Read idege ỌngọliryaỌngọ 9 Bible Online

ỌngọliryaỌngọ 9 - idege bible

ỌngọliryaỌngọ 9

¹M̀ kụ irya ju ẹlẹwẹ juwa wụlọọ yẹ wuu. M̀ jẹ ya alabwẹla ọnyịịla bala angị jẹ ẹla wuu tụ ang ịlẹ kịịwa ayịdang kaa họ ji ekpeleji nya ọngịrị nya Ohe Oluhye. Ohe Oluhye à jẹ ó-ri kị ka ye oháha lee ẹtẹ ọbaba bwu ẹga nyamwụ lẹ. Ẹ-ẹga nya angịnyị ẹhẹ lẹ, ang wuu ri ododu,

²chajị eju ọchịchị nya ohịhị nya angịnyị wuu la abwụma ookpokpo— Angị ri alabwẹla ọnyịịla tụ alabwẹla onyobyi, angị ri angịnyị ịnyịịla tụ angịtịpyọ; angị la cheri-cheri tụ angị ji la ibyi angị kaa kịla iya tụ angị kaa kịla ka— Jaabwọ kọ la ẹ-ẹga nya angịnyị ịnyịịla, ịnyịnyị ọ la ẹ-ẹga nya angịhọbịrị lẹ jaabwọ kọ la ẹ-ẹga nya angị kaa nwa iro, ịnyịnyị ọ la ẹ-ẹga nya angị-ị nwa iro ka lẹ.

³Ang ọtịpyọ ẹ-ẹpwụ nya ang ịlẹ kịị họ am odehe ọlẹ a lẹẹ lẹ. Ẹbyị ụma ookpokpo a kaa họ ọng myị ọng lẹ. Ọ́ ba ọọwa ka, ọkịlẹtụ nya angịnyị ehe myị la irya nya ang onyobyi ọhọhọ bala ụla ọhyahya lụka nya ọhịhị nyaa. Ụka ohyẹẹkpẹ lẹ, ịị gbu lẹlẹ.

⁴Ma, ọngọlẹ kọ jam odehe lọhịhị la ẹhị ọrịrị-ị rịrị wẹẹ. Ebwu ọlahị-lahị tị́ hagụ akịrakpa nya ugẹbẹ.

⁵Angị juwa lọhịhị jẹ ịwa nyị ka gbu ẹnẹhẹ wẹẹ, egu-ú tị jẹ ịngịngịhyẹ ka; ị́ la uri oyeye ị-ịlahị kaka, angịnyị ehe-é kpịtịya nyaa kaka.

⁶Ọháha ọlala bala ẹtẹ ọbaba bala ijiiji ọyẹyẹ nyaa myị gbalẹ-gbalẹ lẹ; ị́ ka la ụbwọ ẹ-ẹpwụ nya ịngịngịhyẹ ọhọhọ am odehe ọlẹ ẹnẹnẹhẹ kaka.

⁷Kịnyaa ká ri ang oriri nyang, ká ya ụya jwọọ. Nwa ere nyang lọkẹkẹnị ịnyịnyị mẹ. Ohe Oluhye myị ọnụ nya ọọwa hang ene-ene lẹ.

⁸Aa kụrụ ang icheri-cheri, kpa ịlọng ká há ẹhị ụka wuu.

⁹Aa ya ụya ju ọhịhị ta ahụ[8] nyang ọ-hang há lụka nya ọhịhị ododu ọlẹ ká Ohe Oluhye ya hang am odehe mẹ. Ya ụya la ẹnụtụrụ ịịwa wuu mẹ, chajị ọwa-à ri ang ọlẹ ká la ẹ-ẹpwụ nya ọhịhị ọlẹ bala ang o-bwu ẹpwụ nya ụkụrwọ nyang am odehe ọlẹ lẹlẹ.

¹⁰Ụkụrwọ ọnyị myị ọnyị ká la nya ọhọhọ lẹ, a họọ la ọngịrị nyang wuu mẹ. Họọ yẹẹyẹẹ mẹ, chajị ụkụrwọ ọhọhọ lee irya omeme lee ang ọjẹ́jẹ lee ẹla ọjẹ́jẹ-ẹ́ ji ejegu, ẹga ká wẹẹ jẹ ka kaka.

¹¹M̀ yẹ ang ịkịla ám odehe ịnyịnyị. Ọ́-ọngọ la ata-ịmịla à kaa kụrụ ụ-ụnyẹ pyiipyii ka, ọ́-ọngọ ju ugbodu à kaa kụrụ ẹ-ẹwụ pyiipyii ka; ọ́-ọngọ jẹ ẹla-à kaa ye ang ri pyiipyii ka, ọ́-ọngọ chahị nyànya nya ang à kaa kpụ ụdụ pyiipyii ka; ọ́-ọngọ jẹ họ ang ịị mịla oja ha pyiipyii ka. Ụka nya ụrụrụ ọbyịbyị bala ụrụrụ ọháha kaa ji ha ọng myị ọng wuu.

¹²Ọngọngọhẹ-ẹ́ jẹ ụka ká ịnyamwụ ka pwụ eji ka. Jaabwọ ká ụgbọwụ kaa wu iyenyi, lee jaabwọ ká ori kaa wu ọchịnụ; ịnyịnyị-ịnyịnyị ụka nya akama a kaa kpụ ba angịnyị ehe birẹm, ụka kị kpahị ju ka lẹ.

¹³M̀ ye ang-ẹjẹẹ ọkịla oluhye nya ẹla ọjẹ́jẹ am odehe. Ang ọọwa la etu ọtụka-ọtụka ham.

¹⁴Epweji ochiche ọhe juwa ká angị kụ ụwa-á ju iru ka. Adịrahụ ọlọngịrị ọhẹ warị kaka dẹwụ tọọ. Ọ ya angị dẹwụ nyamwụ kụ dagaga ju epweji ọwẹ kị ka be egwalọ nyamwụ ene.

¹⁵Ọlẹbyahị ọlẹng ọhẹ ọlẹ kọ jẹ ẹla tị kụ epweji ọwẹ. Ọ kpa ẹla ọjẹ́jẹ nyamwụ chị epweji ọọwa da. Ma, ọngọngọhẹ-ẹ́ tị kpịtịya nya ọlẹng ọwẹ ụka ohyẹẹkpẹ ka.

¹⁶Tị kpọkpọkpọ, m ya ẹla ọjẹ́jẹ hagụ ọngịrị nya abwẹga. Ma, ị tị nyẹẹkpẹ da ẹla ọjẹ́jẹ nya ọlẹng ọlaanyị, la ọ-myị ke ụrụ la ẹla oyaya nyamwụ ka.

¹⁷Ẹla ọdụmwọ nya ọngọ jẹ ẹla há owowo gụ, ịkata ọkpụkpụ nya adịrahụ ọ-ọjịra-jịra nya aluchi.

¹⁸Ẹla ọjẹ́jẹ ju apyobwuna gụ ang-abwọ nya ẹwụ, ọngọhọbịrị ookpokpo ka bịrị ang ịnyịịla lụmẹ-lụmẹ myị.