Read idege AYỊSAYA 13 Bible Online

AYỊSAYA 13 - idege bible

AYỊSAYA 13

¹Ẹla o-ya dodehe chajị nya ịBabịlọn ọlẹ ká Ayịsaya ọnyị ọlẹng nya Amọsị ye bwu ẹga nya Ohe Oluhye a lẹẹ lẹ.

²U-uhye nya ọgbọdọ ọtụma apwụ nya ang o-ju ẹjẹẹ à wuleji rịrị lẹlẹ! Chị eko nya ẹwụ wụrụ ịsọja ká be ẹkọ wụrwaa mẹ. Hu abwọ hwaa ka uhye haa kị ka jụ kele ka ogirigba nya epweji nya angị hi ọbọọchẹ ka mwẹla taa mẹ.

³Am ayịdang da angịnyị ịlẹ kam chị ịgọgọ ju ha ịlọm, m̀ be ẹkọ, ịsọja ịtụka ịlẹ kị ri angị họ ẹga kị kpa agbama nyam kpehe lẹ, ị chị ọkẹkẹnị la ugbodu kpaa nyii nya ọ-họ irya nyam.

⁴Anụ ke ụrụ kanụ wo emwuru ọtụka oluhye nya ọgbọdọ mẹ. Ọ lala emwuru nya iru nya angịnyị nyaa lalẹ! Anụ ke ụrụ la emwuru ọlẹpwarịrị nya ịpyị nya ịdịrịhụ. Emwuru nya iru nya epwoja kị tụ ịlaa guru! Amkpaa Agụgụ a wẹẹ be ẹkọ wụrụ ịsọja nyamwụ ka tụchawụlẹ kị ka rụ ka ẹwụ lẹ.

⁵Angịdẹwụ ịwẹ juwa warị bwu ọpyị ọlụrụ lụmẹ. Ị juwa warị bwu ọbaba nya odehe pẹtẹẹẹ. Ẹ-ẹpwụ nya agbama ọtụka Amkpaa a wẹẹ kpa angịdẹwụ nyamwụ lala ang-abwọ nya ẹwụ ka ta epwoja ịwẹ wuu ayịreji lẹ.

⁶Anụ chị eko ẹ-ẹpwụ nya ang ọjụjụ mẹ! Chajị ẹnụtụrụ nya Amkpaa ju chwẹẹ lẹ. Ẹnụtụrụ ọlẹ ká Agụgụ ka kpa ayịreji ọtata warị.

⁷Chajị nya ọọwa lẹ, abwọ nya ọng myị ọng wuu ka jụ́ ịhyẹ dẹwụ-dẹwụ la abwọ nyà ka tọ ata meme. Ọhụ a ka ba ọngọngọhẹ e-eji kaka ọọ-la ọkịlẹtụ ọ-kpụ enyi.

⁸Uhi ka ju ọng myị ọng nyaa wuu juwa wulabwọ chị niniini. Ang ọjụjụ bala akama ọtụka ka waa birim, jaabwọ ká ọnyang ọlẹnyị kaa hya ụma ụka ká ụka nya ọnyị ọmama nyamwụ-ụ́ pwụ. Ọng myị ọng nyaa ka chẹhị ka yẹ awụlẹ luhi ojuju. Ahị nyaa ka ga ịmịla lala ila.

⁹Anụ yẹ mẹ, ẹnụtụrụ nya Amkpaa juwa warị, ẹnụtụrụ oluhi-uhi ọtụka ịnyị. Ẹnụtụrụ nya agbama bala ikẹjẹ-awụrụ ọ ri lẹ. Odehe ọlẹ ka yẹ ri ugbileji bala ẹpwụ nya amẹ. Ọ ka ta alọhọbịrị wuu ayịreji am odehe ọlẹ.

¹⁰Chajị ịdịrịhụ iluhye nya egbamwụ-ụ́ ka hu ahịgboo nyaa ha ẹnụtụrụ ọọwa ka. Ẹnụ ka chowu ụka kọ juwa kpehe, ọya-á tị ka hụ́ ka ịnyịnyị.

¹¹M̀ ka yẹ odehe akama chajị nya ang onyobyi ọhọhọ nyamwụ. M̀ ka yẹ alọkwọ akama chajị nya ọkwọ nyaa. Ọbọọchẹ nya angị hi ọbọọchẹ ka myị. M̀ ka yaa akama chajị nya ọgọm ọchịchị nyaa.

