Read idege AYỊSAYA 15 Bible Online

AYỊSAYA 15 - idege bible

AYỊSAYA 15

¹Ẹrụ ọlẹ ká Ohe Oluhye du chajị nya ala iMowabụ a lẹẹ lẹ: Ẹpwụ nya odu nya ụtụrụ ookpokpo kpá kẹnẹ-kẹnẹ ọọwa ịsọja a go ụdụ ọkpụkpụ o-bwu epweji nyaa Aarị bala iKiiri ọ-ọpyị nya iMowabụ kpa rụ, taa ayịreji wẹ lẹ. Ọọwa lẹ, ọpyị nya iMowabụ wuu a chịnyoo lẹlẹ.

²Angịnyị nya ala iDibọn wule ikiti kele ka ẹpwang ẹga ọraabwọ datị-datị juwa jida. Angịnyị nya ala iMowabụ juwa jida, bida ẹ-ẹpwụ nya ang ịjụjụ chajị nya epweji nya iNebo bala iMedeba. Ọng myị ọng nyaa pwọ inyi hi ẹtẹ-ẹtẹ bala ọ-pwọ ịchwọ ẹ-ẹpwụ nya owuru ọkpakpa.

³Opeje ọnyị myị ọnyị ụ-ụwa e-epweji nya iMowabụ, angịnyị wuu kụrụ ịwụrụ nya ida ọbaba. Angịnyị wuu juwa jida lomyị gboo juwa bida ẹ-ẹpwayịrẹtẹ nya ube onune nyaa bala ịkịka nya epweji wuu dagaga ju legbejida myị ahị nyaa wuu.

⁴Ala ịHẹchịbọn bala ala Eleyalẹ chị eko lomyi gboo lụmẹ, omyi nya eko ọchịchị nyaa la gboo lụmẹ kpụ ka angịnyị wo pwụ ẹga ọlụrụ lala epweji nya ịJahasị, chajị ọ dọmwụ lụmẹ gbee ka ịsọja nya iMowabụ chị eko gboo juwa hụ́ kpákpaakpa la uhi ojuju ịnyịnyị.

⁵Ọkịlẹtụ nyam chị eko la ẹla otolujwo chajị nya iMowabụ. Angịnyị nyamwụ rụnyẹ ka iChelichiya. Angịhyẹ wule ọgbọdọ ọlụgbẹyị nya iLuhiti juwa kpa ida je, kpa ọgbọdọ wule. Angịkịla rụnyẹ nya ọhịhị nyaa ka kpịbaa kele ka epweji nya iHoronayim, juwa kpa ida je gbokiri. Ị chị eko nya ayịreji ọtata.

⁶Ẹmwụ-enyi nya iNimrim nwụ kịrẹ-kịrẹ lẹ. Amẹ ịlụwa gbu nwọwnụ wuu lẹ. Ịngịngịhyẹ olukpo á tị juwa kaka.

⁷Ị go ang-ụdụ ịlẹ kị ya ju ụjị juwa kpa be kpoye nya nya Ọkpọọ nya Abegu.

⁸Chajị eko ọchịchị nya akama ọwẹ yịrị ẹga yịrị dagaga ju ọpyị nya ala iMowabụ. Ida ojeje ọwẹ jẹ̀ pwụ epweji nya Ẹgịlayim bala iBiyerelim lẹ.

⁹Ụ-ụwa e-epweji nya iDibọn wẹ lẹ, enyi ịlẹ kị juwa ị-ị̀ba wuu myị̀ lịwọ. Ma Am Amkpaa juwa ka kpa akama ọtụka ọ-gụ ọwẹ warị wẹ uhye nya iDibọn wẹẹ. Angịnyị angị ịmanyị-ịmanyị ịlẹ kị hi kụ e-epweji nya iMowabụ be igu-ọnụ hi aluji nyaa lẹ-ẹ. Ma, m tị juwa ka du egabẹ ẹrụ kele ka nwaa wuu lẹ.