Read idege AYỊSAYA 14 Bible Online

AYỊSAYA 14 - idege bible

AYỊSAYA 14

¹Amkpaa juwa ka myịmyị-ị̀ yẹ ahyẹẹrwẹrwa nya iJekọbụ bala ọ-ka chụ ala Isirẹlụ nya angịnyị nyamwụ wẹẹ. Ọ ka myịmyị-ị̀ kpaa tịrẹkpẹ nyà warị ka kụ ẹpwa ọ-ọpyị nya ịlaa ayịdang kpangga wẹẹ. Ụka ọọwa, angịlẹ kị ri alụma ịkịla ka kele ka kụ ẹpwa ụ-ụwa taa ịnyịnyị. Ụka ọọwa alụma ịkịla ịịwa ka yẹ ri ụpa nya alọdọdẹpwa nya iJekọbụ.

²Iru nya alepwoja ịkịla lụmẹ-lụmẹ ka da angịnyị nya ala Isirẹlụ ụbwọ nyọka kpaa tịrẹkpẹ nyà ka kụ ẹpwa ọ-ọpyị ọlẹ ká Amkpaa hu haa ụ-ụwa alepwoja ịkịla ịwẹ a tị ka juwa myị ẹrụ ha ala Isirẹlụ lala anyịhị lẹlẹ.

³Ụka ká Amkpaa ya ọmwịịnyọ ha angịnyị nya ala Isirẹlụ, kọ ye ang ọjụjụ bala akama nyaa bala ụkụrwọ ọnyọọngịrị ọlẹ kị kaa kpaa họ nya anyịhị oriri lẹ aalẹ,

⁴anụ mwu eje nya ọ-kpa Adịrahụ nya ala ịbabịlọn họ yẹkẹẹ, “Eji ogbegbe nya adịrahụ onyobyi, ọ tụ angịnyị pyị eji, ọ chị ka eji lẹ, ehile bala ọngịnyị ọ-họ ri nyamwụ myị lẹ.

⁵Amkpaa mwụ ọgọdọ nya ọngịnyị onyobyi ọlẹ kọ kaa kpa yẹ angịnyị akama eku lẹ. Ọ ye ọngịrị hi egbeju lẹ.

⁶Adịrahụ nya ala ịBabịlọn ọlẹ kọ kaa nyi angịnyị enyiri lagbama ojuju kpụba kaka, ọlẹ kọ juwa tụ epwoja ịkịla pyịpyị mwụ ịnyọ kaka lagbama gbee kọ ka kụrụ.

⁷Ugbẹnyị lẹ, odehe wuu jam mwụ ịnyọ lọkẹkẹnị bala okpunyi. Ọng myị ọng jam mwu eje letu ọdada tụ Adịrahụ nya ala ịBabịlọn pyịpyị lẹ.

⁸Ekeji i-bwu ejwo ịhyẹ ịlẹ kị hiigu nya o-gu ene kpa nwụ ịnawụ bala isida nya ala iLibanọn juwa chị ọkẹkẹnị chajị nya eji ọmịla-mila nyang ahụ adịrahụ juwa kpa mwu eje yẹkẹẹ, ‘Bwu ụka ọlẹ ka chị eji pyịyọọ gbee daalẹ lẹ, ọngọngọhẹ nya angị tụrụ ekeji-í warị ka chịhị deeji kaka.’

⁹Egu ịlịpyị ịlẹ kị juwa e-ejegu lalẹẹ nwụlanọ kị ka da Adịrahụ nya ala ịBabịlọn ọwụrụba ụka ká pwụ eji. Ọ du olegu nya angịlẹ kị gbugbu juwa e-ejegu juwa wuleji kị ka da ọnụ chịng. Ịwa ri alegbeju nya odehe lẹ. Ọ họ ká ịdịrịhụ ịlẹ kị gbu wuleji dayị kọkọ bwu ẹchị-adịrahụ nyaa nyọka da ọnụ chịng.

¹⁰Alegbeju ịwẹ wuu ka kpang họ juwa hụlọ ahụ jung yẹkẹẹ, ‘Lẹẹlẹẹ wẹẹ, à jụ ịhyẹ wẹ dẹwụ-dẹwụ jaabwọ kahị la lẹ!’

¹¹Gbalẹ-gbalẹ lẹ, a tị la ihi-ihi kpụ ị kaa mwu eje jung la ẹnwụ juwa tụng da ẹ-ẹkpẹ. Ma, lẹẹlẹẹ a nọ-ọ wẹ i-iworu lẹ. Ịjị pyẹ maa kụrụng lala ịbẹẹdị onune nyang lẹ. Ọọwa ekpunjuju a kụrụ ịnyịrọ nyang wuu lala apwụ ịgbagiri ọ-da nune nyang wẹ lẹlẹ.

