Read idege AYỊSAYA 18 Bible Online

AYỊSAYA 18 - idege bible

AYỊSAYA 18

¹Ụ-ụwa o-oye ọlaanyị nya Ihu nya Itiyopyiya, ọpyị ọhẹ juwa ọlẹ kọ myị̀ la iru nya achwọ juwa hụ ọlẹ ká angịnyị wo anụ nyaa.

²Alọpyị ọọwa du angị ku ọmwakpa nya ịlaa kpoye nya Ihu nya ịNayịlị. Ị ju ụmwụ ịlẹ kị kpa ego ị-jụ ịcha họ juwa tụ enyi-enyi da. Anụ kele ka epwoja ịlẹ ká angị ịlụwa luhye lụmẹ bala ugbinyịrọ nyaa la hịlẹ-hịlẹ mẹ. Anụ angị myị ẹrụ ịlẹ kanụ la kpịra-kpịra kaa chị agaga lụmẹ, anụ kele ka epwoja ịlẹ kị myị̀ la uhi ojuju ẹ-ẹga o-ju chwẹẹ bala ịlẹ kị ji ẹga ọlụrụ, epwoja ịlẹ kị la ụmụmẹ bala ọ-myị̀ lọngịrị juwa kaa kụrụ angịkịla ri angịlẹ ká ọ̀ba chị ọpyị nyaa oyi.

³Anụ angịnyị ịlẹ kanụ kụ ẹpwa ụ-ụwa odehe wuu ee! Ụka ká ang i-ju ẹjẹẹ, ọhẹ-lọhẹ á hu hwaa u-uhye nya ịgbọdọ, anụ-ụ̀ chẹhị kele kaka yọọ. Ụka ká ẹkụrwẹ lee opyike á tị chị, anụ-ụ̀ ke ụrụ kanụ wo!

⁴Chajị ịịlẹ Amkpaa a byim lẹ: Am Ohe Oluhye ka bwu epwoohe ẹga ká am Amkpaa kụ ẹpwa warị juwa gbeji wẹẹ yọyị gedee lọnụ-ujiji. M̀ ka la jaabwọ ká ọchịpwuu nya ọhwẹnụ á juwa chị ká amwụ ọkpụkpụ nya odu, ụka ọlẹ ká ẹga kaa chị ila bwobwoobwo lụka nya angịnyị a du ang-abwọ nya ẹrụ.

⁵Chajị jaabwọ kọ la ene ká angịnyị ka hya egbe nya ẹrụ nyaa ka taa guru, apwụ igugu nyaa ka wo chị e-eji ene ká egbe ka gụ, ọọwa aluji a kaa gbile ẹma daa lẹ, ọ kaa hyaa chịịrụ lẹ, ịnyịnyị aluji a ka ta ala Itiyopyiya ayịreji ịịlẹ huke jaabwọ ká ẹma hya abwọ nya alakọnụ lẹ.

⁶Egu nya ugbinyịrọ nya ịsọja nyaa ka hi chị ụ-ụwa odehe ha ẹpwụ iluhye nya ịgbọdọ bala iyo ịnyịịngịrị ilodehe. Ọọwa lẹ, ụka nya ụrwẹnụ egu nya ịnyịrọ a ka ri ang iriri nya ịhịnụ i-ri iyo lẹlẹ. Ụka nya ohu ọhọhọ ọlọpyị nya alubekee lẹ, iyo ịlẹpwamẹ a ka juwa ri ịnyịrọ nyaa lẹlẹ.

⁷Ụka juwa wẹ ká Amkpaa ye ọhaha bwu ẹga nya angịlẹ ká ihu chị ọpyị nya ebwo kpoo hi awụlẹ, ịwa angị gbọnggbọng ịlịnyịrọ hịlẹ-hịlẹ ịwẹ, ịwa alụma ọtụka ịlọngịrị ịlẹ ká alẹga myị ẹga nya odehe wuu ju uhi nyaa. Ị ka warị wẹ Ọgbọdọ nya ịSayọn ẹga kị kaa gbịgba ha Amkpaa Agụgụ.