Read idege EJE Ọ-GỤ EJE 5 Bible Online

EJE Ọ-GỤ EJE 5 - idege bible

EJE Ọ-GỤ EJE 5

¹Ọlẹng yẹkẹẹ: M wẹ ẹpwụ nya ẹrụ nyam lẹ, ọọnam ọnyang, ahụ nyam. M hya ịmaa bala egbe nya ekeji ichoru kwọkwọ nyam lẹ. M pyị inwa kwẹẹẹ bwu ẹbẹ nya inwa nyam nẹ lẹ, m tị nwa ere bala enyi-ẹmẹ nya ẹna nyam lẹ. Aligu, anụ kẹwẹ ka ri ang bala ọnwanwa mẹ! Anụ nwa ọháha ọlala gbee kanụ ka wụ ẹpwụ mẹ oo, aligu. Ọnyang yẹkẹẹ:

²M juwa kpa une nọ, irya nyam á tị mwụ ịnyọ ka. Ụ-ụlaa m wo oligu nyam kọ juwa ya. Ụbwọ kpụ ụgbẹyị, juwa byim yẹkẹẹ: Ọọnam ọnyang, oligu nyam, wụrụ ụgbẹyị ham mẹ; wo lam enewulo nyam, oroohu charị nyam. Egbeju nyam nyiri dọyị ọọ-la ohu; inyi nyam kpụ chwẹẹchwẹẹ la amwụ-odu.

³M ji la utoohu utoohu lẹ; anyị tị́ kam ka myịmyị-ị̀ hu ang kụrụ mẹ? M hụ ata cheri-cheri lẹ; m ka myịmyị-ị̀ kpa ba ịpyị wẹẹ?

⁴Oligu nyam dụrụ ụbwọ bwu iwa nya ukpileku ugbodu gum ene kpịra ọọ lajị nyamwụ.

⁵Ịnyị, m takịlata wuleji nyọka wụrụ ụgbẹyị ha oligu nyam lẹlẹ. abwọ nyam tị rị ida ịmaa wuu, ị juwa nya dịrẹm a-akachụ totooto ụka kam yụbwọ chị ukpileku nyọka wụrwọọ.

⁶M wụrụ ụgbẹyị ha oligu nyam, ọ tị yegiri rụ ene lẹ; irya nyam rụ hwahị ụka kam wo omi nyamwụ. M pịlahị nyamwụ, ḿ tị yọọ myị ka, m be ẹkọ wụrwọọ, ḿ tị wo ọwẹwẹ ka.

⁷Angịgbeji yẹm ụka kị juwa tụ gaa wụla epweji yẹ. Ị wum nyi kpuukpuu; ị gum igo angị gbe egwalọ ịwẹ num awụrụ oluhye nyam kpa rụ.

⁸Anụ anyị anyang nya ala iJerusalẹm ee! anụ myị ọnụ ham mẹ: ó-ri kanụ yẹ oligu nyam, anụ byoo yẹkẹẹ: Imyi nyamwụ nwụm lụmẹ. Aligu yẹkẹẹ:

⁹Ọlụ́hị ọ-gụ anyang ee! Anyị oligu nyang a tị́ hagụ angịkịla ka ba? Anyị ọ tị́ hagụ angịkịla ka ba, kpụ ká juwa byihi ịịwẹ? Ọnyang yẹkẹẹ:

¹⁰Oligu nyam chị ahị ịraapya; ọ la ọmịla nyẹrị-nyẹrị. Ọ́ la ụnụna ẹ-ẹpwụ nya iru nya angịnyị ka.

¹¹Egbeju nyamwụ lala okpoko ịgọm ọlẹ kị hya cheri-cheri; inyi nyamwụ rụ ịgbana, I chu obiri lala obyi.

¹²Ahị nyamwụ lala enewulo ọ-ọnụ nya ogo; ọ hyo enyi kpengkpeng ọ godayị kpakpakpa.

¹³Ama nyamwụ há lala ẹrụ ọnyịịla ọlẹ kọ nwụ egbe nya ekeji ichoru kwọkwọ. Egbinụ nyamwụ wọ nyẹrị-nyẹrị lala ikoko ẹla ọlọnụ nyamwụ choru kwọkwọ lala ịmaa.

¹⁴Egbirabwọ nyamwụ há lala igbilo nya okpoko ịgọm ịlẹ kị ya ịjang nya ẹjwọ ikirisolayịtị da. Ugbinyịrọ nyamwụ la hịlẹ-hịlẹ lala ẹjwọ ayịvịrị ọlẹ kị kọkọ, ene kịị kpa ẹjwọ ịsafaya họọ ịnyangga.

¹⁵Ata nyamwụ há lala ẹjwọ ịmabụ ịlẹ kị ya okpoko ịgọm ọlam-ọlam da e-ekpeleji. Ọwa ayịdang wuu me iLibanọn, ọ há ụ́hị lala ekeji ịsịda ịlụwa.

¹⁶Ọnụ nyamwụ lịpyọ gẹnẹ-gẹnẹ, ọwa ayịdang lẹpwụ-lẹpwụ há ụ́hị. Jaabwọ ká oligu nyam la a wẹ lẹlẹ, anụ anyị anyang nya ala iJerusalẹm. Aligu yẹkẹẹ: