehe kọọ họ ang ọnyịịla ụka wuu, la ọ-họ ọhọbịrị ụka ọhẹ-lọhẹ ka lẹ ka.

²¹A ke ụrụ nyọka wo ẹla myị ẹla ká angịnyị juwa ya koo, o-ri ịnyị ka, a ka wo kpa ẹnẹhẹ ká ọnchẹ nyang juwa kpang do wẹẹ.

²²Ahụ ayịdang tị́ kpịtịya, a do angịkịla ụka lụmẹ-lụmẹ ẹnẹhẹ lẹ.

²³M̀ kpa ẹla ọjẹ́jẹ nyam ma ang ịwẹ yẹ wuu. M̀ cheje nyọka jẹ ẹla, ọ tị kịlam kịla.

²⁴Ang odudu ká ang la jaabwọ kị la wẹ lujwo la ọ-jẹ́ ọmwụ nya ọọwa, ọmwụ nyamwụ la kpori-kpori kịla ọjẹ́jẹ nya ọngịnyị kịla.

²⁵M̀ ji irya nyam kpata nyọka jẹ bala ọ-ka wụlayẹ ang ọlẹ ká ẹla ọjẹ́jẹ ri, bala ọ-ka jẹ ọmwụ nya ang myị ang wuu. M̀ tịtọ nyọka jẹ jaabwọ ká ang onyobyi ọhọhọ ri ang uchi, bala jaabwọ ká uchi ochịchị lala ụla ọhyahya.

²⁶Ang ọle kam yẹ kọ la ujujwo gụ igu ri ọnyang. Ọwa ayịdang lala ụnya, ọháha ọlala nyamwụ lala ụgbọwụ abwọ nyamwụ lala agba. Ọlẹng ọlẹ kọ họ ẹla pwoku Ohe Oluhye ka be bwu ẹga nyamwụ, ọ tị ka wu ọngọhọbịrị mẹnẹ-mẹnẹ.

²⁷Ọngọlirya yẹkẹẹ, “Ang ọlẹ kam jẹ kẹnẹ-kẹnẹ a lẹẹ lẹ: M̀ wụla ang ọnyọnyọọnyị yẹ hwọọ nọ kam, chajị kam ka jẹ ọmwụ nya ang wuu.

²⁸Ụka kam juwa wụla ang yẹ ịnyịnyịịnyị, la ọ-jẹ́ ọdawụlẹ ka, m ye ọlẹng ookpokpo ọlẹ kọ la kpẹẹkpẹẹ bwu ẹpwụ nya angịnyị angị ụnọ; ḿ tị ye ọnyang ọlịnyị ọhẹ-lọhẹ ẹ-ẹpwụ nyaa ka.

²⁹Ang ọlẹ kam yẹ wuu lẹẹ ri Ohe Oluhye họ angịnyị ehe gbagbịla, iwa ayịdang tị họ ká ọhịhị nyaa la nyaanyaa lẹ.”