Read idege AYỊSAYA 16 Bible Online

AYỊSAYA 16 - idege bible

AYỊSAYA 16

¹Angịnyị nya ala iMowabụ ịlẹ kị rụnyẹ nya ẹwụ kaka kpịbaa ụ-ụwa u-ugbileji nya iSẹla go iru nya imilodo lụmẹ-lụmẹ du ẹrụ nya ang ịgahị bala ẹpwa ọnyẹnyẹ kpa ba Adịrahụ nya iJuda kele ka uhye nya ọgbọdọ ọla iJerusalẹm.

²Anyị anyang nya ala iMowabụ godayị rịrị u-ugbọọnụ-ụka nya Ihu nya Anọn nyọka kpoye bwu ẹga ká enyi la tẹtịlẹ. Ahị ka chwaa pwoku anyị nya ịchịnụ ichiche ịlẹ kị chabwọ bwu ẹpwụ nya awụ mileji kị jẹ ẹga ọlẹ kị ka jahị da ka datị ka. Ịnyị nyị anyị anyang nya ala iMowabụ a la ụ-ụ́ka nya Ihu nya Anọn lẹ.

³Ọọwa lẹ, ị juwa bịlẹ angịnyị nya ala iJuda yẹkẹẹ, “Anụ mẹ ang ọlẹ kahị ka họ jẹẹhị kanụ ya jehi jaabwọ kahị ka họ mẹ. Anụ keehi lala okoji ọlẹ kọ kaa bwu abwọ kpụ ụrụrụ lụka nya ẹnụ ọchịpwuu hi aluji nyaị, kanụ kpụ ụrụrụ keehi mẹ, kahị mwụ ịnyọ ụ-ụrụrụ nyanụ, anụ pịrịhị ha aluji nyahị ka, chajị ụnyẹ nya ọhịhị ahị rụ ka kpịbaa lẹẹ lẹ. Lẹ, anụ kpụhị ịbaa chajị ọngọngọhẹ a yẹhị kaka mẹ.

⁴Anụ bahiihi ahị angịlẹ kị kụrụ bwu iMowabụ a kụ am ọ-ọpyị nyanụ, kanụ ri ẹga ọ-rụ ka kpịbaa nyahị hi angị tịtọ nyọka tahị ayịreji. Ụka ká angị tụụhị pyị eji á ji kaka, ká angị nu angịnyị ang lagbụrụ á ji kaka bala angị wẹẹ chị epweji ata kiti-kiti la apatẹ a chịpwụrụ kam kpa hi ọpyị lẹ.

⁵Ụka ọọwa ene lẹ aalẹ, anyị ịtụma nya iDevidi a ka ri adịahụ ẹ-ẹchị adịrahụ nyamwụ, ọ-ka gbeji la ọ-chịla o-hu ọkịlẹtụ ha bala ọháha. Adịrahụ ọọwa ka ri ọngọleje bala ọ-tịtọ nya abwẹla ọnyịịla ọhọhọ. Ọ ka la kpịra-kpịra juwa tịtọ nyọka họ ang ọnyịịla.”

⁶Ọọwa lẹ, ala iJuda a wẹ yẹkẹẹ, “Ahị wo ohi nya ala iMowabụ tata, jaabwọ kị hi ọbọọchẹ kaka ba, jaabwọ kọ kpa ịlọmwụ ka uhye gidogbo la agbama ojuju, ma ọbọọchẹ labwabwọ.

⁷Chajị nya ọọwa lẹ, ọ kpụ ká ala iMowabụ ka chị eko jida juwa bida bala eru omwumwu chajị nya akama ọlẹ kị yẹ, ọgụgụ ri ụka kị kpịtịya nya ang iriri ịnyịịla ịlẹ kị kaa ri ụ-ụwa e-epweji nya iKiiri-ịharẹsẹtị.

⁸Ma, ẹrụ nya ala ịHẹchịbọn la hịnẹ-hịnẹ, ị́ nwa tụ kịnyaa myị kaka bala alakọnụ nya ala iSibima la ịnyịnyị. Alegbeju nya epwoja ịkịla ta alakọnụ ịlahịchịng ayịreji lẹ. Ịnọ ụka ọkẹkpẹ ọhẹ lalẹẹ lẹ, alakọnụ ịịwa pyẹ kpá jẹ ka pwụ epweji nya ịJasẹẹ ẹnẹhẹ lẹ, dọmwụ jẹ kele kpá lalaala pwụ ugbileji okoye nya ọmwẹnụ-ụtụrụ bala ọmwẹnụ-obyi jẹ kpa lụrụ-lụrụ ka ju ka ugbọọnụ-ụka nya Ihu Ọlịma-ịma.

⁹Chajị nya ọọwa lẹẹlẹẹ wẹẹ, m jam jida chajị nya ẹrụ nya alakọnụ nya ala iSibima, jaabwọ kam jida chajị nya ịJasẹẹ. M̀ ka jida chajị nya angịnyị nya ala ịHẹchịbọn bala ala Eleyale. Egbejida nyam nyà cheeji chajị ang odudu nya ẹrụ ịlẹ kị ka họ ká angịnyị ka chị ọkẹkẹnị á ji kaka.

¹⁰Ọngọngọhẹ-ẹ́ chị ọkẹkẹnị bala ọkịlẹtụ ọkpịpyọ lẹẹlẹẹ ẹ-ẹpwụ nya ọpyị o-ju eyo ọlẹ kọ kaa nwụ egbe kaka. Ọngọngọhẹ-ẹ́ kaa mwu eje lee ri àgba nya eje ịịlẹ ngịrọrọọrọ ụ-ụwa ẹ-ẹpwụ nya ẹrụ nya alakọnụ kaka. Ọngọngọhẹ-ẹ́ dọmwụ kaa pyị alakọnụ kpa họ ere kaka. Eje nya ọkẹkẹnị cheju kireng.”

¹¹Chajị nya ọọwa lẹ, m̀ jam chị eru layiiji chajị nya iMowabụ. M̀ jam bida chajị nya iKiiri-iharẹsẹtị.

¹²Ụka ká ala iMowabụ juwa nwụ ịlaa gbu ata-ẹdịyẹ kele ka ada iluhye nya ịgbọdọ bala ebe ịraabwọ nyaa kaa raabwọ, abwọ ọrịrị ọọwa á ka họ ang ọnyịịla ọhẹ ọhẹ haa ka.

¹³Ẹla ká Amkpaa ya chajị nya ala iMowabụ tata ene-ene a wẹ lẹ.

¹⁴Ma, lẹẹlẹẹ tị wẹẹ, Amkpaa yẹkẹẹ, “Ẹ-pwụ nya ẹka ịta ọlẹ kpangga iru nya angịnyị ịlẹ wuu kị wẹẹ chị ọkẹkẹnị bala ang-abwọ ịlẹ kịị wẹẹ yaya ju ka waa ẹjẹ. Ụdụ ọkpụkpụ nyaa ka myị táaa. Ọwẹ kpá kị ju iru ju há ka gbeng wẹẹ, ị ka myị wuu kaka hi angị ịmanyị-ịmanyị, ị tị ka jụ ịhyẹ dẹwụ-dẹwụ.”