Read idege EJE Ọ-GỤ EJE 1 Bible Online

EJE Ọ-GỤ EJE 1 - idege bible

EJE Ọ-GỤ EJE 1

¹Eje ọhagụ Ije wuu nya ISolomọn. Ọnyang yẹkẹẹ:

²Aa kẹwẹ ká jum ọnụ wẹẹ— chajị ọháha ọlala nyang la gẹnẹ-gẹnẹ gụ ere.

³Ida ochoru kwọkwọ nyang da oru ọ-kpụ ịpyọ; ẹnyị nyang ru ohi lala ida ochoru kwọkwọ a da oru. Ịnọọ, ịnyị a du ká wụ ịyẹẹnọ lụmẹ lẹ!

⁴Kpam rụ ba ịlọng lagaga mẹ! Ẹhẹ, adịrahụ kpam pwụ ube nyamwụ lẹ. Ahị ka chị ọkẹkẹnị ju ọháha ọlala nyang lụmẹ-lụmẹ; ahị ka mịla oja nya ọháha ọlala nyang gụ ere. A háa kpakpa ịnyịlẹhị!

⁵Anyị anyang nya ala iJerusalẹm ee! M la obiri, tị kpọkpọkpọ, m rụ ịyang; ịnyịrọ nyam chu lala ebe nya ọdụ ịla ịKẹdaa, m rụ ịyang nwuro-nwuro lala ịpwụ i-ke ẹpwa iSolomọn.

⁶Anụ gbẹhị dam teee ajị nya obiri ọlala nyam koo, chajị ẹnụ ọ-chịm chị a du lẹ. Anyịnam alẹng wụ ẹjẹ tam; ọọwa, ị ya ụkụrwọ nya ẹhị ọ-kpa rịrị ẹrụ nya alakọnụ jum ụ-ụbwọ lagbụrụ lẹ. M dachichi yụbwọ la ịnya ịlọm ọkpẹhị rịrị beji lẹlẹ.

⁷Ya jem wẹẹ, ọngọ ham há, ale a tịị kpa ịkpịlọ nyang ri amẹ? Ale a tịị yaa mwụ ịnyọ lụka ọchịpwuu nya ẹnụ? Ya, kam jẹ kpakpa, ká aliko nyang a yẹm ẹ-ẹga nya ịkpịlọ nyaa lala ọnyang ọlụchị ka. Ọlẹng yẹkẹẹ:

⁸Ọlụ́hị ọ-gụ anyang ee, á jẹ ka aalẹ, tụ ọgụ-achụ nya ịkpịlọ da juwa kpa ịmwụ nyang ri ang ọ-ọnụ nya adaa nya angịgbikpịlọ mẹ.

⁹Oligu nyam, ụ́hị nyang me ịnya ụnyịrẹ ọ-kpa ang ọrụnyẹ nya iFero adịrahụ.

¹⁰Ama nyang la ịjang-ịjang ịlụwa kpụ ịpyọ la ọyẹyẹ; ang idoomyi iligbiido nyang chịlang lụmẹ.

¹¹Ahị ka họ ịjang nya okpoko ịgọm hang; ị ka kpa okpoko onyoowuru chọọ ịna. Ọnyang yẹkẹẹ:

¹²Ụka ká adịrahụ juwa hụhụ a-ang ọhụhụ nyamwụ ida ochoru kwọkwọ nyam da oru pẹẹ yịrị ẹga myị ẹga.

¹³Oligu nyam chịm oru kwọkwọ lala ịbang nya ida ịmaa; ọlẹ kọ pịlẹm o-ọkịlẹtụ.

¹⁴Oligu nyam hám lala eju nya egbeju idehe nya ịhẹna, ịlẹ kị juwa ẹ-ẹrụ nya ekeji ịla Enggedi. Ọlẹng yẹkẹẹ:

¹⁵Oligu nyam ee, a chakpa há ụ́hị! Ẹnwa nyam, a há ụhị lụmẹ! Ahị nyang lala enewulo. Ọnyang yẹkẹẹ:

¹⁶A tịtị rụ okolobya lụmẹ, oligu nyam; a jum ẹ-ẹhị lụmẹ! Ẹga ọ-mwịịnyọ nyahị lala okoji ọhịhị. Ọlẹng yẹkẹẹ:

¹⁷Ekeji nya isida ị-kpa da igbilo nya ube nyahị lẹ; akịnawụ nyahị tị ri ekeji nya ịsayịpịrẹsị. Ọnyang yẹkẹẹ: