Read idege EJE Ọ-GỤ EJE 6 Bible Online

EJE Ọ-GỤ EJE 6 - idege bible

EJE Ọ-GỤ EJE 6

¹Ọlụ́hị ọ-gụ anyang ee, ale oligu nyang a tị́ ka kpong-kpong wẹ ene? Oye oyina ọ tị́ jahị da ka kpangga? ahị ka pịlahị nyamwụ tang lẹ. Ọnyang yẹkẹẹ:

²Oligu nya yegiri kele ka ẹrụ nyamwụ, ọ ka ẹga nya egbe nya ekeji ichoru kwọkwọ; nyọka kpa ịkpịlọ nyamwụ ri ẹ-ẹrụ, bala ọ-ka yile ikoko.

³M ri nya oligu nyam ri, ọwa ri ịnyam ri. Ọ juwa kpa ịkpịlọ nyamwụ ri tụ ẹpwụ nya ikoko da. Ọlẹng yẹkẹẹ:

⁴Oligu nyam ee, a há ụ́hị lụmẹ lala epweji nya iTiisa, a kpụ ịpyọ lala iJerusalẹm a la ihi-ihi lala ogu nya angịdẹwụ ị-kpa agbańg a-abwọ.

⁵Ji kpata him wẹẹ, chajị ahị nyang wum. Inyi nyang lala ịmwụ a ya ogu da awụlẹ hyọọọ juwa jẹ hireji bwu Ọgbọdọ nya iGiliyadị.

⁶Angịrị nyang pwo hụratata lala ịkpịlọ ịlẹ kị pwọ egbii ịnịnọ, kị juwa jẹ nya olenyi ohyohyo. Ọnyọnyọọnyị ju ogu ta ọọnamwụ ọhẹ-lọhẹ nyaa á la ụbwọọmwụ ka.

⁷Bwu ẹpwụ nya apwụ o-ke ahị nyang abaa nyang pwo me ene imiiye nya ugbe nya okoji ipomegraneti.

⁸Ịdịrhụ anyang iwo ịrwọnyẹ (60) godayị rịrị, ịhụ ị-ba ọka iwo ineku (80) juwa bala iru nya anjwo ịyang ịlẹ kị ka ju wa myị ka.

⁹Ma, enewulo nyam, oligu nyam á la ọ-chụ me ka; ọnyị ọnyang olookpokpo nya ịnamwụ, ọ ri ọnyị olikẹjẹ nya ịnamwụ. Ịyẹẹnọ chẹhị yọọ, ị wụrwọọ ọlụrụrụ ọháha, ịdịrịhụ anyang bala ịhụ ị-ba ọka mịla oja nyamwụ. Aligu yẹkẹẹ:

¹⁰Oowo a tị́ lẹẹ kọ há hwoo lala ahị ọpyẹpyẹ, kọ kpunyi lala ọya bala ọ-hụ́ myịrị-myịrị lala ẹnụ? Ọ la ihi-ihi lala ogu nya angịdẹwụ ị-kpa agbańg a-abwọ?

¹¹M kele ka ju ka ẹrụ nya ekeji nyọka yẹ ekeji inyeewe ịlẹ kị bwu; nyọka yẹ ó-ri ká alakọnụ á mwụ egbe lẹ, lee ó-ri ká ipomegranet á gu apwụ lẹ.

¹²Ene kam ka hu ahị uhye kpá lẹ, irya nyam kpam rụ ka kụ ẹpwarịrị nya ang ịrụnyẹ nya Aminadabụ lẹlẹ. Aligu yẹkẹẹ:

¹³Ọla iChulam ee, tịrẹkpẹ, tịrẹkpẹ warị; tịrẹkpẹ. Aa tịrẹkpẹ warị chajị kahị jẹ-ẹ̀ gbẹhị dang tee. Ọlẹng yẹkẹẹ: Iye tị́ du kanụ ka gbẹhị da ọla iChulam teee ịnyị bala anụ nyaa juwa yẹ alayịlọ nya ịMahanayim ene?