¹²M̀ ka họ ká angịnyị ka ku amwụ gụ okpoko ịgọm ọlahịchịng. M̀ ka họ ká angịnyị ehe ka ku amwụ gụ okpoko ịgọm ọlọpyị nya Ọfii.

¹³Chajị nya ọọwa lẹ, m̀ ka họ ka egbamwụ iluhye-ọgba ka hụ jigi-jigi, odehe ka hụ́ kpụka-kpụka, ka pyị hi ẹga ọlẹ kọ rịrị ene-ene ẹnụtụrụ ọọwa ụka kam ayịdang ọlẹ kam a ri Amkpaa Agụgụ ka ikẹjẹ-awụrụ nyam jẹ.

¹⁴Ụka ọọwa, angga ịlẹ kị kụ ẹpwa ụ-ụwa e-epweji nya ịBabịlọn ka rụnyẹ rụ lala ẹnụ ọlẹ ká ọmwụkpẹ juwa ku lụnyẹ lee lala ịkpịlọ ịlẹ ka ká ọngọngọhẹ kaa taa guru ka. Ọng myị ọng ji kpata rụ ba angịnyị nyamwụ. Ọng myị ọng ka rụnyẹ rụ ka epweji nya adamwụ.

¹⁵Ọng myị ọng kị yẹ myị ị ka jwoo achwiimyị ka gbu, ọng myị ọng kị wu myị lẹ aalẹ, ẹma nya ẹwụ ka ryoo lẹ.

¹⁶Aluji ka warị ka go anjwo ichiche ịlụbwọ nyaa chị ang nmẹẹnmẹẹ, ka nwaa i-ijata nya adaa bala ịnaa ọlẹ kị ka juwa mwụrụ yaa. Ị ka nwụla ang-abwọ bwu ẹpwang nyaa kpa rụ lagbụrụ. Ị ka gbile ịhụ nyaa ka chị beji juwa họ ụya taa lagbụrụ.

¹⁷Amkpaa yẹkẹẹ, “M ka du ịsọja nya ala iMidiya ju kị ka kele ka mwẹla ta ịBabịlọn. Angịlẹ ká okpoko onyoowuru bala okpoko ịgọm á chaa ẹhị gbọgbọ kpụ ọ-ka ri ọmayẹ haa kaka.

¹⁸Alẹwụ ịịwa ka da ịcha chị anjwo ikolobya nya ala ịBabịlọn, ịsọja ịịwa á ka yẹ ahyẹẹrwẹrwa nya anjwọ ka. Ẹla nya anjwo ichiche á dọmwụ ka taa olujwo ẹ-ẹpwụ nya ọkịlẹtụ nyaa kpụ ị ka chaa da ka.

¹⁹Ụka ọọwa, ịBabịlọn ọlẹ kpá ịnọ kọ há ụhị gụ ịpyị adịrahụ ịkịla wuu, du ká ala ịBabịlọn ịnọ kaa hi ọbọọchẹ bala ọ-kpa yaya ju. Ma, am Amkpaa tọọ ayịreji lala ịSọdọm bala iGomora lẹ.

²⁰Ọngịnyị ehe ọhẹ-lọhẹ á ka mwẹẹkpẹ kaka kụ ẹpwa ụ-ụwa kpá ẹnẹnẹhẹ kaka. Ala Arabụ kpá kị ri angị ga agịlata lụmẹ wẹẹ á ka dọmwụ da ọdụ nyaa kụrụ eji ụ-ụwa lee ọngọgbikpịlọ ọhẹ-lọhẹ ka myị ịkpịlọ nyamwụ hị nọnọ ụ-ụwa ka.

²¹Ma, kẹnẹ-kẹnẹ iyo ịnyịịngịrị ilugbileji a ka nọ ẹpwa ụ-ụwa bala epwii a ka nọ ẹpwa ụ-ụwa bala ogoriigo ịtụka nya alubekee lẹlẹ. Iyo ịhyẹ ịlẹ ká alegu inyibyi kụ ẹpwụ nyaa ka kele ka chewo ụ-ụwa e-egwawụ ẹpwa nyaa.

²²Ikirom ka juwa chị eko lee gbokiri u-ube-oluhye, idomwuu ka juwa warụ, ọlẹ ká ẹga wuu ka myị la eko dọọ lomyi nya arụ ọwawa nyaa. Ụka nya ayịreji ọtata nya ịBabịlọn pwụ eji! Ụtụrụ nyamwụ á dọmwụ juwa ka gbileji tata abwọhẹ kaka.”