Read idege AYỊSAYA 1 Bible Online

AYỊSAYA 1 - idege bible

AYỊSAYA 1

¹Ụpwụ ọlẹ ya ẹla chajị nya ang ịlẹ kị juwa ka họ ta epweji nya iJuda bala iJerusalẹm. Ohe Oluhye chị ang ịịwa ehe mẹjẹ Ayịsaya ọnyị nya Amọsị a-arụrụ lụka ká Usiya bala iJotam bala Ehasị bala iHesekaya ịdịrịhụ nya ala iJuda ri adịrahụ hi ụbwọ ha awụlẹ. Amkpaa yẹkẹẹ,

²“Uhye ā wo! Eji ā wo! Anụ wo ẹla ọlẹ ká am Amkpaa wẹẹ ya mẹ. Anyị kam ma, kpaa nwa angịnyị kpá wáa à mwọọgịlẹ la egbeju-ọngịrị jahị dam-m̀ wẹ lẹlẹ.

³Ẹna ri ẹna, ọ jẹ ayịbamwụ. Obyiyó jẹ ọngọlọọla ọlẹ kọọ ya ang họọ ri. Ịnya ala Isirẹlụ angịnyị nyam-ḿ tị ri ọlịnyị kpong-kpong ka, angịnyị nyam-ḿ jẹ ịngịngịhyẹ ka.”

⁴Chaahohoò! Anụ ala Isirẹlụ ụma ọ-họ ang onyobyi ọwẹ lee! Anụ kpa olo nya ang onyobyi nyanụ-ụ̀ wẹ tẹmẹjẹ, anụ ri anyị ị-họ ang onyobyi, anyị ịlẹ ká ọhịhị nyaa byịbyị. Anụ nyẹẹkpẹ da Amkpaa, pwa Ọngọ Ọlịgọgọ nya ala Isirẹlụ, chị ịlọnụ ịgọ hyoo gbanggbang.

⁵Ányị tị́ du kanụ wẹẹ la egbeju-ọngịrị kịlahị-ịlahị-ị̀? Ányị tị́ nya ọ-wụrụ akama chịlọnụ ọgụ kịlahị-ịlahị-ị̀? Ẹtẹ nyanụ ri igo-igo wuu lẹ, ọkịlẹtụ nyanụ jụ ẹdụrụ lẹ.

⁶Ẹdụrụ jụụnụ bwu eji lalaala ka ju ka uhye. Ẹ̀ga nya ịnyịrọ nyanụ ọhẹ-ẹ́ juwa kọ la gogo ka. Ịnyịrọ nyanụ pyẹ hịra-hịra, ị myị la abẹ-abẹ bala egbe chọ́ọ̀chọọ ị́ hụ́ abẹ nyanụ hụ́ ya abacha chaa chị ka, ị ya ida jwaa ju ị yinu hụ chẹẹ ka.

⁷Ọpyị nyanụ kpụ egwawụ-egwawụ, ị chị epweji ịlọpyị nyanụ ila hụrụ. A-ahị nyanụ ayịdang gede-gede angga wẹ kaka ye ọpyị nyanụ la, bala ọ-ta ang myị ang nyanụ ayịreji.

⁸Epweji nya iJerusalẹm hi ụbwọọmwụ-ụbwọọmwụ, ọ́ la ẹwụ ọ-chị ke ka lala ụdaa ọlẹpwụ nya ẹrụ nya alakọnụ lee ụdaa ọlẹrụ nya ịbẹhị.

⁹Amkpaa Agụgụ-ụ́ ya iwe da angị ịmanyị-ịmanyị be ka ịnọ, ị ka ta iJerusalẹm ayịreji gbanggbang lala ịSọdọm bala iGomora.

¹⁰Anụ alegbeju bala ala iJerusalẹm ee, ánụ datị hi ala ịSọdọm bala ala iGomora ka. Anụ wo ẹla ọlẹ ká Amkpaa wẹẹ ya tanụ mẹ, anụ ke ụrụ la ọmẹjẹ nya Ohe Oluhye nyahị mẹ.

¹¹Ọ yẹkẹẹ, “Ịyẹ iru nya iya ọkịlaakịla nyanụ à tị́ họ ham kpong-kpong wẹ-ẹ̀? Iya ọ-rụ ila ịlẹ kanụ kaa ya omilodo tụ eyo nya iyo ịlahịchịng nyanụ kịla ham chịm aga pwẹẹpwẹẹ. Ịwọ nya ịna bala ịnya imilodo bala ịnya ịmwụ-ụ́ chịm oru kaka.

¹²Oowo tị́ chịnụ abwọ nyọka kpa ang ịwẹ wuu warị ụka kanụ wẹ nyọka gbịgba ham ene-è? Anụ hịnyọ la ọ-wẹ ube nyam juwa ga wọmbọọ mẹ?

¹³Iya ịwẹ kanụ wẹẹ kịla ri ang i-hi deeji. Iya nya ịtangare nyanụ nyim oru kiro-kiro. Ḿ tịtọ nya ọhụhụ nya Ọya Onyeewe bala ịnya Ẹnụ Ọhịnyọ lụkụrwọ tụ ịnya ịgba ọgbagba ịkịla nyanụ kaka. Ang onyobyi anụ kaa họ lụka ịwẹ wuu lẹ.

¹⁴Ọhụhụ nya Ọya Onyeewe bala ọhụhụ ịkịla nyanụ wụm ẹjẹ. Ị ri olo ọnyẹẹnyẹẹ ham, ḿ ka kpaa myị kaka.

¹⁵Ánụ kpa abwọ nyanụ ka uhye juwa raabwọ, ḿ ka chẹhị gee nyanụ ka. Jaabwọ myị abwọ kanụ raabwọ kaka ba, ḿ ka ke ụrụ lanụ ka, chajị anụ kpa abwọ nyanụ nwụ angịnyị lụmẹ.

¹⁶Anụ hụ́ ịlọnụ kanụ la cheri-cheri. Anụ kpụba la ang onyobyi ịlẹ kam yẹ kanụ wẹẹ họ. Anụ hịnyọ la ang onyobyi ọhọhọ mẹ.

¹⁷Anụ jẹ jaabwọ kịị họ ang ọnyịịla mẹ, anụ myị ju eje ọkpàkpa ọchịchị mẹ. Anụ da angịlẹ ká angịnyị tụ pyị eji ụbwọ. Anụ-ụ̀ ma uya yẹ anyị-egu dada, kanụ leje yẹ ịhụ-egu dada.”

¹⁸Amkpaa yẹkẹẹ, “Anụ kẹwẹ kahị chị ẹla ọlẹ kahị kpa ta awụlẹ eju mẹ, anụ tị́ jẹ jaabwọ ká ịwọ-ọ́ chị ang onyoowuru kọọ rụ̄ ka, ịịwẹ angịnyị ọnwụnwụ nyanụ à bịrị abwẹla nyanụ lẹ. M̀ tị ka hụụnụ kanụ ka pwo lala ara. Ó-ri ká ịngịhyẹ-ẹ́ chịnụ ịrị jaabwọ ká ịwọ kaa chị ang ịrị wẹwẹ, m̀ tị̀ ka yịlẹẹnụ kanụ ka la owuru lala owu olewu-lewu.

¹⁹Ánụ myị ju ihi nyam aalẹ, anụ ka ye ang ri yẹẹyẹẹ bwu ẹpwụ nya ang-ẹrụ ịlọpyị ọlẹ.

²⁰Ọ́ tị ri kanụ pwa, kanụ la egbeju-ọngịrị aalẹ, aluji nyanụ ka tanụ ayịreji. Am Amkpaa-à ya ẹlẹwẹ lẹ.”

²¹Ahyu! IJerusalẹm ọlẹ kpá kọ chịla o-hu ọkịlẹtụ ha ene-ene mwọọgịlẹ yẹ kaka ri ọlakpara lẹ! Ọọ họ ẹla ọ-la kpakpa ene-ene, angị họ ang ọnyịịla kụ ụwa ene-ene, angị nwụ angịnyị kem tị ugbẹnyị mẹ ịnyị!

²²Ịnọ, à lala okpoko onyoowuru ọlahịchịng ene-ene, à tị yẹ ka ri ijagbodo lẹ. Ịnọ, à hiigu lala ere ọnyịịla ene-ene, à tị yẹ ka ri enyi-enyi chire-chire lẹ.

²³Alegbeju ịlịnyanụ ri angị la egbeju-ọngịrị, ịị ji ogu ta aleyi. lị ye okpoko ochikiriju, bala ọ-tịtọ nya ang-ahị bwu ẹga nya angịnyị. Ị́ kaa ma uya yẹ anyị-egu dada lee ọ-myị ke ụrụ ụka ká ịhụ-egu á kpa ẹla ka taa ka.

²⁴Am à ri Ọngọlahị Amkpaa Agụgụ, Ohe Oluhye ọlọngịrị nya ala Isirẹlụ lẹ. Anụ wo mẹ! Anụ ri aluji nyam lẹẹlẹẹ lẹ. M̀ ka hiri agbama nyam eji wẹ uhye nyanụ anụ aluji nyam, kam ka họnụ kwiwa ká ịnyịrọ ka dam cháaa lẹ.

²⁵M̀ ka danụ ila nya ịlẹhị-ịlẹhị, kam ka hyanụ cheri-cheri ụ-ụdụwa lala oje, chajị ká ịrị ọchịchị nyanụ wuu ka myị.

²⁶Ụka ọọwa, m̄ ka ya angịleje ịnyịịla bala angị ka junu irya ịnyịịla ịlala ịlụka onyogo hanụ. Ọọwa, ị ka wụrụ iJerusalẹm epweji nya ang ọnyịịla ọhọhọ bala ọ-chịla o-hu ọkịlẹtụ ha lẹlẹ.

²⁷Am Amkpaa ri ọngọ họ ang ọnyịịla bala ang ọ-la kpakpa lẹ, m̀ ka chị iJerusalẹm[1] da tụ alụwa ịlẹ wuu kị yẹ irya da.

²⁸M̀ tị ka ta angị họ ang onyobyi bala angị la egbeju-ọngịrị ayịreji lawụlẹ. Odu ka hi angịlẹ wuu kị nyẹẹkpẹ dam.

²⁹“Ọ-ka lanụ oyoyi ụka kanụ kpịtịya nya ụka ọlẹ kanụ-ụ̀ kpụ ojiga ọ-ọmwụ nya ekeji, anụ ka chị ijẹma nyọlẹ kanụ kpụ ojiga ẹ-ẹrụ irigọgọ nyanụ.

³⁰Anụ ka gbu wombooo lala okoji ooku ọlẹ kọ juwa gbu, bala lala ang-ẹrụ ịlẹ ká ọngọngọhẹ-ẹ́ẹ̀ chị enyi ju ka.

³¹Angị ịnyịịngịrị lẹpwụ nyanụ ka myị kurwe-kurwe lala amẹ a rụ ila. Ang onyobyi ịlẹ kanụ họ a ka wuru ila gunu lẹ ọngọngọhẹ-ẹ́ ị ka jụ ila nya ayịreji ọọwa mịrị myị ka.”