Read idege EJE Ọ-GỤ EJE 8 Bible Online

EJE Ọ-GỤ EJE 8 - idege bible

EJE Ọ-GỤ EJE 8

¹Ó-ri ká ri ọnyịnam ọlẹng ọlam-ọlam, ká ịnam a kpang la ẹmẹ nya ịlọmwụ; ịnọ, m ka jung ọnụ ó-ri kam yẹng yẹ u-ugbọdọda. Ọngọngọhẹ-ẹ́ tị ka tụm ịmyọọnụ ka.

²M tị ka kpang ụgbẹyị, kpang jẹ lalaala ka pwụ ube nya ịnam ọlẹ kọ mẹla jẹm. M ka ye ere ọ-chị ẹlẹlẹ bẹ́ẹbẹ̀ẹbẹ́ẹ hang nwa, bala enyi nya egbe nya ipomegranet.

³Ọ ya ụpụpịla dom ikiloyi ọ kpa upwuriri wum ju ẹjẹ.

⁴Anyị anyang nya ala iJerusalẹm ee! Anụ myị ọnụ ham ya: Anụ ka chị agaga du ila nya ọháha ju ka gbee ká ụka nyamwụ ka pwụ. Aligu yẹkẹẹ:

⁵Oowo a tị́ lalẹẹ jẹ warị bwu ugbileji, kọ kpụ nịrọ oligu nyamwụ kẹnẹng? Ọnyang yẹkẹẹ: Ọ-ọmwụ nya ụwẹ m chịng ahị hwoo lẹ; ụ-ụwa ịnang a jẹnyị nyang lẹ, ụwa kpangga ọngọ mang ma a jẹnyị nyang lẹ.

⁶Hum nọ lala ịna nya ang-ẹjẹẹ ọ-ọkịlẹtụ nyang, ká yam dụụbwọ lala ịna nya ang-ẹjẹẹ ụ-ụbwọ nyang mẹ; chajị ọháha ọlala chị engkpiri lala igu, ọ-hụ jeje nyamwụ aa chị ụrụ tịrẹkpẹ ka lala ejegu. Ọ dachụ lala ila, ọ wuru lala ẹlẹlẹ nya ila.

⁷Ukpenyi ọtụka-á ka jẹ-ẹ mịrị ila nya ọháha myị ka; enyi-í ka jẹ-ẹ woo myị ka. Ó-ri ka ọngọhẹ-ẹ́ me kọ ka kpa ụdụ nyamwụ lẹpwụ-lẹpwụ ra ọháha myị aalẹ, ị ka hụlọ ahụ jwoo lala ọlẹjị.

⁸Ahị la ọnyịnịna ọnyang ochiche ọlẹ kọ be amẹ lẹka. Ịyẹ kpá ahị tị́ ka họ ha ọnyịnahị ọnyang ọlẹ lẹẹ ẹnụ ká ọngọhẹ ka ya ẹla nya oyeye nyamwụ?

⁹Ọ-ri kọ ri ugulọ aalẹ, ahị ka kpa okpoko onyoowuru me ube-oluhye ọ-kụ gbeji rịrọọ. Ọ-ri kọ ri ukpileu aalẹ, ahị ka kpa okoji isida kọ ekeji i-wu ukpileku kpa jwoo. Ọnyang yẹkẹẹ:

¹⁰Am lala ugulọ, egbamẹ nyam tị lala ebe iluhye. Lẹẹlẹ, m ri ọngọ chị ụchụụ ọnyịịla ẹ-ẹga nyamwụ.

¹¹ISolomọn wu ẹrụ nya alakọnụ ị-ịBaalụ-ịhamọn. Ọ tụụbwọ hyoo ju angị kpẹhị rịrị ẹrụ ụ-ụbwọ. Ọngọngọọng nyaa ka nwụ okpoko onyoowuru ụnọ ookpokpo (1,000) chajị nya ugbe nya alakọnụ ọlụwa.

¹²Ma, ẹrụ nya alakọnụ nyam ri ịnyam lụbwọ-lẹta; kpa okpoko onyoowuru ụnọ ookpokpo (1,000) ụ-ụwa mẹ, iSolomọn. Okpoko onyoowuru ohu imiiye (200) ri nya angị kpẹhị rịrị egbe nyaa. Ọlẹng yẹkẹẹ:

¹³Anụ angị kụ ụwa ẹ-ẹrụ ee! aligu juwa ke ụrụ warị; họ kam wo omyi nyang. Ọnyang yẹkẹẹ:

¹⁴Oligu nyam, kẹwẹ mẹ, chị agaga lala apyị lee ụgba nya ẹrwa wẹ uhye nya ikiti ịlẹ ká ida ichoru kwọkọ ji!