Read idege AYỊSAYA 11 Bible Online

AYỊSAYA 11 - idege bible

AYỊSAYA 11

¹Adịrahụ oriri o-bwu ẹchị-adịrahụ ọlọdọdẹpwa nya iDevidi lala okoji ọlẹ kị tụrụ deeji. Ma, jaabwọ ká okoji ọọwa kaa juwa be bwu eku-ọmwụ, ịnyịnyị adịrahụ onyeewe a juwa ka kpehe bwu ọdọdẹpwa nya iJesi, ọnyị ọtụma nya iDevidi kpehe lẹ.

²Olegu nya Amkpaa ka mwụ ịnyọ u-uhye nyamwụ. Olegu ka ya ẹla ọjẹjẹ họọ, ọ ka ya ọngịrị nya olegbeju oriri ọlẹ kọ ka jẹ-ẹ̀ kpẹhị rịrị angịnyị nyamwụ họọ. Olegu nya ang ọmẹjẹ bala ụmụmẹ, olegu nya ang ọjẹjẹ bala olegu nya uhi nya Amkpaa ojuju juwa ẹ-ẹpwụ nyamwụ.

³Ang ọlẹ kọ ka kpụ adịrahụ ọwẹ ịpyọ bala ọ-ka ri ọkẹkẹnị nyamwụ gụ wuu ri uhi nya Ohe Oluhye ojuju. Ọ́ ka leje tụ ugbẹhị nya ọngịnyị ọyẹyẹ ka. Ọ́ tị ka wo ịyaa kpa chị oku nya ẹla ka.

⁴Ma, abwẹla ọnyịịla ọ ka kpa la ikpehika eje lẹ. Ọ ka chị eje ha angịlẹ kị la dụmwọ am odede ọlẹ jaabwọ kọ chịla. Bwula ehile ọdada ọlọnụ nyamwụ angịnyị inyibyi ilodehe ka yẹ akama. Bwula ẹla ọlọnụ nyamwụ alimajẹ ilodehe ọlẹ ka gbu.

⁵Abwẹla ọnyịịla à ka ri ugba ọchọhị nyamwụ lẹ. Ọkịlẹtụ o-hu ha à ka ri ugba ọchọhị nyamwụ lẹ.

⁶Ụka ọọwa, odomwu bala ịkpịlọ ka kụ ẹpwa ta awụlẹ. Ọnarwọ bala oyichi ka nune lawụlẹ. Ẹna bala ugẹbẹ ka ga juwa ri ang lawụlẹ. Onjwo ochiche pyịnyẹng ka juwa kpaa ka ri amẹ.

⁷Ịna bala ịnarwọ ka juwa ga ri ang lawụlẹ. Agba ichiche nyaa ka nọnọ lawụlẹ lokpunyi. Ugẹbẹ ka ri amẹ lala ẹna.

⁸Onjwo ka kọ ayịlọ kpa ụbwọ ka ụjẹ nya ọgbịjị, ọ́ tị ka họọ ịngịngịhyẹ ka. Ọ ka dụrụ ụbwọ ka ụjẹ nya ilo ọlẹhwa, ọ́ tị ka chọọ ka.

⁹U-uhye nya ịSayọn ọgbọdọ ọlịgọgọ nya Ohe Oluhye, ịngịngịhyẹ onyobyi ọ-ta ang ayịreji-í ka juwa ka, chajị odehe ọlẹ wuu ka myị̀ lẹla ọjẹjẹ nya Amkpaa pwẹẹpwẹẹ jaabwọ ká enyi kaa myị̀ ọ̀bá nya ihu ịtụka.

¹⁰Ẹnụtụrụ ọọwa, ká adịrahụ onyeewe-é ka kpehe bwu ọdọdẹpwa nya iJesi ọnyị ọtụma nya iDevidi ọlẹ kọ ka ri ang o-ju ẹjẹẹ ha angịnyị wuu lẹ, angịnyị ka tụguru ẹ-ẹchị adịrahụ nyamwụ lẹ, ị ka jwoo ihi lẹlẹ. Chajị ẹga ọ-kụ ẹpwa nyamwụ ka myị̀ la ogbo nya Ohe Oluhye.

¹¹Ụka ká ẹnụtụrụ ọọwa-á pwụ lẹ, Ọngọlahị ka myịmyị nịra ụbwọ nyamwụ kpaa ugbabwọ oheeye ka kpa angị ihihi nyà tịrẹkpẹ wẹ ẹpwa bwu ẹpwarịrị nya angịnyị ịlẹ kị hi juwa a-Asiriya, ọmwẹnụ-ụtụrụ nya Ijipiti, bwu iPetirosi ọlẹ kọ ri oye ẹtẹ nya Ijipiti, Itiyopyiya, bwu Elam, bwu iChinaa, bwu ịHamatị bala angị kụ ẹpwa ị-ịpyị ịlọnụ nya Ihu ịtụka.

¹²Amkpaa hu apwụ nya ang o-ju ẹjẹẹ nyamwụ hwaa ka uhye mẹjẹ epwoja ịwẹ nyori ọwa nyị juwa tụ angịnyị nyamwụ ala Isirẹlụ bala ala iJuda ịlẹ kị nyí epepe tụ ẹga myị ẹga da guru myịmyị nyà tịrẹkpẹ wẹ ẹpwa ịkịka ine nya odehe lẹ.

¹³Ụka ọọwa, ijiiji nya awụlẹ ọyẹyẹ ọlẹpwarịrị nya ala Isirẹlụ bala ala iJuda myị kpá gbanggbang. Ị́ ka wụ awụlẹ ẹjẹ lee ri aluji nya awụlẹ kpụ ị ka dẹwụ ta awụlẹ kịlahị kaka.

¹⁴Ịwa ka tụchawụlẹ ka mwẹla ta la iFilisitiya ịlẹ kị kụ ẹpwa o-oye nya ọmwẹnụ-obyi. Ị ka dẹwụ ta ala Ẹdọm bala ala iMowabụ ịlẹ kị kụ ọmwẹnụ-ụtụrụ kụrwaa ala Amọn ka ju ihi nyaa.

¹⁵Amkpaa ka họ ka Ihu nya Ijipiti ka nwụ kpá kịrẹ-kịrẹ. Ohe Oluhye ka da ụbwọ nyamwụ pyii uhye nya Ihu nya iYufuretisi, ká igbachịwụ ọ-chị ila pwuu ka họ ka Ihu ọwẹ ka nwụ. Ọ ka pọọ ápa irwiye ká angịnyị ka jẹdịyẹ bwu ugburuja ọchọrụ nyamwụ.

¹⁶Ụka ọọwa, ụgbẹyị ọtụka ọhẹ ka da bwu epweji nya ala Asiriya ha ala Isirẹlụ angịnyị nyamwụ, angị ịmanyị-ịmanyị ịlẹ kị hi juwa la ọhịhị jaabwọ kọ la ụka ká adaa igogo anyị juwa gba kpehe bwu ọpyị nya Ijipiti.