¹²Anyị ā tị́ họ ká chabwọ bwu epwoohe da weji wẹ mẹ? Ahụ ọdọchụ nya ahị ọpyẹpyẹ ọlẹ ka ri olegbeju nya alegu inyibyi. Ịnọ ene-ene lẹ, ahụ a ri ọngọ kụrụ epwoja wuu lẹ, ma tị lẹẹlẹẹ, ị hung ju eji ẹ-ẹpwụ nya iworu wẹ lẹ.

¹³À byi ịlọng ẹ-ẹpwụ ọkịlẹtụ yẹkẹẹ, ‘M̀ ka wule kpụ uhye ka epwoohe. M̀ ka kpoye nya ịdịchụ nya Ohe Oluhye wuu. M̀ ka hu ẹchị-adịrahụ nyam hwaa ka uhye kọ ka luhye gidogboo. M̀ ka hụhụ u-uhye ịkịka nya Ọgbọdọ ịgọgọ ọlẹ kọ ji oye nya ẹtẹ ụ-ụwa ọ-ọmwẹnụ-arịrị ọlẹ ká ihye wuu kaa tọ awụlẹ.

¹⁴M̀ dọmwụ ka wule kpụ uhye kele kpoye nya egbamwụ ịlẹ kị la uhye gụ wuu, m̀ ka họ kam ka lụmẹ lala Agụgụ wuu.

¹⁵Ma, lẹẹlẹẹ wẹẹ, ị kpang weji bẹdẹẹẹ ka ju ka iworu lẹ. Ị kpang ka ju ka ẹpwụ nya ụjẹ okpori-kpori ọtụka lẹ.’

¹⁶Angịlẹ wuu kị yẹng ụ-ụwa ka kpa ịkịka nya ahị yẹng. Ị ka tịtọ wo yẹkẹẹ, ‘Ọngọlẹ kọ họ ká alodehe wuu hụ jiji-jiji bala ọ-họ ka ịpyị-adịrahụ ọnyị myị ọnyị juhi hụ kpákpaakpa a lẹẹ lẹka-á?

¹⁷Ọngọlẹ kọ họ ká odehe ọlẹ yẹ ka ri ugbileji a lẹẹ lẹka-á? Ọ́-ọwa họ ká epweji ịtụka-ịtụka ta ayịreji ka-á? Ọwa-à pwa ọ tụụbwọ hi angịlẹ kọ wu ju agba nyọka rụ ka ẹpwa nya ịlaa ka lẹka-á?’

¹⁸Ị ju ogu nya Adịrahụ nya epwoja ọnyị myị ọnyị eji la ihi-ihi jaabwọ kọ chịla. Ọng myị ọng nyaa la iworu nya ịlọmwụ.”

¹⁹Ma, ahụ tị lẹ, ị kung kpehe dodehe hi iworu nyang lala ụ́bwọ nya okoji ọlẹ kọ kaa bwu ịchacha-kpiji ọlẹ kị kaa chọọ daarụ, ọlẹ ká egu nya ịsọja ịlẹ kị nwụ la ẹma nya ẹwụ ọ-ọgbẹwụ kpụ kụrụ ogu nya ugbinyịrọ nyang, ọlẹ kị gaa ju ka ẹpwụ nya ụjẹ ọlẹ ka iru nya lala egu nya angịdẹwụ ịlẹ kị kaa tụụbwọ hi chị odehe ká angịnyị kpa ata ba.

²⁰Chajị nyọlẹ ká bịrị epweji nyang la ọ-tọọ ayịreji bala ọ-nwụ iru nya angịnyị nyang lụmẹ lẹ, ị́ ka ju ogu nyang eji lala angịkịla nya ka. Ọnyị ọtụma nyang ọhẹ-lọhẹ á tị ka nwa ri adịrahụ ku ọmwakpa nyang kọ ka hi wo ẹnyị-ehe nyang bwu ọdọdẹpwa ọ-họ ang onyobyi ọwẹ ẹnẹnẹhẹ kaka.

²¹Kịnọọ nwụla ẹga ọlẹ kị ka nwụ anyị alẹng nya adịrahụ ọwẹ nọ mẹ! Chajị eje nya ang onyobyi ọhọhọ wu adaa igogo anyị. Ā myị ká ọngọngọhẹ nyaa a wuleji ka ri olegbeju ọkpẹhị rịrị ka kpịla ọ-pyẹpyẹ kị ka tịrẹkpẹ nwụ epweji ịtụka nyaa tụ odehe-odehe da kaka.

