Read idege EJE Ọ-GỤ EJE 4 Bible Online

EJE Ọ-GỤ EJE 4 - idege bible

EJE Ọ-GỤ EJE 4

¹Oligu nyam ee, a chakpa há ụhị! Ẹnwa nyam, a há ụhị lụmẹ! bwu ẹpwụ nya apwụ o-ke ahị nyang, m yẹ ká ahị nyang á chị ebe ka. Inyi nyang lala ịmwụ a ya ogu da awụlẹ hyọọ juwa jẹ hireji bwu Ọgbọdọ nya iGiliyadị.

²Angịrị nyang pwo hụratata lala ịkpịlọ ịlẹ kị pwọ egbii ịnịịnọ, kị juwa jẹ nyà olenyi ohyohyo. Ọnyọnyọọnyị ju ogu ta ọọnamwụ; ọhẹ-lọhẹ nyaa-á la ụbwọọmwụ ka.

³Egbinụ nyang wọ nyẹrị-nyẹrị lala owu ọnyọmịla; ọnụ nyang a jẹ haha wẹẹ lẹ. Bwu ẹpwụ nya apwụ o-ke ahị nyang abaa nyang pwo me ene imiiye nya ugbe nya okoji ipomegiraneti.

⁴Ido nyang la tenee lala ube-oluhye nya iDevidi ọ-ya ang-abwọ nya ẹwụ guru; Ị ya iru nya ọkụmada pịlọọ dadaada, ọkụmada ịịwa ri nya angịdẹwụ.

⁵Egbamẹ nyang lala anyị imiiye nya apyị, ị me anyewa nya apyị; ịlẹ kị juwa ga ri amẹ tụ ẹpwụ nya ikoko ikoko da.

⁶Gbee ká obyi ka hi ká ka jẹ-ẹ yẹ ụrụrụ nya ịlọng kaka. M ka kpụ uhye kele ka ọgbọdọ nya ịmaa m ka wule kele ka ikiti nya ịfụrangkinsẹnsị.

⁷Ọlụhị ọgụgụ wuu a ri lẹ, oligu nyam, á chị ebe ọhẹ-lọhẹ ka.

⁸Bam rụ bwu iLibanọn mẹ, ahụ nyam, bam rụ bwu iLibanọn mẹ. Hireji bwu uhye nya Ọgbọdọ nya Amana, bala bwu ẹpwayịrẹtẹ nya ịSẹnii ọlẹ kọ ri achinege nya Ọgbọdọ ịHẹmọn, bwu uku nya egabẹ bala bwu ẹga ká iwe nya ijwo ji u-uhye ọgbọdọ.

⁹Bwula ẹhị ọ-chị yẹng ẹ-ẹhị kem bala ọ-yẹ ịjang odoomyi nyang, a chịm kilomyi lẹ, ọọnam ọnyang, ahụ nyam, a chịm kilomyi.

¹⁰Ọọnam ọnyang, ahụ nyam, ọháha ọlala nyang kpụ ịpyọ lụmẹ! Ọháha ọlala nyang la gẹnẹ-gẹnẹ gụ ere! Oru ọkpịpyọ nya ida nyang hagụ ida ichoru kwọkwọ ịkịla wuu!

¹¹Ẹla o-bwu ọnụ nyang lala inwa bala enyi-ẹmẹ nya ẹna bala inwa ji ẹlẹlẹ nyang. Ang ịkụrụ-kụrụ nyang choru kwọkwọ lala oru nya iLibanọn.

¹²A lala iku ọlẹ kị da ọnang o-bwu kele chị, ọọnam ọnyang, ahụ nyam; a ri ụgbụ nya enyi ọlẹ kị da chị, a ri ẹmwụ-enyi ọlẹ kị ya ang kụrụ.

¹³A ri ẹrụ nya ekeji ipomegranet ị nwụ egbe ịnyịịla-ịnyịịla loru kwọkwọọkwọ lala ịhẹna bala ịnaadị

¹⁴bala ịnaadị bala ịsafrọn, bala ịkalamọs bala isinamọn, tụ ụma nya ekeji ichoru kwọkwọ ọnyị myị ọnyị wuu, tu ịmaa bala alo bala etiji bala ida ichoru kwọkwọ ịlẹ kị hagụ wuu.

¹⁵A ri ẹmwụ-enyi ọlẹpwụ nya ẹrụ ọlẹ kọ juwa mwụ ụka wuu. Ọ juwa mwụ bwu ịgbọdọ nya iLibanọn. Ọnyang yẹkẹẹ:

¹⁶Igbachịwụ o-bwu ẹtẹ, nyi mẹ oo, igbachịwụ o-bwu edii, nyị warị ịnyịnyị! Anụ nyi wẹ ẹpwụ nya ẹrụ nyam ká oru ọchịchị nyamwụ a pyẹ maa. Oligu nyam a kẹwẹ wẹ ẹpwụ nya ẹrụ nyamwụ, kọ kpa egbe nya ekeji ịnyịịla ịlụwa ka ọnụ mẹ.