Read idege ỌngọliryaỌngọ 8 Bible Online

ỌngọliryaỌngọ 8 - idege bible

ỌngọliryaỌngọ 8

¹Ọngọngọhẹ-ẹ́ lala ọngọ jẹ ẹla kaka. Ọwa-a jẹ ọdawụlẹ nya ang lẹ. Ẹla ọjẹ́jẹ họ ká ọngịnyị-ị chị ọkẹkẹnị, ọ họ ká ayiiji-i myị.

²Họ jaabwọ ká adịrahụ ya mẹ.[7] A chị agaga myị ọnụ nya ịngịngịhyẹ ha Ohe Oluhye koo.

³Adịrahụ ka họ ang myị ang ọlẹ kọ họọ myị. Lẹẹlẹ, rụ hi ịlahị nyamwụ. A họ atịmẹ ẹ-ẹga ọ-la uhi-uhi ọlịịwe ka.

⁴Adịrahụ-ụ̀ kpa ọngịrị nya iwe-ahụrụ nyamwụ họ ẹla. Ọngọngọhẹ-ẹ́ ka tọọ wo yẹkẹẹ, “Ịyẹ ā tị́ wẹẹ họ ịịwẹ ịnyị?” myị kpong-kpong ka.

⁵Ọngọ kpa ehile nyamwụ-ụ́ ka ju ka ẹpwụ nya akama ka, ọngọ jẹ ẹla ka jẹ ụka bala ụgbẹyị ọlẹ kọ pwoku.

⁶Ụka bala ụgbẹyị opwoku ọ-kpa họ ang myị ang ji, akama oluhye nya ọngịnyị ehe tị hị ilo nịrọọ nmẹndẹẹ.

⁷Ọ́ dọmwụ jẹ ẹla ọlẹ kọ ka họ ijuju ka, ọngọngọhẹ-ẹ́ tị jẹ kpụ ọ ka ya joo ka.

⁸Ọngọngọhẹ-ẹ́ kpa ịhụ ọdada nya ịlọmwụ ụ-ụbwọ nya ọ-ka wọọ kpa myị ka, ọngọngọhẹ-ẹ́ tị ka jẹ-ẹ tụ ẹnụ nya igu nyamwụ nọ kịlahị myị ka. Ehe ọkpụkpụ hi ọgbẹwụ ọwẹ-ẹ́ ji ka, ang onyobyi ọhọhọ-ọ́ ka gba angị yụbwọ jwọọ kpehe myị ka.

⁹M̀ yẹ ang ịlẹ wuu ụka kam wụla ang myị ang ịlẹ kịị họ am odehe ọlẹ yẹ. Angịnyị kpa ọngịrị nyaa yẹ angịnyị ehe aanaa ilekpeleji nyaa ụhị.

¹⁰Ọ́ ba ọọwa ka, m yẹ kị kpa egu nya alabwẹla onyobyi kaka ju eji. Ụka kị juwa jẹ nya bwu iworu, ị dachichi mịla oja ha alabwẹla onyobyi ịwẹ e-epweji ọlẹ kpangga kị họ ang ịtịpyọ ịịwa. Ọwẹ tị ri ang ododu ịnyịnyị.

¹¹Ụka kị yẹ alabwẹla onyobyi akama iijata-ijata ka, angịkịla kaa kụ irya nyọka họ ang onyobyi ịnyịnyị.

¹²Ọngọhobịrị ka họ ang ọtịpyọ ugbabwọ ohu myị, ọ tị ka hị tata ịnyịnyị myị. M̀ tị jẹ kọ ka hagụ ha angị ju uhi nya Ohe Oluhye, kị juwa jwọọ ihi.

¹³Ma, m jẹ ọ́ ka há ha alabwẹla onyobyi ka chajị í ju Ohe Oluhye ihi ka. Ọhịhị nyaa ka myị ahyaahị lala ụrụrụ.

¹⁴Ang ododu ọkịla ọhẹ ọlẹ kọọ họ am odehe a lẹẹ lẹ: Ụka ọhẹ alabwẹla ọnyịịla ye akama ọlẹ kọ ri nya alabwẹla onyobyi yẹ. Alabwẹla onyobyi dachichi ye uri ọlẹ kọ ri nya alabwẹla ọnyịịla la. M̀ ya ẹlẹwẹ ri ang ododu.

¹⁵Lẹẹlẹ, m che ba ụya ọyaya ju ọhịhị. Ang ọkpịpyọ ọlẹ ká ọngịnyị ehe ka họ am odehe ọlẹ ri ọ-ka ri ang bala ọ-nwa ere bala ọ-ya ụya ju ịlọmwụ. Ọkẹkẹnị ọọwa ka dọọ ụbwọ ẹ-ẹpwụ nya ụkụrwọ nyamwụ lụka nya ọhịhị ọlẹ ká Ohe Oluhye ya họọ am odehe ọlẹ.

¹⁶M̀ maga nyọka jẹ ẹla, kam ka jẹ ụkụrwọ ọnyị myị ọnyị ọlẹ ká angịnyị ehe lẹẹ họ am odehe lodu bala alẹnụ la ọ-kpa une kẹhị ka.

¹⁷M̀ yẹ ụkụrwọ ọlẹ ká Ohẹ Oluhye họ wuu. Ọngịnyị ehe-é ka jẹ-ẹ jẹ ọdawụlẹ nya ụkụrwọ nyamwụ myị ka. Jaabwọ myị abwọ kị maga ka ba, ị́ ka jọọ myị ka. Ó-riri ká angị jẹ ẹla-á byi ịlaa ya ịwa nyị jẹ aalẹ, ị́ jẹ ka.