Read idege EJE Ọ-GỤ EJE 7 Bible Online

EJE Ọ-GỤ EJE 7 - idege bible

EJE Ọ-GỤ EJE 7

¹Ọnyị Adịrahụ chọọ! Ẹdịyẹ ọjẹjẹ nyang legbatẹ á jẹ kpụ ịpyọ kaka. Egbata imemeeme nyang ịwẹ há ụ́hị, lala ọngọ họ ịbańg nyaa haa.

²Ukpẹẹchị nyang lala ukoku olubwu-kpee ọlẹ ká ere ọkpịlabwọ á jẹ-ẹ myị hyoo ka. Ẹpwụ nyang lala ẹbwọ nya iwiiti ọlẹ ká ikoko bwu dagaga ju.

³Egbamẹ nyang lala anyị imiiye nya apyị; lala anyewa nya apyị.

⁴Ido nyang lala ube-oluhye ọlẹ kị kpa ẹjwọ-ayịvịrị nwụ. Ahị nyang chị ịraapya lala ẹmwụ-enyi ịla ịHẹchịbọn ọlọnụ ogirigba nya ịBatị-ịrabim. Okwinyi nyang la chokoo lala ube-oluhye ọla iLibanọn ọlẹ kọ jahị da ka ịDamasịkọsị.

⁵Egbeju nyang kụ ido tenee lala Ọgbọdọ nya ịKaamẹlụ. Inyi nyang lala iwu ịnyịmịla gbuu; ụhị nya igugu nyaa ru adịrahụ lẹ.

⁶Oligu nyam ee, a chakpa há ụhị; a kpụ ẹhị nyii lụmẹ gụ ang ịnyịịla wuu!

⁷Owulele ọlala nyang há lala ọmwụ nya ọrị; egbamẹ nyang lala eju nyamwụ.

⁸M cheje nyọka kpụ uhye nya ọrị ọwẹ, kam ka chikirii ba abajị nyamwụ. Egbamẹ nyang ka lala iku nya egbe nya alakọnụ ịhụ ọ-chị pwuu nyang choru kwọkwọ lala egbe nya ụwẹ.

⁹Ẹla ọlọnụ nyang la gẹnẹ-gẹnẹ lala ere ọnyịịla. Ọnyang yẹkẹẹ: Ere ọnyịịla ọwẹ a ri nya oligu nyam, kọ mwụ dịrẹ egbinụ bala iteeju-angịrị mẹ.

¹⁰M ri nya oligu nyam, ọ wu iwoo nyam.

¹¹Oligu nyam, kẹwẹ kahị kpehe ka ohwodehe; ahị ka hu ehe ẹ-ẹpwụ nya amẹ ịhẹna.

¹²Ahị ka chị ahị gbegbegbe ka ẹrụ nya alakọnụ ka yẹ ó-ri ká alakọnụ-ụ́ gu àpwụ lẹ; ahị ka yẹ ó-ri ká àpwụ nyaa-á wụrụ arụ lẹ, bala ó-ri ká ipomegiraneti-í gu àpwụ ịnyịnyị lẹ; ụ-ụwa m ka ya ịlọm hang lẹ.

¹³Ịmandireki juwa choru kwokwo, egbe nya ekeji ịnyịịla myị ẹpwa nyahị; oligu nyam, egbe nya ekeji ịlẹ kam tụguru gbalẹ-gbalẹ bala o-yile ịnịịno wuu ri ịlẹ kam ya nọ a-ang gbeng.