²²“M̀ juwa ka wuleji ka mwẹla ta ala ịBabịlọn. Ịnyị Amkpaa Agụgụ a ya lẹ. M̀ ka tọọ ayịreji wuu kpá la ịngịngịhyẹ hi ka. M̀ ka nwụ anjwo nyaa kpá dọmwụ yịlẹ ẹnyị nya ịBabịlọn bala angị ịmanyị-ịmanyị ịlẹ kị hi, tụ anyị ịtụma nya gbe oyi myị oyi.” Ịnyị Amkpaa a ya lẹ.

²³M̀ ka yẹ ọpyị nya ịBabịlọn la ugbileji ọlẹ ká ịrịhyọ lee ịchịrẹkụ bala ịchịnụ-enyi à ka nọ ẹpwa ẹ-ẹga myị ẹga wuu ka yẹ ụ-ụwa bala ẹmwụ-enyi. M̀ ka kpa ehe nya ayịreji ọtata tụ ịBabịlọn bala ang myị ang wuu hụrụ. Am Amkpaa Agụgụ à ya ịnyị lẹ.

²⁴Amkpaa Agụgụ nwa iro ịịlẹ, Ang ịlẹ wuu ka họ jaabwọ ká am Ayịdang me obyi nyaa kpangga ịnyịnyị ị ka la lẹlẹ.

²⁵M̀ ka ta ala Asiriya ayịreji ám ọ-ọpyị nya ala Isirẹlụ nyam. M̀ ka chaa ata kiti-kiti u-uhye nya ịgbọdọ nyam. M̀ ka yi ala Isirẹlụ angịnyị nyam ori bwu ẹpwụ nya ogbilo odoomyi nya ala Asiriya olo ọtụka ọlẹ kị kpa amwachwọ nyaa.

²⁶Obyi ọlẹ kam me chajị nya odehe wuu lẹ, m̀ nịra ụbwọ nyam kpaa nyọka yẹ alepwoja ịkịla akama.

²⁷Chajị ịnyị Amkpaa Agụgụ a me obyi kọ ka họ lẹ. Oowo à tị́ ka dọọyi myị? Ọ nịra ụbwọ nyamwụ kpaa ka yaa akama lẹ, oowo a tị́ tịrọọ ẹkpẹ kpa myị wẹ mẹ?

²⁸Ẹrụ ọlẹ ká Ohe Oluhye du kị ya dodehe ẹ-ẹpwụ nya ẹka ọlẹ ká adịrahụ Ehasị gbu a lẹẹ lẹ:

²⁹Anụ alepweji nya ala iFilisitiya ee! Ānụ chị ọkẹkẹnị lẹka, anụ wuu ịnyị chajị nyọlẹ ká ọgọdọ ọlẹ kọọ nyiinu enyiri mwụ eku lẹlẹ. Ó-ri ká ilo ọnyẹẹgẹga ọhẹ-ẹ gbu odu, ilo ọkịla ọlẹ kọ ju ẹhwa ọnyọọngịrị tịpyọ gụ olene juwa ka warị ka ku ọmwakpa nyamwụ ọlẹ ká ọnyị nya ilo ọọwa ri ọgbịjị ọlẹ kọ ka juwa hụ juwa wuru lala ẹlẹlẹ-ila.

³⁰Amkpaa ka ri Ọngọgbikpịlọ nya angịnyị nyamwụ ịlẹ kị ri ikpehika. Ị ka juwa ye ang ri la orwaahị. Anglẹ kị ji ẹpwụ nya ọbaba ka hị nọnọ nune taaa, chị ịnyịrọ giri-giri ka.

³¹Anụ alepweji nya iFilisitiya, anụ chị eko gboo kanụ be ẹkọ nya ụbwọ ọdada mẹ! Anụ alepweji nya ala iFilisitiya wuu ịnyị. Egbamwụ nya ekuruwa lalẹẹ kpehe bwu ẹtẹ. Ọọwa ri ịsọja ịnyị. Ị nwụlanọ kị ka dẹwụ lẹ. Ọngọ ju uhi ọhẹ-lọhẹ á tị juwa ẹ-ẹpwarịrị nya ịsọja ịwẹ kpong-kpong kaka.

³²Anyị ahị tị́ wẹẹ ka wẹ ẹla nya angịlẹ kị du ẹrụ bwu iFilisitiya tọhị mẹ? Ahị ka byaa yẹkẹẹ, “Amkpaa ka à họ ịSayọn lịlọmwụ lẹ. Ẹ-ẹpwụ nyamwụ angịnyị nyamwụ ịlẹ kị yẹ akama lụmẹ a tị ye ẹga ọkpịbaa lẹ.”