Read idege EJE Ọ-GỤ EJE 3 Bible Online

EJE Ọ-GỤ EJE 3 - idege bible

EJE Ọ-GỤ EJE 3

¹Ẹ-ẹpwụ nya alaa, ịlẹ kam kaa la lodu ịnyịnyịịnyị. M kaa ga tịtọ nya ọngọlẹ ká ọkịlẹtụ nyam wu iwoo nyamwụ; m teleko nyamwụ gbee, ḿ tị yọọ ka.

²Ọọwa, m cheje nyọka dọmwụ nya ọ-pịlahị nyamwụ tụ epweji epweji da lẹlẹ. M tụ opeje bala ojiya wuu da juwa pịlahị nya ọngọlẹ ká ọkịlẹtụ nyam wu iwoo nyamwụ. Ịnyị, m teleko nyamwụ gbee lẹ, m tị yọọ kaka lẹlẹ.

³Angị gbeji yẹm ụka kị juwa tụ gaa wụla epweji yẹ. M taa wo, “Anụ yẹ ọngọlẹ ká ọkịlẹtụ nyam wu iwoo nyamwụ wẹẹ?”

⁴Ahyaahị kam yegiri bwu ụwa, m meme lọọ kem. M woo kirikpa; ḿ myị pẹ hyoo, ọ rụ ka gbee kam kpọọ ka ya ẹta chị ẹpwa nya ịnam. M kpọọ pwụ ube nya ịnam ọmam ma pẹtẹẹ.

⁵Anụ anyị anyang nya ala iJerusalẹm ee! anụ myị ọnụ ham mẹ: jaabwọ ká apyị bala abya-á kaa ju ugbodu ka wee, anụ chị agaga du ila nya ọháha ju ka gbee ká ụka nyamwụ ka pwụ.

⁶Oowo a tị́ lalẹẹ jẹ warị bwu ugbileji ọchọrụ lala ịmwụ-ila ọlẹ kọ ju oru ọkwọkwọ nya ịmaa bala ịfụrangkinsẹnsị? Oru nyamwụ me ịnya ang ọlẹ kị kpa ida ichoru kwọkwọ nya alọhị họ.

⁷Ẹchị ọhụhụ nya iSolomọn ị lalẹẹ kpa warị lẹ; angịdẹwụ angị iwo ịrwọnyẹ (60) juwa kpọọ chị; angịdẹwụ ịlahịchịng nya ala Isirẹlụ ịnyị.

⁸Ịwa wuu kpa oge nyaa, ị ri ọnggwọ nya ẹwụ ọdada, ọngọngọọng nyaa ya oge chọhụ; ị chuko nya ang oluhi uhi nya odu ọhẹ-lọhẹ ka.

⁹Ekeji ịnyịịla ịla iLibanọn ị kpa họ ẹchị ọhụhụ nya iSolomọn Adịrahụ jaabwọ kọ tịtọ lẹ.

¹⁰Ị kpa okpoko onyoowuru họ igbilo nyamwụ, ị kpa okpoko ịgọm họ ẹga ọ-kpa ẹkpẹ nịrọ nyamwụ. Ị kpa apwụ ọnyọmịla gbuu họ ẹga ọhụhụ nyamwụ. Anyị anyang nya ala iJerusalẹm nụ apwụ dọọ ẹ-ẹpwụ bwula ọháha ọlala nyaa.

¹¹Anyị anyang nya ala ịSayọn, anụ kpehe warị ka yẹ Adịrahụ iSolomọn. Ọ kụrụ okpo-adịrahụ; okpo-adịrahụ ọlẹ ká ịnamwụ ya kụrwọọ ẹnụ nya ahụ oyeye nyamwụ, ẹnụtụrụ nya ọkẹkẹnị ọchịchị nyamwụ. Ọlẹng yẹkẹẹ: