Read idege AYỊSAYA 10 Bible Online

AYỊSAYA 10 - idege bible

AYỊSAYA 10

¹Anụ angị da ehile ịkịrọrọ, ká ehile nyanụ-ụ̀ jẹ oye-oye ee, anụ ri enyi gu obyi lẹ!

²Anụ yẹ alẹbyahị ba, juwa haa ri kịrọrọ i-iwe-ahụrụ ọlẹ kọ ri nyaa ri. Anụ nụ ịhụ-egu ang la lagbụrụ, tụ angịlẹ kị ri anyị-egu.

³Anyị anụ tị́ ka họ ẹnụ ká Ohe Oluhye-é ka yẹnụ akama? Anyị anụ tị́ ka họ ụka kọ ka kpa akama chịnụ ọgụ bwu ọpyị ọlụrụ? Ale anụ tị́ ka rụnyẹ nya ụbwọ ọdada kà? Anụ tị́ ka ya ang-ụdụ nyanụ ịwẹ kpịbaa ale kpá-à wẹẹ?

⁴Aluji ka nwụnụ ẹ-ẹwụ lee o-gbileenu kpịla-kpịla kpa rụ lala alagba. Ọwẹ-ẹ́ tị ri ocheju nya agbama nya Amkpaa lẹka, ọ hu ụbwọ nyamwụ hwaa yahị daa wẹẹ.

⁵Amkpaa yẹkẹẹ, “Asiriya ka le! Asiriya m̄ hu nya ugboji ọ-kpa yẹ angịnyị akama lẹ, angịlẹ wuu kị họ ẹla wụm ẹjẹ.

⁶M̀ kaa du ala Asiriya kaka mwẹla ta ẹpwụma ọ-jẹ Ohe-ka, angịlẹ wuu kị họ ẹla jum agbama. M̀ daa kele nyọka wụ ang myị ang kọ háa wụ kpa rụ, bala ọ-ka gá angịnyị chẹẹchẹẹ jaabwọ kịị kpa ata ba ịwa ụ-ụgbẹyị.”

⁷Adịrahụ ọtụka nya ala Asiriya me obyi nya ụbwọ nya ịlọmwụ me juwa ịnyịnyị-ị̄, irya nyamwụ ri ọ-ka kụrụ ẹpwụma lụmẹ-lụmẹ, kọ ka taa ayịreji gbanggbang.

⁸Ọọ chị ọgọm yẹkẹẹ, “Ịdịrịhụ alegbeju nya angịdẹwụ nyam wuu à ri lẹ!

⁹Jaabwọ kahị kụrụ ịKaakemichi, ịnyịnyị-ịnyịnyị ahị kụrụ ịKalụnọ lẹ, ahị kụrụ ịHamatị lala Apadị, ahị kụrụ ịSameriya lala ịDamasịkọsị.

¹⁰Ahị tụ́ alẹpwụma ịlẹ kịị kpụ ijiga wuu kpilo, ijiga nyaa tị la ọngịrị gụ ịnya ala iJerusalẹm bala ịSameriya wẹẹ.

¹¹Ahị tị́ ta ịSameriya ayịreji tụ́ ekpeku nyaa wuu kpá lẹ, ịnyịnyị ahị ka ta iJerusalẹm tụ ijiga ịlụwa wuu ayịreji lẹ.”

¹²Ọngọlahị ka kpa adịrahụ ọtụka nya ala Asiriya họ ang ọlẹ kọ me ọbyi jahị da Ọgbọdọ nya ịSayọn kpá wuu. Ọọwa, ọ tịtị ka jahị da adịrahụ ọtụka nya ala Asiriya kọ ka yọọ akama chajị nya ọgọm ọchịchị bala ọbọọchẹ ịlọ kọ hi wuu lẹlẹ.

¹³Adịrahụ ọtụka nya ala Asiriya chị ọgọm yẹkẹẹ, “Ọngịrị-ọngịrị nya ịlọm m̄ kpa dẹwụ ịwẹ wuu lẹ, bwula ẹla ọjẹjẹ nyam, m̄ ye ẹpwụma lụmẹ-lụmẹ la, go ang-ụdụ ịlẹ kị ju ụjị ha ịlaa lẹ. M̀ kpa ịdịrịhụ ịlụwa nọnọ jaabwọ ká ẹna kaa gba mịla ọngịnyị.

¹⁴Ẹpwụma ilodehe wuu lam lala awụ nya ọchịnụ, m̀ bá pyee kele kaka go ang-ụdụ nyaa wuu lala ọngịnyị à ru awụ nya ọchịnụ, go eji ịlẹ kọ hụ rụ hi. Ọ́ nyí achwọ kpàkpaakpa nyọka jum uhi-uhi ọ-chị ịgbụ jahị dam ka.”

¹⁵Amkpaa tị yẹkẹẹ, “Eje o-be ọwụ ka ya ọwa nyị gụ ọngọ wẹẹ kpa ọwa be ọwụ-ụ? Ẹma o-gu ekeji ene ka jẹ-ẹ̀ gu okebenta ọ-kpọọ ụ-ụbwọ-ọ́? Ugboji-í jẹ-ẹ̀ hu ịlọmwụ hwaa wa ọngịnyị ka, ọngịnyị à kaa hwoo hwaa ene lẹ.”

¹⁶Amkpaa Agụgụ juwa ka du ẹdụrụ onyobyi kaka jụ angịdẹwụ i-ye ang ri lẹpwụ kpọ̀bọ̀-kpọ̀bọ̀ nyang ịwẹ. Ụmụmẹ nyang kpẹhị kpẹẹ, ẹdụrụ ọọwa tị ka gung ila ọmyị̀myị̀ ka.

¹⁷Ohe Oluhye kọ ri ahịgboo nya ala Isirẹlụ ka ri ila, Ọngọ Ọlịgọgọ nya ala Isirẹlụ ka ri ẹlẹlẹ-ila. Ẹnụ alẹ-alẹ, ila ọọwa ka wuru, rụnụ anụ ejwo-iwuru ịwẹ.

¹⁸Ipyinu bala ịpyị i-ju eyo nyang wuu ka ta ayịreji gbanggbang jaabwọ ká ẹdụrụ kaa myị ọngịnyị cheji.

¹⁹Ekeji ịlụwa ka hi ịmanyị-ịmanyị, onjwo ochiche dọmwụ ka jwaa wa myị.

²⁰Ụka juwa wẹ ị-ịlahị, ala Isirẹlụ ịlẹ kị ka hi hị á tụtụm ka kpụnịrọ ẹpwụma ọlẹ ịnọ kọ wẹẹ ka taa ayịreji gbanggbang kaka. Ị ka ya ọkịlẹtụ nyaa lẹpwụ-lẹpwụ kpụnịrọ Amkpaa Ọngọ Ọlịgọgọ nya ala Isirẹlụ.

²¹Angị ịmanyị-ịmanyị nya ala Isirẹlụ, anyị ịtụma nya iJekọbụ ka nyà wẹ ẹga nya Ohe Oluhye Ọtụka.

²²Ọlẹẹlẹẹ lẹ, ala Isirẹlụ ju iru kpá lala ugburuja ọlọka nya ihu. Angị ịmanyị-ịmanyị à tị ka nyà myị lẹ. Amkpaa ya ayịreji ọtata dụrụ ang-ǹg wẹ gbaa, ị tị họ kpụ ọọwa ene.

²³Ịnyịlẹhị ịnyị, Ọngọlahị Amkpaa Agụgụ juwa ka taa ayịreji wuu, jaabwọ kọ hwahwa nyọka họ.

²⁴Ọngọlahị Amkpaa Agụgụ yẹkẹẹ, “Anụ angịnyị nyam ịla ịSayọn ee, anụ ju uhi nya ala Asiriya koo, ịnyịlẹhị lẹ, ị wẹẹ yẹnụ ụhị jaabwọ ká ala Ijipiti kaa họnụ lụka ogbalẹ.

²⁵Ọ́ nọ chẹẹ agbama ọlẹ kam ju tanụ ka cheju, agbama nyam tị ka wuru jahị daa nyọka taa ayịreji.

²⁶Am Amkpaa Agụgụ ka nyaa lugboji jaabwọ kam nyí ala iMidiyan ẹ-ẹga nya Ẹjwọ ọla Ọrẹbụ. M̀ ka hu ọgọdọ nya ọngịrị nyam hwaa jaabwọ kam họ Ijipiti.

²⁷Ụka ọọwa, m̀ ka gbanụ kpehe bwu ẹpwụtụbwọ nya ala Asiriya, ogbilo ọlẹ kị ka danụ o-omyi ka mwụ eku hiinu, chajị anụ hye kịlọọ kịla lẹ.”

²⁸Angịdẹwụ nya aluji pwụ Ayatị lẹ, ị be bwụụụ kpoye nya iMigirọn lẹ. Ị ya ang-abwọ nya ẹwụ nyaa ju ụjị i-iMikimachị!

²⁹Ị kpoye nya ọkpọọ kpụ ị lalẹẹ chịkụ nyọka hyehe ị-ịGẹba lẹ. Uhi ju alepweji nya ịRama, ala iGibiya epweji nya ịSọlụ rụnyẹ rụ kpá lẹ!

³⁰Anụ ala iGalim ee, anụ dakọ gboo mẹ! Anụ ala ịLayichaa, anụ ke ụrụ kanụ wo mẹ! Anụ ala Anatotu, anụ wẹ ẹla-à wẹ mẹ.

³¹Ala ịMadịmẹna yẹta ká ụnyẹ lẹẹ, ala iGebim tịtị kụ hwohwoohwo nya ụnyẹ ọrụrụ ịnyịnyị.

³²Aluji jẹ pwụ epweji nya ịNọbụ alẹ lẹ, ị lalẹẹ bwọ ẹwụ yahị da ala Ọgbọdọ nya ịSayọn, i-ikiti nya iJerusalẹm.

³³Ọngọlahị Amkpaa Agụgụ ka kpaa nọnọ jaabwọ ká okoji kaa hụla abwọ. Ọ ka kpa angịtụka nyaa nọnọ tụ alegbeju nyaa lawụlẹ-awụlẹ.

³⁴Amkpaa ka chaa ẹbwụjẹ jaabwọ kịị kpa eje o-be ọwụ tụrụ ekeji ịtụka ịla iLibanọn.