Read idege EJE Ọ-GỤ EJE 2 Bible Online

EJE Ọ-GỤ EJE 2 - idege bible

EJE Ọ-GỤ EJE 2

¹Am a ri òdodó ọla ịCharọn lẹ; am ókòkó ọlọkpọọ ịnyị. Ọlẹng yẹkẹẹ:

²Jaabwọ ka ókòkó datị hi ejwo; ịnyịnyị-ịnyịnyị oligu nyam a datị hi ịyẹẹnọ ịkịla wuu lẹ. Ọnyang yẹkẹẹ:

³Jaabwọ ká ọmwụ nya ụwẹ datị hi ekeji ịlọnụ inu ịkịla, ịnyịnyị-ịnyịnyị oligu nyam a datị hi ikolobya ịkịla wuu lẹ. Ụrụrụ nyamwụ kpụm ịpyọ la ọhụhụ; ugbe nyamwụ lam ịpyọ gẹnẹ-gẹnẹ.

⁴Ọ kpam ka ẹpwang nya ụya ọyaya nyamwụ lẹ ọ ya ụgbàńg nya ọháha nyamwụ kpụ kem̄.

⁵Kpam la ang oriri nya akama nya alakọnụ, ya egbe nya ụwẹ ham ri kam la gogo; chajị imyi nyang nwụm lụmẹ.

⁶Ọ ya ụpụpịla dom ikiloyi, ọ kpa upwuriri wum ju ẹjẹ.

⁷Anụ anyị anyang nya ala iJerusalẹm ee! Anụ myị ọnụ ham mẹ: jaabwọ ká apyị bala abya-á kaa ju ugbodu ka wẹẹ, ānụ chị agaga du ila nya ọháha ju ka gbee ká ụka nyamwụ ka pwụ. Ọnyang yẹkẹẹ

⁸Ba wẹẹ! Oligu nyam ịnyị! Ẹhẹẹ, yọọ kọ lalẹẹ jẹ warị ọ juwa gbaji kpoye nya ịgbọdọ, juwa chị ajị chirom wule ikiti.

⁹Oligu nyam la ịmịla lala apyị bala ẹrwa. Ọwa-à dodo godayị lalẹ ọ-ọkpọọka, lalẹẹ yẹhị bwu iwindo lẹlẹ; ọ juwa kụ ẹhị kpẹẹ bwu iwa nya iwindo.

¹⁰Oligu nyam ya ẹla tam byim yẹkẹẹ, “Kẹwẹ, oligu nyam; kẹwẹ, ká bam rụ mẹ, ọlụhị ọnyang nyam.

¹¹Á yẹ wẹ ka-á? Ụka nya alụhyọọ chịpwụrụ lẹ; enyi ododo tị kpụba kam lẹ.

¹²Ekeji juwa gu apwụ lẹ, ụka nya eje omwumwu a lẹẹ lẹlẹ, ikirikede jam họ ọ-ọpyị nyahị lẹ.

¹³Okiledu juwa chị egbe, apwụ igugu nya alakọnụ juwa choru kwọkwọ. Kẹwẹ oligu nyam, kẹwẹ, ká bam rụ mẹ, ọlụhị ọnyang nyam.” Ọlẹng yẹkẹẹ

¹⁴Enewulo nyam ọlẹ kọọ kpịbaa apewa nya ajwọ, ụ-ụwa ịkịka nya ịgbọdọ. Kẹwẹ kam yẹ ahị nyang wẹẹ, kam wo omyi-ẹla nyang chẹẹ wẹẹ; chajị omyi-ẹla nyang kpụ ịpyọ, ahị nyang tị kpunyi ịnyịnyị.

¹⁵Aa wu ágba nya itenyi-ogbo ịlẹ kị wẹẹ bịrị alakọnụ wẹ hahị mẹ; chajị alakọnụ juwa kpa apwụ gu lẹ. Ọnyang yẹkẹẹ

¹⁶Oligu nyam ri ịnyam ri, am ri nyamwụ ri; ọ juwa kpa ịkpịlọ nyamwụ ri tụ ẹpwụ nya ikoko da.

¹⁷Oligu nyam ee! Ụka ká obyi ka hi, ká ka jẹ-ẹ yẹ ụrụrụ nya ịlọng kaka; aa nya lagaga, la ịmịla lala apyị bala ẹrwa bwu uhye nya ịgbọdọ ịkụcha-kụcha ịwẹ mẹ.