Read idege AYỊSAYA 17 Bible Online

AYỊSAYA 17 - idege bible

AYỊSAYA 17

¹Ọlẹ ri ẹrụ ọlẹ ká Amkpaa du chajị nya ịDamasịkọsị: “Anụ wo mẹ, epweji nya ịDamasịkọsị ka gu oyi lẹ! Egwawụ-egwawụ ọ ka yẹ kaka ri lẹlẹ.

²Angịnyị ka rụ hi epweji nya Aroyẹẹ kpá chochoocho, ịkpịlọ bala ịna ka juwa ga ri ụ-ụwa, ọngọngọhẹ-ẹ́ ka juwa haa pyee kaka.

³Epweji ịla Isirẹlụ[4] ịlẹ kị me egwalọ ju wuu ka ta ayịreji gbanggbang. Ọngịrị nya ọpyị-adịrahụ nya ịDamasịkọsị ka myị. Ala iSiriya ịlẹ kị hi lọhịhị ka hụ loyi mọmbọọọ jaabwọ kị chị oyoyi ju ala Isirẹlụ.

⁴“Ụtụrụ juwa wẹ ká ụmụmẹ nya Isirẹla ka gu eju, ụdụ nyamwụ ka yẹ ri ẹbyahị.

⁵Isirẹlụ ka lala ẹrụ ọlẹ kị wụ ang ịlụwa kpá, lala ẹrụ ịlẹ ká angịnyị kaa la ọlụmwọ ọ-ọkpọọ nya iRefayim.

⁶Angị ihihi nya ala Isirẹlụ ka la wure-wure, lala olivu ọlẹ kị hya egbe nyaa kpá ká ịhyẹ kaa hi kpengkpèngkpeng, lala imiiye lee ịta a-achinege lee ịmanyị-ịmanyị abwọ ileji.” Jaabwọ ká Amkpaa Ohe oluhye nya ala Isirẹlụ ya à wẹ lẹlẹ.

⁷Ẹnụ ọọwa-á pwụ eji, angịnyị ka jahị kpata juwa tịtọ nya ụbwọ ọdada bwu ẹga nya ọngọ haa họ kọ ri Ọngọ Ọlịgọgọ nya ala Isirẹlụ.

⁸Ị́ tụtụm ka yẹhị nọ ka ẹga nya ada ikiliya ịlẹ kị họ lụbwọ nya ịlaa lee ekpeku nya Achẹra ojiga ọnyang kaka. Ị́ ka hu ada i-ju ịtangare ila ịlẹ kị kpa abwọ nya ịlaa họ kaka.

⁹Ẹnụ ọọwa-á pwụ eji, epweji ịtụka ịlẹ kị chị ajẹ ju wuu ka kpụ egwawụ-egwawụ. Ị ka lala epweji ịla ká ala iHivi bala ala Amọ rụnyẹ rụ hi ọọ-lajị nya ala Isirẹlụ ugbeene.

¹⁰Ang odudu ri yẹkẹẹ, anụ ala Isirẹlụ deeri nya Ohe Oluhye ọngọlẹ kọ chịnụ da, Ẹjwọ ọchẹwụ keenu bala ẹga ọkpịbaa nyanụ. Anụ ka wu ẹrụ nya alakọnụ ịnyịịla-ịnyịịla ịlẹ kanụ bẹẹdọ bwu ịpyị ịkịla, chajị nyọka kpụ eteji ha ojiga ọngga myị.

¹¹Ị́ bwubwu ẹnụ alẹ-alẹ nyọlẹ kanụ ya tọ, ánụ ka ye ịngịngịhyẹ hya bwu uhye nyaa ka. Ang ọlẹ kanụ ka ye kẹnẹ-kẹnẹ ri akama bala ọjụjụ ọlẹ kọ ka jẹ-ẹ̀ myị kaka.

¹²Ẹpwụma ịlịngịrị ịtụka juwa họ ọmọnyọ lala ọhụụ nya ihu! Ojigi-jigi kpụ eji, iru juwa tá lala agbụ ogugu nya enyi ọtụka!

¹³Ị́ wẹ tutuutu juwa tá iru lala enyi, ká Ohe Oluhye-é daa otaá, ị wa wii, ị rụ huko-huko lala igbachịwụ à da ewoo nya ang ekinggo ịlẹ ká ugbọchịrị kaa pyị kịla-kịla.

¹⁴Alobyi aluji chị uhi ju eji, ahị ka pyẹ kpá, ị ta ayịreji go olo kirim̀. Ịịwẹ ụtụrụ à ka byị angịlẹ wuu kịị wẹ kaka wụhị ang wụ, beehi ẹpwa nuhi ang kpa rụ lagbụrụ lẹlẹ.